१. उप्पादककम्मं

१०२१. देवाति. तयो देवा – सम्मुतिदेवा [सम्मतिदेवा (स्या.)], उपपत्तिदेवा, विसुद्धिदेवा.

सम्मुतिदेवा नाम – राजानो, देवियो, कुमारा.

उपपत्तिदेवा नाम – चातुमहाराजिके [चातुम्महाराजिके (सी. स्या.)] देवे उपादाय तदुपरि देवा.

विसुद्धिदेवा नाम – अरहन्तो वुच्चन्ति.

दानं दत्वा, सीलं समादियित्वा, उपोसथकम्मं कत्वा कत्थ उपपज्जन्ति? दानं दत्वा, सीलं समादियित्वा, उपोसथकम्मं कत्वा अप्पेकच्चे खत्तियमहासालानं सहब्यतं उपपज्जन्ति, अप्पेकच्चे ब्राह्मणमहासालानं सहब्यतं उपपज्जन्ति, अप्पेकच्चे गहपतिमहासालानं सहब्यतं उपपज्जन्ति, अप्पेकच्चे चातुमहाराजिकानं देवानं सहब्यतं उपपज्जन्ति, अप्पेकच्चे तावतिंसानं देवानं सहब्यतं उपपज्जन्ति, अप्पेकच्चे यामानं देवानं सहब्यतं उपपज्जन्ति, अप्पेकच्चे तुसितानं देवानं सहब्यतं उपपज्जन्ति, अप्पेकच्चे निम्मानरतीनं देवानं सहब्यतं उपपज्जन्ति, अप्पेकच्चे परनिम्मितवसवत्तीनं देवानं सहब्यतं उपपज्जन्ति.