५०-५४. परामासादिदुकानि

४८. नोपरामासं धम्मं पटिच्च नोपरामासो धम्मो उप्पज्जति हेतुपच्चया. (संखित्तं.)

४९. नपरामट्ठं धम्मं पटिच्च नपरामट्ठो धम्मो उप्पज्जति हेतुपच्चया. (संखित्तं.)

५०. नपरामाससम्पयुत्तं धम्मं पटिच्च नपरामाससम्पयुत्तो धम्मो उप्पज्जति हेतुपच्चया.

५१. नपरामासञ्चेव नअपरामट्ठञ्च धम्मं पटिच्च नपरामासो चेव नअपरामट्ठो च धम्मो उप्पज्जति हेतुपच्चया. नपरामासञ्चेव नअपरामट्ठञ्च धम्मं पटिच्च नअपरामट्ठो चेव ननो च परामासो धम्मो उप्पज्जति हेतुपच्चया. नपरामासञ्चेव नअपरामट्ठञ्च धम्मं पटिच्च नपरामासो चेव नअपरामट्ठो च नअपरामट्ठो चेव ननोपरामासो च धम्मा उप्पज्जन्ति हेतुपच्चया. (३)

नअपरामट्ठञ्चेव ननो च परामासं धम्मं पटिच्च नपरामासो चेव नअपरामट्ठो च धम्मो उप्पज्जति हेतुपच्चया. (१)

नपरामासञ्चेव नअपरामट्ठञ्च नअपरामट्ठञ्चेव ननो च परामासञ्च धम्मं पटिच्च नपरामासो चेव नअपरामट्ठो च धम्मो उप्पज्जति हेतुपच्चया. (१) (संखित्तं.)

५२. परामासविप्पयुत्तं नपरामट्ठं धम्मं पटिच्च परामासविप्पयुत्तो नपरामट्ठो धम्मो उप्पज्जति हेतुपच्चया. परामासविप्पयुत्तं नपरामट्ठं धम्मं पटिच्च परामासविप्पयुत्तो नअपरामट्ठो धम्मो उप्पज्जति हेतुपच्चया. परामासविप्पयुत्तं नपरामट्ठं धम्मं पटिच्च परामासविप्पयुत्तो नपरामट्ठो च परामासविप्पयुत्तो नअपरामट्ठो च धम्मा उप्पज्जन्ति हेतुपच्चया. (३)

परामासविप्पयुत्तं नअपरामट्ठं धम्मं पटिच्च परामासविप्पयुत्तो नअपरामट्ठो धम्मो उप्पज्जति हेतुपच्चया. (१)

परामासविप्पयुत्तं नपरामट्ठञ्च परामासविप्पयुत्तं नअपरामट्ठञ्च धम्मं पटिच्च परामासविप्पयुत्तो नअपरामट्ठो धम्मो उप्पज्जति हेतुपच्चया. (१)

हेतुया पञ्च, आरम्मणे द्वे…पे…. अविगते पञ्च.

परामासगोच्छकं निट्ठितं.