(१०) उप्पन्नुप्पादवारो

९९. (क) यं चित्तं उप्पन्नं तं चित्तं उप्पज्जित्थाति? नो.

(ख) यं वा पन चित्तं उप्पज्जित्थ तं चित्तं उप्पन्नन्ति? नो.

(क) यं चित्तं न उप्पन्नं तं चित्तं न उप्पज्जित्थाति?

अतीतं चित्तं न उप्पन्नं, नो च तं चित्तं न उप्पज्जित्थ. अनागतं चित्तं न चेव उप्पन्नं न च उप्पज्जित्थ.

(ख) यं वा पन चित्तं न उप्पज्जित्थ तं चित्तं न उप्पन्नन्ति?

पच्चुप्पन्नं चित्तं न उप्पज्जित्थ, नो च तं चित्तं न उप्पन्नं. अनागतं चित्तं न चेव उप्पज्जित्थ न च उप्पन्नं.

१००. (क) यं चित्तं उप्पन्नं तं चित्तं उप्पज्जिस्सतीति? नो.

(ख) यं वा पन चित्तं उप्पज्जिस्सति तं चित्तं उप्पन्नन्ति? नो.

(क) यं चित्तं न उप्पन्नं तं चित्तं न उप्पज्जिस्सतीति?

अनागतं चित्तं न उप्पन्नं, नो च तं चित्तं न उप्पज्जिस्सति. अतीतं चित्तं न चेव उप्पन्नं न च उप्पज्जिस्सति.

(ख) यं वा पन चित्तं न उप्पज्जिस्सति तं चित्तं न उप्पन्नन्ति?

पच्चुप्पन्नं चित्तं न उप्पज्जिस्सति, नो च तं चित्तं न उप्पन्नं. अतीतं चित्तं न चेव उप्पज्जिस्सति न च उप्पन्नं.