९. जाणुस्सोणिसुत्तवण्णना

६०. नवमे यस्सस्सूति यस्स भवेय्युं. यञ्ञोतिआदीसु यजितब्बोति यञ्ञो, देय्यधम्मस्सेतं नामं. सद्धन्ति मतकभत्तं. थालिपाकोति वरपुरिसानं दातब्बयुत्तं भत्तं. देय्यधम्मन्ति वुत्तावसेसं यंकिञ्चि देय्यधम्मं नाम. तेविज्जेसु ब्राह्मणेसु दानं ददेय्याति सब्बमेतं दानं तेविज्जेसु ददेय्य, तेविज्जा ब्राह्मणाव पटिग्गहेतुं युत्ताति दस्सेति. सेसमेत्थ हेट्ठा वुत्तनयमेवाति.