(११) तिस्सो एसना

९१९. तत्थ कतमा तिस्सो एसना? कामेसना, भवेसना, ब्रह्मचरियेसना.

(क) तत्थ कतमा कामेसना? यो कामेसु कामच्छन्दो…पे… कामज्झोसानं – अयं वुच्चति ‘‘कामेसना’’.

(ख) तत्थ कतमा भवेसना? यो भवेसु भवच्छन्दो…पे… भवज्झोसानं – अयं वुच्चति ‘‘भवेसना’’.

(ग) तत्थ कतमा ब्रह्मचरियेसना? ‘‘सस्सतो लोको’’ति वा, ‘‘असस्सतो लोको’’ति – वा…पे… ‘‘नेव होति न न होति तथागतो परं मरणा’’ति वा या एवरूपा दिट्ठि दिट्ठिगतं…पे… विपरियासग्गाहो – अयं वुच्चति ‘‘ब्रह्मचरियेसना’’.

(क) तत्थ कतमा कामेसना, कामरागो, तदेकट्ठं अकुसलं कायकम्मं वचीकम्मं मनोकम्मं – अयं वुच्चति ‘‘कामेसना’’.

(ख) तत्थ कतमा भवेसना, भवरागो तदेकट्ठं अकुसलं कायकम्मं वचीकम्मं मनोकम्मं – अयं वुच्चति ‘‘भवेसना’’.

(ग) तत्थ कतमा ब्रह्मचरियेसना, अन्तग्गाहिका दिट्ठि तदेकट्ठं अकुसलं कायकम्मं वचीकम्मं मनोकम्मं – अयं वुच्चति ‘‘ब्रह्मचरियेसना’’. इमा तिस्सो एसना.