८. सारम्मणानारम्मणवारो

१०३२. पञ्चन्नं खन्धानं कति सारम्मणा, कति अनारम्मणा…पे… सत्तन्नं चित्तानं कति सारम्मणा, कति अनारम्मणा?

१०३३. रूपक्खन्धो अनारम्मणो. चत्तारो खन्धा सारम्मणा.

दसायतना अनारम्मणा. मनायतनं सारम्मणं. धम्मायतनं सिया सारम्मणं, सिया अनारम्मणं.

दस धातुयो अनारम्मणा. सत्त धातुयो सारम्मणा. धम्मधातु सिया सारम्मणा, सिया अनारम्मणा.

द्वे सच्चा सारम्मणा. निरोधसच्चं अनारम्मणं. दुक्खसच्चं सिया सारम्मणं, सिया अनारम्मणं.

सत्तिन्द्रिया अनारम्मणा. चुद्दसिन्द्रिया सारम्मणा. जीवितिन्द्रियं सिया सारम्मणं, सिया अनारम्मणं. नव हेतू सारम्मणा. कबळीकारो आहारो अनारम्मणो. तयो आहारा सारम्मणा. सत्त फस्सा… सत्त वेदना… सत्त सञ्ञा… सत्त चेतना… सत्त चित्ता सारम्मणा.

१०३४. पञ्चन्नं खन्धानं कति सारम्मणारम्मणा, कति अनारम्मणारम्मणा…पे… सत्तन्नं चित्तानं कति सारम्मणारम्मणा, कति अनारम्मणारम्मणा?

१०३५. रूपक्खन्धो अनारम्मणो. चत्तारो खन्धा सिया सारम्मणारम्मणा, सिया अनारम्मणारम्मणा.

दसायतना अनारम्मणा. मनायतनं सिया सारम्मणारम्मणं, सिया अनारम्मणारम्मणं. धम्मायतनं सिया सारम्मणारम्मणं, सिया अनारम्मणारम्मणं, सिया अनारम्मणं.

दस धातुयो अनारम्मणा. छ धातुयो अनारम्मणारम्मणा. मनोविञ्ञाणधातु सिया सारम्मणारम्मणा, सिया अनारम्मणारम्मणा. धम्मधातु सिया सारम्मणारम्मणा, सिया अनारम्मणारम्मणा, सिया अनारम्मणा.

निरोधसच्चं अनारम्मणं. मग्गसच्चं अनारम्मणारम्मणं. समुदयसच्चं सिया सारम्मणारम्मणं, सिया अनारम्मणारम्मणं. दुक्खसच्चं सिया सारम्मणारम्मणं, सिया अनारम्मणारम्मणं, सिया अनारम्मणं.

सत्तिन्द्रिया अनारम्मणा. पञ्चिन्द्रिया अनारम्मणारम्मणा. नविन्द्रिया सिया सारम्मणारम्मणा, सिया अनारम्मणारम्मणा. जीवितिन्द्रियं सिया सारम्मणारम्मणं, सिया अनारम्मणारम्मणं, सिया अनारम्मणं.

नव हेतू सिया सारम्मणारम्मणा, सिया अनारम्मणारम्मणा. कबळीकारो आहारो अनारम्मणो. तयो आहारा सिया सारम्मणारम्मणा, सिया अनारम्मणारम्मणा. छ फस्सा अनारम्मणारम्मणा. मनोविञ्ञाणधातुसम्फस्सो सिया सारम्मणारम्मणो सिया अनारम्मणारम्मणो. छ वेदना… छ सञ्ञा… छ चेतना… छ चित्ता अनारम्मणारम्मणा. मनोविञ्ञाणधातु सिया सारम्मणारम्मणा, सिया अनारम्मणारम्मणा.