१-७. पटिच्चवारादि
पच्चयचतुक्कं
हेतुपच्चयो
२५३. कुसलं हेतुसम्पयुत्तं धम्मं पटिच्च कुसलो हेतुसम्पयुत्तो धम्मो उप्पज्जति हेतुपच्चया. (१)
अकुसलं हेतुसम्पयुत्तं धम्मं पटिच्च अकुसलो हेतुसम्पयुत्तो धम्मो उप्पज्जति हेतुपच्चया. (१)
अब्याकतं हेतुसम्पयुत्तं धम्मं पटिच्च अब्याकतो हेतुसम्पयुत्तो धम्मो उप्पज्जति हेतुपच्चया. (१) (संखित्तं.)
२५४. हेतुया तीणि, आरम्मणे तीणि…पे… अविगते तीणि (संखित्तं).
नअधिपतिया तीणि…पे… नविप्पयुत्ते तीणि (संखित्तं).
(सहजातवारम्पि…पे… सम्पयुत्तवारम्पि पटिच्चवारसदिसं.)
हेतु-आरम्मणपच्चया
२५५. कुसलो हेतुसम्पयुत्तो धम्मो कुसलस्स हेतुसम्पयुत्तस्स धम्मस्स हेतुपच्चयेन पच्चयो. (१)
अकुसलो हेतुसम्पयुत्तो धम्मो अकुसलस्स हेतुसम्पयुत्तस्स धम्मस्स हेतुपच्चयेन पच्चयो. (१)
अब्याकतो हेतुसम्पयुत्तो धम्मो अब्याकतस्स हेतुसम्पयुत्तस्स धम्मस्स हेतुपच्चयेन पच्चयो. (१)
कुसलो हेतुसम्पयुत्तो धम्मो कुसलस्स हेतुसम्पयुत्तस्स धम्मस्स आरम्मणपच्चयेन पच्चयो… तीणि.
अकुसलो हेतुसम्पयुत्तो धम्मो अकुसलस्स हेतुसम्पयुत्तस्स धम्मस्स आरम्मणपच्चयेन पच्चयो… तीणि.
अब्याकतो हेतुसम्पयुत्तो धम्मो अब्याकतस्स हेतुसम्पयुत्तस्स धम्मस्स आरम्मणपच्चयेन पच्चयो… तीणि (संखित्तं).
२५६. हेतुया तीणि, आरम्मणे नव, अधिपतिया सत्त, अनन्तरे पञ्च, समनन्तरे पञ्च, सहजाते तीणि, उपनिस्सये नव…पे… अविगते तीणि (संखित्तं).
नहेतुया नव, नआरम्मणे नव (संखित्तं).
हेतुपच्चया नआरम्मणे तीणि (संखित्तं).
नहेतुपच्चया आरम्मणे नव (संखित्तं).
(यथा कुसलत्तिके पञ्हावारं, एवं वित्थारेतब्बं.)