(१३) तीणि भयानि

९२१. तत्थ कतमानि तीणि भयानि? जातिभयं, जराभयं, मरणभयं.

(क) तत्थ कतमं जातिभयं? जातिं पटिच्च भयं भयानकं छम्भितत्तं लोमहंसो चेतसो उत्रासो – इदं वुच्चति ‘‘जातिभयं’’.

(ख) तत्थ कतमं जराभयं? जरं पटिच्च भयं भयानकं छम्भितत्तं लोमहंसो चेतसो उत्रासो – इदं वुच्चति ‘‘जराभयं’’.

(ग) तत्थ कतमं मरणभयं? मरणं पटिच्च भयं भयानकं छम्भितत्तं लोमहंसो चेतसो उत्रासो – इदं वुच्चति ‘‘मरणभयं’’. इमानि तीणि भयानि.