(४) उप्पादवारो

८७. (क) यं चित्तं उप्पज्जति तं चित्तं उप्पज्जित्थाति? नो.

(ख) यं वा पन चित्तं उप्पज्जित्थ तं चित्तं उप्पज्जतीति? नो.

(क) यं चित्तं न उप्पज्जति तं चित्तं न उप्पज्जित्थाति?

अतीतं चित्तं न उप्पज्जति, नो च तं चित्तं न उप्पज्जित्थ. भङ्गक्खणे अनागतञ्च चित्तं न चेव उप्पज्जति न च उप्पज्जित्थ.

(ख) यं वा पन चित्तं न उप्पज्जित्थ तं चित्तं न उप्पज्जतीति?

उप्पादक्खणे चित्तं न उप्पज्जित्थ, नो च तं चित्तं न उप्पज्जति. भङ्गक्खणे अनागतञ्च चित्तं न चेव उप्पज्जित्थ न च उप्पज्जति.

८८. (क) यं चित्तं उप्पज्जति तं चित्तं उप्पज्जिस्सतीति? नो.

(ख) यं वा पन चित्तं उप्पज्जिस्सति तं चित्तं उप्पज्जतीति? नो.

(क) यं चित्तं न उप्पज्जति तं चित्तं न उप्पज्जिस्सतीति?

अनागतं चित्तं न उप्पज्जति, नो च तं चित्तं न उप्पज्जिस्सति. भङ्गक्खणे अतीतञ्च चित्तं न चेव उप्पज्जति न च उप्पज्जिस्सति.

(ख) यं वा पन चित्तं न उप्पज्जिस्सति तं चित्तं न उप्पज्जतीति?

उप्पादक्खणे चित्तं न उप्पज्जिस्सति, नो च तं चित्तं न उप्पज्जति. भङ्गक्खणे अतीतञ्च चित्तं न चेव उप्पज्जिस्सति न च उप्पज्जति.

८९. (क) यं चित्तं उप्पज्जित्थ तं चित्तं उप्पज्जिस्सतीति? नो.

(ख) यं वा पन चित्तं उप्पज्जिस्सति तं चित्तं उप्पज्जित्थाति? नो.

(क) यं चित्तं न उप्पज्जित्थ तं चित्तं न उप्पज्जिस्सतीति?

अनागतं चित्तं न उप्पज्जित्थ, नो च तं चित्तं न उप्पज्जिस्सति. पच्चुप्पन्नं चित्तं न चेव उप्पज्जित्थ न च उप्पज्जिस्सति.

(ख) यं वा पन चित्तं न उप्पज्जिस्सति तं चित्तं न उप्पज्जित्थाति?

अतीतं चित्तं न उप्पज्जिस्सति, नो च तं चित्तं न उप्पज्जित्थ. पच्चुप्पन्नं चित्तं न चेव उप्पज्जिस्सति न च उप्पज्जित्थ.