(३) निरोधुप्पन्नवारो

८६. (क) यं चित्तं निरुज्झति तं चित्तं उप्पन्नन्ति? आमन्ता.

(ख) यं वा पन चित्तं उप्पन्नं तं चित्तं निरुज्झतीति?

उप्पादक्खणे चित्तं उप्पन्नं, नो च तं चित्तं निरुज्झति. भङ्गक्खणे चित्तं उप्पन्नञ्चेव निरुज्झति च.

(क) यं चित्तं न निरुज्झति तं चित्तं न उप्पन्नन्ति?

उप्पादक्खणे चित्तं न निरुज्झति, नो च तं चित्तं न उप्पन्नं. अतीतानागतं चित्तं न चेव निरुज्झति न च उप्पन्नं.

(ख) यं वा पन चित्तं न उप्पन्नं तं चित्तं न निरुज्झतीति? आमन्ता.