(८) उप्पज्जमानुप्पन्नवारो

९७. (क) यं चित्तं उप्पज्जमानं तं चित्तं उप्पन्नन्ति? आमन्ता.

(ख) यं वा पन चित्तं उप्पन्नं तं चित्तं उप्पज्जमानन्ति?

भङ्गक्खणे चित्तं उप्पन्नं, नो च तं चित्तं उप्पज्जमानं. उप्पादक्खणे चित्तं उप्पन्नञ्चेव उप्पज्जमानञ्च.

(क) यं चित्तं न उप्पज्जमानं तं चित्तं न उप्पन्नन्ति?

भङ्गक्खणे चित्तं न उप्पज्जमानं, नो च तं चित्तं न उप्पन्नं. अतीतानागतं चित्तं न चेव उप्पज्जमानं न च उप्पन्नं.

(ख) यं वा पन चित्तं न उप्पन्नं तं चित्तं न उप्पज्जमानन्ति? आमन्ता.