४. अच्चयसुत्तवण्णना

४. चतुत्थे अच्चयं अच्चयतो न पस्सतीति अत्तनो अपराधं अपराधतो न पस्सति. अच्चयतो दिस्वा यथाधम्मं नप्पटिकरोतीति ‘‘अपरद्धं मया’’ति ञत्वापि यो धम्मो, तं न करोति, दण्डकम्मं आहरित्वा अच्चयं न देसेति नक्खमापेति. अच्चयं देसेन्तस्स यथाधम्मं नप्पटिग्गण्हातीति परस्स ‘‘विरद्धं मया’’ति ञत्वा दण्डकम्मं आहरित्वा खमापेन्तस्स नक्खमति. सुक्कपक्खो वुत्तपटिपक्खतो वेदितब्बो.