१-७. पटिच्चवारादि

२१. नसप्पटिघं धम्मं पटिच्च नसप्पटिघो धम्मो उप्पज्जति हेतुपच्चया. नसप्पटिघं धम्मं पटिच्च नअप्पटिघो धम्मो उप्पज्जति हेतुपच्चया. नसप्पटिघं धम्मं पटिच्च नसप्पटिघो च नअप्पटिघो च धम्मा उप्पज्जन्ति हेतुपच्चया. (३)

नअप्पटिघं धम्मं पटिच्च नअप्पटिघो धम्मो उप्पज्जति हेतुपच्चया… तीणि.

नसप्पटिघञ्च नअप्पटिघञ्च धम्मं पटिच्च नसप्पटिघो धम्मो उप्पज्जति हेतुपच्चया… तीणि. (संखित्तं.)

हेतुया नव, आरम्मणे एकं.

(सहजातवारम्पि…पे… सम्पयुत्तवारम्पि पटिच्चवारसदिसं.)

२२. नसप्पटिघो धम्मो नसप्पटिघस्स धम्मस्स हेतुपच्चयेन पच्चयो. नसप्पटिघो धम्मो नअप्पटिघस्स धम्मस्स हेतुपच्चयेन पच्चयो. नसप्पटिघो धम्मो नसप्पटिघस्स च नअप्पटिघस्स च धम्मस्स हेतुपच्चयेन पच्चयो. (३)

नसप्पटिघो धम्मो नसप्पटिघस्स धम्मस्स आरम्मणपच्चयेन पच्चयो. नअप्पटिघो धम्मो नसप्पटिघस्स धम्मस्स आरम्मणपच्चयेन पच्चयो. (२) (संखित्तं.)

२३. हेतुया तीणि, आरम्मणे द्वे, अधिपतिया चत्तारि…पे… अविगते नव.