(५) निरोधवारो

९०. (क) यं चित्तं निरुज्झति तं चित्तं निरुज्झित्थाति? नो.

(ख) यं वा पन चित्तं निरुज्झित्थ तं चित्तं निरुज्झतीति? नो.

(क) यं चित्तं न निरुज्झति तं चित्तं न निरुज्झित्थाति?

अतीतं चित्तं न निरुज्झति, नो च तं चित्तं न निरुज्झित्थ. उप्पादक्खणे अनागतञ्च चित्तं न चेव निरुज्झति न च निरुज्झित्थ.

(ख) यं वा पन चित्तं न निरुज्झित्थ तं चित्तं न निरुज्झतीति?

भङ्गक्खणे चित्तं न निरुज्झित्थ, नो च तं चित्तं न निरुज्झति. उप्पादक्खणे अनागतञ्च चित्तं न चेव निरुज्झित्थ न च निरुज्झति.

९१. (क) यं चित्तं निरुज्झति तं चित्तं निरुज्झिस्सतीति? नो.

(ख) यं वा पन चित्तं निरुज्झिस्सति तं चित्तं निरुज्झतीति? नो.

(क) यं चित्तं न निरुज्झति तं चित्तं न निरुज्झिस्सतीति?

उप्पादक्खणे अनागतञ्च चित्तं न निरुज्झति, नो च तं चित्तं न निरुज्झिस्सति. अतीतं चित्तं न चेव निरुज्झति न च निरुज्झिस्सति.

(ख) यं वा पन चित्तं न निरुज्झिस्सति तं चित्तं न निरुज्झतीति?

भङ्गक्खणे चित्तं न निरुज्झिस्सति, नो च तं चित्तं न निरुज्झति. अतीतं चित्तं न चेव निरुज्झिस्सति न च निरुज्झति.

९२. (क) यं चित्तं निरुज्झित्थ तं चित्तं निरुज्झिस्सतीति? नो.

(ख) यं वा पन चित्तं निरुज्झिस्सति तं चित्तं निरुज्झित्थाति? नो.

(क) यं चित्तं न निरुज्झित्थ तं चित्तं न निरुज्झिस्सतीति?

उप्पादक्खणे अनागतञ्च चित्तं न निरुज्झित्थ, नो च तं चित्तं न निरुज्झिस्सति. भङ्गक्खणे चित्तं न चेव निरुज्झित्थ न च निरुज्झिस्सति.

(ख) यं वा पन चित्तं न निरुज्झिस्सति तं चित्तं न निरुज्झित्थाति?

अतीतं चित्तं न निरुज्झिस्सति, नो च तं चित्तं न निरुज्झित्थ. भङ्गक्खणे चित्तं न चेव निरुज्झिस्सति न च निरुज्झित्थ.