(१७) सीलविपत्ति च दिट्ठिविपत्ति च

९०७. (क) तत्थ कतमा सीलविपत्ति? यो कायिको वीतिक्कमो वाचसिको वीतिक्कमो कायिकवाचसिको वीतिक्कमो – अयं वुच्चति ‘‘सीलविपत्ति’’. सब्बम्पि दुस्सील्यं सीलविपत्ति.

(ख) तत्थ कतमा दिट्ठिविपत्ति? ‘‘नत्थि दिन्नं, नत्थि यिट्ठं…पे… ये इमञ्च लोकं परञ्च लोकं सयं अभिञ्ञा सच्छिकत्वा पवेदेन्ती’’ति – या एवरूपा दिट्ठि दिट्ठिगतं…पे… विपरियासग्गाहो – अयं वुच्चति ‘‘दिट्ठिविपत्ति’’. सब्बापि मिच्छादिट्ठि दिट्ठिविपत्ति.