(२६. क) दोवचस्सता

९२७. तत्थ कतमा दोवचस्सता? सहधम्मिके वुच्चमाने दोवचस्सायं दोवचस्सियं दोवचस्सता विप्पटिकुलग्गाहिता विपच्चनीकसातता अनादरियं अनादरता अगारवता अप्पतिस्सवता – अयं वुच्चति ‘‘दोवचस्सता’’.

(ख) पापमित्तता

तत्थ कतमा पापमित्तता? ये ते पुग्गला अस्सद्धा दुस्सीला अप्पस्सुता मच्छरिनो दुप्पञ्ञा, या तेसं सेवना निसेवना संसेवना भजना सम्भजना भत्ति सम्भत्ति तंसम्पवङ्कता – अयं वुच्चति ‘‘पापमित्तता’’.

(ग) नानत्तसञ्ञा

तत्थ कतमा नानत्तसञ्ञा? कामसञ्ञा, ब्यापादसञ्ञा, विहिंसासञ्ञा – अयं वुच्चति ‘‘नानत्तसञ्ञा’’. सब्बापि अकुसला सञ्ञा नानत्तसञ्ञा.