(९) निरुज्झमानुप्पन्नवारो

९८. (क) यं चित्तं निरुज्झमानं तं चित्तं उप्पन्नन्ति? आमन्ता.

(ख) यं वा पन चित्तं उप्पन्नं तं चित्तं निरुज्झमानन्ति?

उप्पादक्खणे चित्तं उप्पन्नं, नो च तं चित्तं निरुज्झमानं. भङ्गक्खणे चित्तं उप्पन्नञ्चेव निरुज्झमानञ्च.

(क) यं चित्तं न निरुज्झमानं तं चित्तं न उप्पन्नन्ति?

उप्पादक्खणे चित्तं न निरुज्झमानं, नो च तं चित्तं न उप्पन्नं. अतीतानागतं चित्तं न चेव निरुज्झमानं न च उप्पन्नं.

(ख) यं वा पन चित्तं न उप्पन्नं तं चित्तं न निरुज्झमानन्ति? आमन्ता.