३. चिन्तीसुत्तवण्णना

३. ततिये बाललक्खणानीति ‘‘बालो अय’’न्ति एतेहि लक्खीयति ञायतीति बाललक्खणानि. तानेवस्स सञ्जाननकारणानीति बालनिमित्तानि. बालापदानानीति बालस्स अपदानानि. दुच्चिन्तितचिन्तीति चिन्तयन्तो अभिज्झाब्यापादमिच्छादस्सनवसेन दुच्चिन्तितमेव चिन्तेति. दुब्भासितभासीति भासमानोपि मुसावादादिभेदं दुब्भासितमेव भासति. दुक्कटकम्मकारीति करोन्तोपि पाणातिपातादिवसेन दुक्कटकम्ममेव करोति. पण्डितलक्खणानीतिआदि वुत्तानुसारेनेव वेदितब्बं. सुचिन्तितचिन्तीतिआदीनि चेत्थ मनोसुचरितादीनं वसेन योजेतब्बानि.