१-७. पटिच्चवारादि
हेतुपच्चयो
१०३. नेवसेक्खनासेक्खं सरणं धम्मं पटिच्च नेवसेक्खनासेक्खो सरणो धम्मो उप्पज्जति हेतुपच्चया (संखित्तं).
हेतुया एकं…पे… अविगते एकं (संखित्तं).
(सहजातवारेपि…पे… पञ्हावारेपि सब्बत्थ एकं.)
१०४. सेक्खं अरणं धम्मं पटिच्च सेक्खो अरणो धम्मो उप्पज्जति हेतुपच्चया. सेक्खं अरणं धम्मं पटिच्च नेवसेक्खनासेक्खो अरणो धम्मो उप्पज्जति हेतुपच्चया. सेक्खं अरणं धम्मं पटिच्च सेक्खो अरणो च नेवसेक्खनासेक्खो अरणो च धम्मा उप्पज्जन्ति हेतुपच्चया. (३)
असेक्खं अरणं धम्मं पटिच्च असेक्खो अरणो धम्मो उप्पज्जति हेतुपच्चया… तीणि.
नेवसेक्खनासेक्खं अरणं धम्मं पटिच्च नेवसेक्खनासेक्खो अरणो धम्मो उप्पज्जति हेतुपच्चया. (१)
सेक्खं अरणञ्च नेवसेक्खनासेक्खं अरणञ्च धम्मं…पे… हेतुपच्चया.
असेक्खं अरणञ्च नेवसेक्खनासेक्खं अरणञ्च धम्मं पटिच्च नेवसेक्खनासेक्खो अरणो धम्मो उप्पज्जति हेतुपच्चया. (१) (संखित्तं.)
१०५. हेतुया नव, आरम्मणे तीणि…पे… अविगते नव.
(संखित्तं. सहजातवारम्पि…पे… सम्पयुत्तवारम्पि पटिच्चवारसदिसं.)
१०६. सेक्खो अरणो धम्मो सेक्खस्स अरणस्स धम्मस्स हेतुपच्चयेन पच्चयो… तीणि.
असेक्खो अरणो धम्मो असेक्खस्स अरणस्स धम्मस्स हेतुपच्चयेन पच्चयो… तीणि.
नेवसेक्खनासेक्खो अरणो धम्मो नेवसेक्खनासेक्खस्स अरणस्स धम्मस्स हेतुपच्चयेन पच्चयो. (१) (संखित्तं.)
१०७. हेतुया सत्त, आरम्मणे पञ्च, अधिपतिया नव, अनन्तरे अट्ठ…पे… अविगते तेरस (संखित्तं).
(यथा कुसलत्तिके पञ्हावारं, एवं वित्थारेतब्बं.)