७-८. पच्चोरोहणीसुत्तद्वयवण्णना

११९-१२०. सत्तमे पच्चोरोहणीति पापस्स पच्चोरोहणं. पत्थरित्वाति सन्थरित्वा. अन्तरा च वेलं अन्तरा च अग्यागारन्ति वालिकारासिस्स च अग्गिअगारस्स च अन्तरे. अट्ठमं भिक्खुसङ्घस्स देसितं. सेसं सब्बत्थ उत्तानत्थमेवाति.

पच्चोरोहणिवग्गो दुतियो.

(१३) ३. परिसुद्धवग्गवण्णना

१२३. ततियस्स पठमे परिसुद्धाति निम्मला. परियोदाताति पभस्सरा. दुतियादीनि उत्तानत्थानेवाति.

परिसुद्धवग्गो ततियो.

(१४) ४. साधुवग्गवण्णना

१३४. चतुत्थस्स पठमे साधुन्ति भद्दकं सिलिट्ठकं. दुतियादीनि उत्तानत्थानेवाति. अरियमग्गवग्गो उत्तानत्थोयेवाति.

साधुवग्गो चतुत्थो.

ततियपण्णासकं निट्ठितं.