(४९) सेय्योहमस्मीति मानो

८६६. तत्थ कतमो सेय्योहमस्मीति मानो? इधेकच्चो जातिया वा गोत्तेन वा कोलपुत्तियेन वा वण्णपोक्खरताय वा धनेन वा अज्झेनेन वा कम्मायतनेन वा सिप्पायतनेन वा विज्जाट्ठानेन [विज्जट्ठानेन (स्या.)] वा सुतेन वा पटिभानेन वा अञ्ञतरञ्ञतरेन वत्थुना मानं जप्पेति, यो एवरूपो मानो मञ्ञना मञ्ञितत्तं उन्नति उन्नामो धजो सम्पग्गाहो केतुकम्यता चित्तस्स – अयं वुच्चति ‘‘सेय्योहमस्मीति मानो’’.