१-१. कुसलत्तिक-हेतुदुकं

१. हेतुपदं

१-६. पटिच्चवारादि

पच्चयचतुक्कं

हेतु-आरम्मणपच्चया

१. कुसलं हेतुं धम्मं पटिच्च कुसलो हेतु धम्मो उप्पज्जति हेतुपच्चया.

अकुसलं हेतुं धम्मं पटिच्च अकुसलो हेतु धम्मो उप्पज्जति हेतुपच्चया. (१)

अब्याकतं हेतुं धम्मं पटिच्च अब्याकतो हेतु धम्मो उप्पज्जति हेतुपच्चया. (१)

२. कुसलं हेतुं धम्मं पटिच्च कुसलो हेतु धम्मो उप्पज्जति आरम्मणपच्चया. (१)

अकुसलं हेतुं धम्मं पटिच्च अकुसलो हेतु धम्मो उप्पज्जति आरम्मणपच्चया. (१)

अब्याकतं हेतुं धम्मं पटिच्च अब्याकतो हेतु धम्मो उप्पज्जति आरम्मणपच्चया. (१) (संखित्तं.)

३. हेतुया तीणि, आरम्मणे तीणि, अधिपतिया तीणि, अनन्तरे तीणि, समनन्तरे तीणि, सहजाते तीणि, अञ्ञमञ्ञे तीणि, निस्सये तीणि, उपनिस्सये तीणि, पुरेजाते तीणि, आसेवने तीणि, कम्मे तीणि, विपाके एकं, आहारे तीणि…पे… अविगते तीणि (संखित्तं).

पच्चनीयं –नअधिपतिपच्चयो

४. कुसलं हेतुं धम्मं पटिच्च कुसलो हेतु धम्मो उप्पज्जति नअधिपतिपच्चया. (१)

अकुसलं हेतुं धम्मं पटिच्च अकुसलो हेतु धम्मो उप्पज्जति नअधिपतिपच्चया. (१)

अब्याकतं हेतुं धम्मं पटिच्च अब्याकतो हेतु धम्मो उप्पज्जति नअधिपतिपच्चया. (१) (संखित्तं.)

५. नअधिपतिया तीणि, नपुरेजाते तीणि, नपच्छाजाते तीणि, नआसेवने तीणि, नविपाके तीणि, नविप्पयुत्ते तीणि (संखित्तं).

हेतुपच्चया नअधिपतिया तीणि (संखित्तं).

नअधिपतिपच्चया हेतुया तीणि (संखित्तं).

(सहजातवारेपि पच्चयवारेपि निस्सयवारेपि संसट्ठवारेपि सम्पयुत्तवारेपि सब्बत्थ तीणि.)

७. पञ्हावारो

पच्चयचतुक्कं

हेतुआरम्मणपच्चयादि

६. कुसलो हेतु धम्मो कुसलस्स हेतुस्स धम्मस्स हेतुपच्चयेन पच्चयो. (१)

अकुसलो हेतु धम्मो अकुसलस्स हेतुस्स धम्मस्स हेतुपच्चयेन पच्चयो. (१)

अब्याकतो हेतु धम्मो अब्याकतस्स हेतुस्स धम्मस्स हेतुपच्चयेन पच्चयो. (१)

७. कुसलो हेतु धम्मो कुसलस्स हेतुस्स धम्मस्स आरम्मणपच्चयेन पच्चयो. कुसलो हेतु धम्मो अकुसलस्स हेतुस्स धम्मस्स आरम्मणपच्चयेन पच्चयो. कुसलो हेतु धम्मो अब्याकतस्स हेतुस्स धम्मस्स आरम्मणपच्चयेन पच्चयो. (३)

अकुसलो हेतु धम्मो अकुसलस्स हेतुस्स धम्मस्स आरम्मणपच्चयेन पच्चयो… तीणि.

अब्याकतो हेतु धम्मो अब्याकतस्स हेतुस्स धम्मस्स आरम्मणपच्चयेन पच्चयो… तीणि.

८. कुसलो हेतु धम्मो कुसलस्स हेतुस्स धम्मस्स अधिपतिपच्चयेन पच्चयो. कुसलो हेतु धम्मो अकुसलस्स हेतुस्स धम्मस्स अधिपतिपच्चयेन पच्चयो. कुसलो हेतु धम्मो अब्याकतस्स हेतुस्स धम्मस्स अधिपतिपच्चयेन पच्चयो… तीणि.

अकुसलो हेतु धम्मो अकुसलस्स हेतुस्स धम्मस्स अधिपतिपच्चयेन पच्चयो. (१)

अब्याकतो हेतु धम्मो अब्याकतस्स हेतुस्स धम्मस्स अधिपतिपच्चयेन पच्चयो. अब्याकतो हेतु धम्मो कुसलस्स हेतुस्स धम्मस्स अधिपतिपच्चयेन पच्चयो. अब्याकतो हेतु धम्मो अकुसलस्स हेतुस्स धम्मस्स अधिपतिपच्चयेन पच्चयो… तीणि.

अनन्तरपच्चयादि

९. कुसलो हेतु धम्मो कुसलस्स हेतुस्स धम्मस्स अनन्तरपच्चयेन पच्चयो… द्वे.

अकुसलो हेतु धम्मो अकुसलस्स हेतुस्स धम्मस्स अनन्तरपच्चयेन पच्चयो… द्वे.

अब्याकतो हेतु धम्मो अब्याकतस्स हेतुस्स धम्मस्स अनन्तरपच्चयेन पच्चयो (१)

१०. कुसलो हेतु धम्मो कुसलस्स हेतुस्स धम्मस्स सहजातपच्चयेन पच्चयो. (१)

अकुसलो हेतु धम्मो अकुसलस्स हेतुस्स धम्मस्स सहजातपच्चयेन पच्चयो. (१)

अब्याकतो हेतु धम्मो अब्याकतस्स हेतुस्स धम्मस्स सहजातपच्चयेन पच्चयो. (१)

(अञ्ञमञ्ञनिस्सयपच्चया सहजातपच्चयसदिसा).

उपनिस्सयपच्चयादि

११. कुसलो हेतु धम्मो कुसलस्स हेतुस्स धम्मस्स उपनिस्सयपच्चयेन पच्चयो. कुसलो हेतु धम्मो अकुसलस्स हेतुस्स धम्मस्स उपनिस्सयपच्चयेन पच्चयो. कुसलो हेतु धम्मो अब्याकतस्स हेतुस्स धम्मस्स उपनिस्सयपच्चयेन पच्चयो. (३)

अकुसलो हेतु धम्मो अकुसलस्स हेतुस्स धम्मस्स उपनिस्सयपच्चयेन पच्चयो. अकुसलो हेतु धम्मो कुसलस्स हेतुस्स धम्मस्स उपनिस्सयपच्चयेन पच्चयो. अकुसलो हेतु धम्मो अब्याकतस्स हेतुस्स धम्मस्स उपनिस्सयपच्चयेन पच्चयो… तीणि. (३)

अब्याकतो हेतु धम्मो अब्याकतस्स हेतुस्स धम्मस्स उपनिस्सयपच्चयेन पच्चयो. अब्याकतो हेतु धम्मो कुसलस्स हेतुस्स धम्मस्स उपनिस्सयपच्चयेन पच्चयो. अब्याकतो हेतु धम्मो अकुसलस्स हेतुस्स धम्मस्स उपनिस्सयपच्चयेन पच्चयो. (३)

अब्याकतो हेतु धम्मो अब्याकतस्स हेतुस्स धम्मस्स विपाकपच्चयेन पच्चयो. (१) (संखित्तं.)

१२. हेतुया तीणि, आरम्मणे नव, अधिपतिया सत्त, अनन्तरे पञ्च, समनन्तरे पञ्च, सहजाते तीणि, अञ्ञमञ्ञे तीणि, निस्सये तीणि, उपनिस्सये नव, आसेवने तीणि, विपाके एकं, इन्द्रिये द्वे, मग्गे द्वे, सम्पयुत्ते तीणि, अत्थिया तीणि, नत्थिया पञ्च, विगते पञ्च, अविगते तीणि (संखित्तं).

पच्चनीयुद्धारो

१३. कुसलो हेतु धम्मो कुसलस्स हेतुस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. कुसलो हेतु धम्मो अकुसलस्स हेतुस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो. कुसलो हेतु धम्मो अब्याकतस्स हेतुस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो. (३)

अकुसलो हेतु धम्मो अकुसलस्स हेतुस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो. अकुसलो हेतु धम्मो कुसलस्स हेतुस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो. अकुसलो हेतु धम्मो अब्याकतस्स हेतुस्स धम्मस्स आरम्मणपच्चयेन पच्चयो… उपनिस्सयपच्चयेन पच्चयो. (३)

अब्याकतो हेतु धम्मो अब्याकतस्स हेतुस्स धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो (संखित्तं).

१४. नहेतुया नव, नआरम्मणे नव (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारस्स अनुलोमम्पि पच्चनीयम्पि अनुलोमपच्चनीयम्पि पच्चनीयानुलोमम्पि गणितं, एवं गणेतब्बं.)

२. नहेतुपदं

१-६. पटिच्चवारादि

पच्चयचतुक्कं

हेतु-आरम्मणपच्चया

१५. कुसलं नहेतुं धम्मं पटिच्च कुसलो नहेतु धम्मो उप्पज्जति हेतुपच्चया. कुसलं नहेतुं धम्मं पटिच्च अब्याकतो नहेतु धम्मो उप्पज्जति हेतुपच्चया. कुसलं नहेतुं धम्मं पटिच्च कुसलो नहेतु च अब्याकतो नहेतु च धम्मा उप्पज्जन्ति हेतुपच्चया. (३)

अकुसलं नहेतुं धम्मं पटिच्च अकुसलो नहेतु धम्मो उप्पज्जति हेतुपच्चया. अकुसलं नहेतुं धम्मं पटिच्च अब्याकतो नहेतु धम्मो उप्पज्जति हेतुपच्चया. अकुसलं नहेतुं धम्मं पटिच्च अकुसलो नहेतु च अब्याकतो नहेतु च धम्मा उप्पज्जन्ति हेतुपच्चया. (३)

अब्याकतं नहेतुं धम्मं पटिच्च अब्याकतो नहेतु धम्मो उप्पज्जति हेतुपच्चया. (१)

कुसलं नहेतुञ्च अब्याकतं नहेतुञ्च धम्मं पटिच्च अब्याकतो नहेतु धम्मो उप्पज्जति हेतुपच्चया. (१)

अकुसलं नहेतुञ्च अब्याकतं नहेतुञ्च धम्मं पटिच्च अब्याकतो नहेतु धम्मो उप्पज्जति हेतुपच्चया. (१)

१६. कुसलं नहेतुं धम्मं पटिच्च कुसलो नहेतु धम्मो उप्पज्जति आरम्मणपच्चया. (१)

अकुसलं नहेतुं धम्मं पटिच्च अकुसलो नहेतु धम्मो उप्पज्जति आरम्मणपच्चया. (१)

अब्याकतं नहेतुं धम्मं पटिच्च अब्याकतो नहेतु धम्मो उप्पज्जति आरम्मणपच्चया (१) (संखित्तं.)

१७. हेतुया नव, आरम्मणे तीणि, अधिपतिया नव, अनन्तरे तीणि, समनन्तरे तीणि, सहजाते नव, अञ्ञमञ्ञे तीणि, निस्सये नव, उपनिस्सये तीणि, पुरेजाते तीणि, आसेवने तीणि, कम्मे नव, विपाके एकं, आहारे नव, इन्द्रिये नव, झाने नव, मग्गे नव, सम्पयुत्ते तीणि, विप्पयुत्ते नव, अत्थिया नव, नत्थिया तीणि, विगते तीणि, अविगते नव (संखित्तं).

नहेतुनआरम्मणपच्चयादि

१८. अब्याकतं नहेतुं धम्मं पटिच्च अब्याकतो नहेतु धम्मो उप्पज्जति नहेतुपच्चया. (१)

कुसलं नहेतुं धम्मं पटिच्च अब्याकतो नहेतु धम्मो उप्पज्जति नआरम्मणपच्चया. (१)

अकुसलं नहेतुं धम्मं पटिच्च अब्याकतो नहेतु धम्मो उप्पज्जति नआरम्मणपच्चया. (१)

अब्याकतं नहेतुं धम्मं पटिच्च अब्याकतो नहेतु धम्मो उप्पज्जति नआरम्मणपच्चया. (१)

कुसलं नहेतुञ्च अब्याकतं नहेतुञ्च धम्मं पटिच्च अब्याकतो नहेतु धम्मो उप्पज्जति नआरम्मणपच्चया. (१)

अकुसलं नहेतुञ्च अब्याकतं नहेतुञ्च धम्मं पटिच्च अब्याकतो नहेतु धम्मो उप्पज्जति नआरम्मणपच्चया. (१) (संखित्तं.)

१९. नहेतुया एकं, नआरम्मणे पञ्च, नअधिपतिया नव, नअनन्तरे पञ्च, नसमनन्तरे पञ्च, नअञ्ञमञ्ञे पञ्च, नउपनिस्सये पञ्च, नपुरेजाते सत्त, नपच्छाजाते नव, नआसेवने नव, नकम्मे तीणि, नविपाके नव, नआहारे एकं, नइन्द्रिये एकं, नझाने एकं, नमग्गे एकं, नसम्पयुत्ते पञ्च, नविप्पयुत्ते तीणि, नोनत्थिया पञ्च, नोविगते पञ्च (संखित्तं).

हेतुपच्चया नआरम्मणे पञ्च (संखित्तं).

नहेतुपच्चया आरम्मणे एकं (संखित्तं).

(सहजातवारम्पि पच्चयवारम्पि निस्सयवारम्पि संसट्ठवारम्पि सम्पयुत्तवारम्पि पटिच्चवारसदिसा वित्थारेतब्बा.)

७. पञ्हावारो

पच्चयचतुक्कं

आरम्मणपच्चयादि

२०. कुसलो नहेतु धम्मो कुसलस्स नहेतुस्स धम्मस्स आरम्मणपच्चयेन पच्चयो. कुसलो नहेतु धम्मो अकुसलस्स नहेतुस्स धम्मस्स आरम्मणपच्चयेन पच्चयो. कुसलो नहेतु धम्मो अब्याकतस्स नहेतुस्स धम्मस्स आरम्मणपच्चयेन पच्चयो. (३)

अकुसलो नहेतु धम्मो अकुसलस्स नहेतुस्स धम्मस्स आरम्मणपच्चयेन पच्चयो. अकुसलो नहेतु धम्मो कुसलस्स नहेतुस्स धम्मस्स आरम्मणपच्चयेन पच्चयो. अकुसलो नहेतु धम्मो अब्याकतस्स नहेतुस्स धम्मस्स आरम्मणपच्चयेन पच्चयो. (३)

अब्याकतो नहेतु धम्मो अब्याकतस्स नहेतुस्स धम्मस्स आरम्मणपच्चयेन पच्चयो. अब्याकतो नहेतु धम्मो कुसलस्स नहेतुस्स धम्मस्स आरम्मणपच्चयेन पच्चयो. अब्याकतो नहेतु धम्मो अकुसलस्स नहेतुस्स धम्मस्स आरम्मणपच्चयेन पच्चयो. (३)

२१. कुसलो नहेतु धम्मो कुसलस्स नहेतुस्स धम्मस्स अधिपतिपच्चयेन पच्चयो. कुसलो नहेतु धम्मो अकुसलस्स नहेतुस्स धम्मस्स अधिपतिपच्चयेन पच्चयो. कुसलो नहेतु धम्मो अब्याकतस्स नहेतुस्स धम्मस्स अधिपतिपच्चयेन पच्चयो. कुसलो नहेतु धम्मो कुसलस्स नहेतुस्स च अब्याकतस्स नहेतुस्स च धम्मस्स अधिपतिपच्चयेन पच्चयो… चत्तारि.

अकुसलो नहेतु धम्मो अकुसलस्स नहेतुस्स धम्मस्स अधिपतिपच्चयेन पच्चयो… तीणि.

अब्याकतो नहेतु धम्मो अब्याकतस्स नहेतुस्स धम्मस्स अधिपतिपच्चयेन पच्चयो. अब्याकतो नहेतु धम्मो कुसलस्स नहेतुस्स धम्मस्स अधिपतिपच्चयेन पच्चयो… तीणि.

२२. कुसलो नहेतु धम्मो कुसलस्स नहेतुस्स धम्मस्स अनन्तरपच्चयेन पच्चयो. कुसलो नहेतु धम्मो अब्याकतस्स नहेतुस्स धम्मस्स अनन्तरपच्चयेन पच्चयो. (२)

अकुसलो नहेतु धम्मो अकुसलस्स नहेतुस्स धम्मस्स अनन्तरपच्चयेन पच्चयो. अकुसलो नहेतु धम्मो अब्याकतस्स नहेतुस्स धम्मस्स अनन्तरपच्चयेन पच्चयो. (२)

अब्याकतो नहेतु धम्मो अब्याकतस्स नहेतुस्स धम्मस्स अनन्तरपच्चयेन पच्चयो… तीणि…पे….

उपनिस्सयपच्चयो

२३. कुसलो नहेतु धम्मो कुसलस्स नहेतुस्स धम्मस्स उपनिस्सयपच्चयेन पच्चयो. कुसलो नहेतु धम्मो अकुसलस्स नहेतुस्स धम्मस्स उपनिस्सयपच्चयेन पच्चयो. कुसलो नहेतु धम्मो अब्याकतस्स नहेतुस्स धम्मस्स उपनिस्सयपच्चयेन पच्चयो. (३)

अकुसलो नहेतु धम्मो अकुसलस्स नहेतुस्स धम्मस्स उपनिस्सयपच्चयेन पच्चयो. अकुसलो नहेतु धम्मो कुसलस्स नहेतुस्स धम्मस्स उपनिस्सयपच्चयेन पच्चयो. अकुसलो नहेतु धम्मो अब्याकतस्स नहेतुस्स धम्मस्स उपनिस्सयपच्चयेन पच्चयो. (३)

अब्याकतो नहेतु धम्मो अब्याकतस्स नहेतुस्स धम्मस्स उपनिस्सयपच्चयेन पच्चयो. अब्याकतो नहेतु धम्मो कुसलस्स नहेतुस्स धम्मस्स उपनिस्सयपच्चयेन पच्चयो. अब्याकतो नहेतु धम्मो अकुसलस्स नहेतुस्स धम्मस्स उपनिस्सयपच्चयेन पच्चयो. (३) (संखित्तं.)

२४. आरम्मणे नव, अधिपतिया दस, अनन्तरे सत्त, समनन्तरे सत्त, सहजाते नव, अञ्ञमञ्ञे तीणि, निस्सये तेरस, उपनिस्सये नव, पुरेजाते तीणि, पच्छाजाते तीणि, आसेवने तीणि, कम्मे सत्त, विपाके एकं, आहारे सत्त, इन्द्रिये सत्त, झाने सत्त, मग्गे सत्त, सम्पयुत्ते तीणि, विप्पयुत्ते पञ्च, अत्थिया तेरस, नत्थिया सत्त, विगते सत्त, अविगते तेरस (संखित्तं).

नहेतुया पन्नरस, नआरम्मणे पन्नरस (संखित्तं).

आरम्मणपच्चया नहेतुया नव (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारं, एवं वित्थारेतब्बं.)

२-१. वेदनात्तिक-हेतुदुकं

१-६. पटिच्चवारादि

पच्चयचतुक्कं

२५. सुखाय वेदनाय सम्पयुत्तं हेतुं धम्मं पटिच्च सुखाय वेदनाय सम्पयुत्तो हेतु धम्मो उप्पज्जति हेतुपच्चया. (१)

दुक्खाय वेदनाय सम्पयुत्तं हेतुं धम्मं पटिच्च दुक्खाय वेदनाय सम्पयुत्तो हेतु धम्मो उप्पज्जति हेतुपच्चया. (१)

अदुक्खमसुखाय वेदनाय सम्पयुत्तं हेतुं धम्मं पटिच्च अदुक्खमसुखाय वेदनाय सम्पयुत्तो हेतु धम्मो उप्पज्जति हेतुपच्चया. (१) (संखित्तं.)

२६. हेतुया तीणि, आरम्मणे तीणि, अधिपतिया तीणि…पे… विपाके द्वे…पे… अविगते तीणि (संखित्तं).

नअधिपतिया तीणि, नपुरेजाते द्वे, नपच्छाजाते तीणि, नआसेवने तीणि, नविपाके तीणि, नविप्पयुत्ते द्वे (संखित्तं).

हेतुपच्चया नअधिपतिया तीणि (संखित्तं).

नअधिपतिपच्चया हेतुया तीणि (संखित्तं).

(सहजातवारम्पि…पे… सम्पयुत्तवारम्पि वित्थारेतब्बं.)

हेतु-आरम्मणपच्चया

२७. सुखाय वेदनाय सम्पयुत्तो हेतु धम्मो सुखाय वेदनाय सम्पयुत्तस्स हेतुस्स धम्मस्स हेतुपच्चयेन पच्चयो. (१)

दुक्खाय वेदनाय सम्पयुत्तो हेतु धम्मो दुक्खाय वेदनाय सम्पयुत्तस्स हेतुस्स धम्मस्स हेतुपच्चयेन पच्चयो. (१)

अदुक्खमसुखाय वेदनाय सम्पयुत्तो हेतु धम्मो अदुक्खमसुखाय वेदनाय सम्पयुत्तस्स हेतुस्स धम्मस्स हेतुपच्चयेन पच्चयो. (१)

२८. सुखाय वेदनाय सम्पयुत्तो हेतु धम्मो सुखाय वेदनाय सम्पयुत्तस्स हेतुस्स धम्मस्स आरम्मणपच्चयेन पच्चयो… तीणि.

दुक्खाय वेदनाय सम्पयुत्तो हेतु धम्मो दुक्खाय वेदनाय सम्पयुत्तस्स हेतुस्स धम्मस्स आरम्मणपच्चयेन पच्चयो… तीणि.

अदुक्खमसुखाय वेदनाय सम्पयुत्तो हेतु धम्मो अदुक्खमसुखाय वेदनाय सम्पयुत्तस्स हेतुस्स धम्मस्स आरम्मणपच्चयेन पच्चयो… तीणि (संखित्तं).

२९. हेतुया तीणि, आरम्मणे नव, अधिपतिया चत्तारि, अनन्तरे छ, समनन्तरे छ, सहजाते तीणि, अञ्ञमञ्ञे तीणि, निस्सये तीणि, उपनिस्सये नव, आसेवने तीणि, विपाके द्वे, इन्द्रिये द्वे, मग्गे द्वे, सम्पयुत्ते तीणि, अत्थिया तीणि, नत्थिया छ, विगते छ, अविगते तीणि (संखित्तं).

नहेतुया नव, नआरम्मणे नव (संखित्तं).

हेतुपच्चया नआरम्मणे तीणि (संखित्तं).

नहेतुपच्चया आरम्मणे नव (संखित्तं).

(यथा कुसलत्तिके पञ्हावारं, एवं वित्थारेतब्बं.)

१-६. पटिच्चवारादि

पच्चयचतुक्कं

३०. सुखाय वेदनाय सम्पयुत्तं नहेतुं धम्मं पटिच्च सुखाय वेदनाय सम्पयुत्तो नहेतु धम्मो उप्पज्जति हेतुपच्चया. (१)

दुक्खाय वेदनाय सम्पयुत्तं नहेतुं धम्मं पटिच्च दुक्खाय वेदनाय सम्पयुत्तो नहेतु धम्मो उप्पज्जति हेतुपच्चया. (१)

अदुक्खमसुखाय वेदनाय सम्पयुत्तं नहेतुं धम्मं पटिच्च अदुक्खमसुखाय वेदनाय सम्पयुत्तो नहेतु धम्मो उप्पज्जति हेतुपच्चया. (१) (संखित्तं.)

३१. हेतुया तीणि, आरम्मणे तीणि…पे… अविगते तीणि (संखित्तं).

नहेतुया तीणि, नअधिपतिया तीणि, नपुरेजाते द्वे, नपच्छाजाते तीणि, नआसेवने तीणि, नकम्मे तीणि, नविपाके तीणि…पे… नविप्पयुत्ते द्वे (संखित्तं).

(सहजातवारम्पि…पे… सम्पयुत्तवारम्पि वित्थारेतब्बं.)

७. पञ्हावारो

पच्चयचतुक्कं

आरम्मणपच्चयादि

३२. सुखाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. सुखाय वेदनाय सम्पयुत्तो नहेतु धम्मो दुक्खाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. सुखाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. (३)

दुक्खाय वेदनाय सम्पयुत्तो नहेतु धम्मो दुक्खाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. दुक्खाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. दुक्खाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. (३)

अदुक्खमसुखाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. अदुक्खमसुखाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. अदुक्खमसुखाय वेदनाय सम्पयुत्तो नहेतु धम्मो दुक्खाय वेदनाय सम्पयुत्तस्स नहेतुस्स धम्मस्स आरम्मणपच्चयेन पच्चयो. (३)

३३. सुखाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स अधिपतिपच्चयेन पच्चयो. सुखाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स अधिपतिपच्चयेन पच्चयो. (२)

दुक्खाय वेदनाय सम्पयुत्तो नहेतु धम्मो दुक्खाय वेदनाय सम्पयुत्तस्स नहेतुस्स धम्मस्स अधिपतिपच्चयेन पच्चयो. (१)

अदुक्खमसुखाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स अधिपतिपच्चयेन पच्चयो. अदुक्खमसुखाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स अधिपतिपच्चयेन पच्चयो. (२)

अनन्तर-उपनिस्सयपच्चया

३४. सुखाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स अनन्तरपच्चयेन पच्चयो… द्वे.

दुक्खाय वेदनाय सम्पयुत्तो नहेतु धम्मो दुक्खाय वेदनाय सम्पयुत्तस्स नहेतुस्स धम्मस्स अनन्तरपच्चयेन पच्चयो… द्वे.

अदुक्खमसुखाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स अनन्तरपच्चयेन पच्चयो… तीणि…पे….

३५. सुखाय वेदनाय सम्पयुत्तो नहेतु धम्मो सुखाय वेदनाय सम्पयुत्तस्स नहेतुस्स धम्मस्स उपनिस्सयपच्चयेन पच्चयो… तीणि.

दुक्खाय वेदनाय सम्पयुत्तो नहेतु धम्मो दुक्खाय वेदनाय सम्पयुत्तस्स नहेतुस्स धम्मस्स उपनिस्सयपच्चयेन पच्चयो… तीणि.

अदुक्खमसुखाय वेदनाय सम्पयुत्तो नहेतु धम्मो अदुक्खमसुखाय वेदनाय सम्पयुत्तस्स नहेतुस्स धम्मस्स उपनिस्सयपच्चयेन पच्चयो… तीणि (संखित्तं).

३६. आरम्मणे नव, अधिपतिया पञ्च, अनन्तरे सत्त, समनन्तरे सत्त, सहजाते तीणि, अञ्ञमञ्ञे तीणि, निस्सये तीणि, उपनिस्सये नव, आसेवने तीणि, कम्मे अट्ठ, विपाके तीणि, आहारे तीणि, इन्द्रिये तीणि, झाने तीणि, मग्गे तीणि, सम्पयुत्ते तीणि, अत्थिया तीणि, नत्थिया सत्त, विगते सत्त, अविगते तीणि (संखित्तं).

नहेतुया नव, नआरम्मणे नव (संखित्तं).

आरम्मणपच्चया नहेतुया नव (संखित्तं).

नहेतुपच्चया आरम्मणे नव (संखित्तं).