(३४) पापिच्छता

८५१. तत्थ कतमा पापिच्छता? इधेकच्चो अस्सद्धो समानो ‘‘सद्धोति मं जनो जानातू’’ति इच्छति, दुस्सीलो समानो ‘‘सीलवाति मं जनो जानातू’’ति इच्छति, अप्पस्सुतो समानो ‘‘बहुस्सुतोति मं जनो जानातू’’ति इच्छति, सङ्गणिकारामो समानो ‘‘पविवित्तोति मं जनो जानातू’’ति इच्छति, कुसीतो समानो ‘‘आरद्धवीरियोति मं जनो जानातू’’ति इच्छति, मुट्ठस्सती समानो ‘‘उपट्ठितस्सतीति मं जनो जानातू’’ति इच्छति, असमाहितो समानो ‘‘समाहितोति मं जनो जानातू’’ति इच्छति, दुप्पञ्ञो समानो ‘‘पञ्ञवाति मं जनो जानातू’’ति इच्छति, अखीणासवो समानो ‘‘खीणासवोति मं जनो जानातू’’ति इच्छति – या एवरूपा इच्छा इच्छागता पापिच्छता रागो सारागो चित्तस्स सारागो – अयं वुच्चति ‘‘पापिच्छता’’.