७. अभिञ्ञेय्यादिवारो

१०३०. पञ्चन्नं खन्धानं कति अभिञ्ञेय्या, कति परिञ्ञेय्या, कति पहातब्बा, कति भावेतब्बा, कति सच्छिकातब्बा, कति न पहातब्बा, न भावेतब्बा, न सच्छिकातब्बा…पे… सत्तन्नं चित्तानं कति अभिञ्ञेय्या, कति परिञ्ञेय्या, कति पहातब्बा, कति भावेतब्बा, कति सच्छिकातब्बा, कति न पहातब्बा न भावेतब्बा न सच्छिकातब्बा?

१०३१. रूपक्खन्धो अभिञ्ञेय्यो परिञ्ञेय्यो न पहातब्बो न भावेतब्बो न सच्छिकातब्बो. चत्तारो खन्धा अभिञ्ञेय्या परिञ्ञेय्या, सिया पहातब्बा, सिया भावेतब्बा, सिया सच्छिकातब्बा, सिया न पहातब्बा न भावेतब्बा न सच्छिकातब्बा.

दसायतना अभिञ्ञेय्या परिञ्ञेय्या न पहातब्बा न भावेतब्बा न सच्छिकातब्बा. द्वे आयतना अभिञ्ञेय्या परिञ्ञेय्या, सिया पहातब्बा, सिया भावेतब्बा, सिया सच्छिकातब्बा, सिया न पहातब्बा न भावेतब्बा न सच्छिकातब्बा.

सोळस धातुयो अभिञ्ञेय्या परिञ्ञेय्या न पहातब्बा न भावेतब्बा न सच्छिकातब्बा. द्वे धातुयो अभिञ्ञेय्या परिञ्ञेय्या, सिया पहातब्बा, सिया भावेतब्बा, सिया सच्छिकातब्बा, सिया न पहातब्बा न भावेतब्बा न सच्छिकातब्बा.

समुदयसच्चं अभिञ्ञेय्यं परिञ्ञेय्यं पहातब्बं न भावेतब्बं न सच्छिकातब्बं. मग्गसच्चं अभिञ्ञेय्यं परिञ्ञेय्यं न पहातब्बं भावेतब्बं न सच्छिकातब्बं. निरोधसच्चं अभिञ्ञेय्यं परिञ्ञेय्यं न पहातब्बं न भावेतब्बं सच्छिकातब्बं. दुक्खसच्चं अभिञ्ञेय्यं परिञ्ञेय्यं, सिया पहातब्बं, न भावेतब्बं, न सच्छिकातब्बं, सिया न पहातब्बं.

नविन्द्रिया अभिञ्ञेय्या परिञ्ञेय्या न पहातब्बा न भावेतब्बा न सच्छिकातब्बा. दोमनस्सिन्द्रियं अभिञ्ञेय्यं परिञ्ञेय्यं पहातब्बं न भावेतब्बं न सच्छिकातब्बं. अनञ्ञातञ्ञस्सामीतिन्द्रियं अभिञ्ञेय्यं परिञ्ञेय्यं न पहातब्बं भावेतब्बं न सच्छिकातब्बं. अञ्ञिन्द्रियं अभिञ्ञेय्यं परिञ्ञेय्यं न पहातब्बं, सिया भावेतब्बं, सिया सच्छिकातब्बं. अञ्ञाताविन्द्रियं अभिञ्ञेय्यं परिञ्ञेय्यं न पहातब्बं न भावेतब्बं सच्छिकातब्बं. तीणिन्द्रिया अभिञ्ञेय्या परिञ्ञेय्या न पहातब्बा, सिया भावेतब्बा, सिया सच्छिकातब्बा, सिया न भावेतब्बा, सच्छिकातब्बा. छ इन्द्रिया अभिञ्ञेय्या परिञ्ञेय्या, सिया पहातब्बा, सिया भावेतब्बा, सिया सच्छिकातब्बा, सिया न पहातब्बा न भावेतब्बा न सच्छिकातब्बा.

तयो अकुसलहेतू अभिञ्ञेय्या परिञ्ञेय्या पहातब्बा न भावेतब्बा न सच्छिकातब्बा. तयो कुसलहेतू अभिञ्ञेय्या परिञ्ञेय्या न पहातब्बा, सिया भावेतब्बा, न सच्छिकातब्बा, सिया न भावेतब्बा. तयो अब्याकतहेतू अभिञ्ञेय्या परिञ्ञेय्या न पहातब्बा न भावेतब्बा, सिया सच्छिकातब्बा, सिया न सच्छिकातब्बा.

कबळीकारो आहारो अभिञ्ञेय्यो परिञ्ञेय्यो न पहातब्बो न भावेतब्बो न सच्छिकातब्बो. तयो आहारा अभिञ्ञेय्या परिञ्ञेय्या, सिया पहातब्बा, सिया भावेतब्बा, सिया सच्छिकातब्बा, सिया न पहातब्बा न भावेतब्बा न सच्छिकातब्बा.

छ फस्सा अभिञ्ञेय्या परिञ्ञेय्या न पहातब्बा न भावेतब्बा न सच्छिकातब्बा. मनोविञ्ञाणधातुसम्फस्सो अभिञ्ञेय्यो परिञ्ञेय्यो, सिया पहातब्बो, सिया भावेतब्बो, सिया सच्छिकातब्बो, सिया न पहातब्बो न भावेतब्बो न सच्छिकातब्बो.

छ वेदना…पे… छ सञ्ञा… छ चेतना… छ चित्ता अभिञ्ञेय्या परिञ्ञेय्या न पहातब्बा न भावेतब्बा न सच्छिकातब्बा. मनोविञ्ञाणधातु अभिञ्ञेय्या परिञ्ञेय्या, सिया पहातब्बा, सिया भावेतब्बा, सिया सच्छिकातब्बा, सिया न पहातब्बा न भावेतब्बा न सच्छिकातब्बा.