(७) पञ्च चेतसो विनिबन्धा

तत्थ कतमे पञ्च चेतसो विनिबन्धा? कामे अवीतरागो होति अविगतच्छन्दो अविगतपेमो अविगतपिपासो अविगतपरिळाहो अविगततण्हो; काये अवीतरागो होति… रूपे अवीतरागो होति… यावदत्थं उदरावदेहकं भुञ्जित्वा सेय्यसुखं पस्ससुखं मिद्धसुखं अनुयुत्तो विहरति; अञ्ञतरं देवनिकायं पणिधाय ब्रह्मचरियं चरति – ‘‘इमिनाहं सीलेन वा वतेन वा तपेन वा ब्रह्मचरियेन वा देवो वा भविस्सामि देवञ्ञतरो वा’’ति – इमे पञ्च चेतसोविनिबन्धा.