(२) उप्पादुप्पन्नवारो

८५. (क) यं चित्तं उप्पज्जति तं चित्तं उप्पन्नन्ति? आमन्ता.

(ख) यं वा पन चित्तं उप्पन्नं तं चित्तं उप्पज्जतीति?

भङ्गक्खणे चित्तं उप्पन्नं, नो च तं चित्तं उप्पज्जति. उप्पादक्खणे चित्तं उप्पन्नञ्चेव उप्पज्जति च.

(क) यं चित्तं न उप्पज्जति तं चित्तं न उप्पन्नन्ति?

भङ्गक्खणे चित्तं न उप्पज्जति, नो च तं चित्तं न उप्पन्नं. अतीतानागतं चित्तं न चेव उप्पज्जति न च उप्पन्नं.

(ख) यं वा पन चित्तं न उप्पन्नं तं चित्तं न उप्पज्जतीति? आमन्ता.