१-६. पटिच्चवारादि

पच्चयचतुक्कं

हेतु-आरम्मणपच्चया

१५३. सेक्खं नहेतुं धम्मं पटिच्च सेक्खो नहेतु धम्मो उप्पज्जति हेतुपच्चया. सेक्खं नहेतुं धम्मं पटिच्च नेवसेक्खनासेक्खो नहेतु धम्मो उप्पज्जति हेतुपच्चया. सेक्खं नहेतुं धम्मं पटिच्च सेक्खो नहेतु च नेवसेक्खनासेक्खो नहेतु च धम्मा उप्पज्जन्ति हेतुपच्चया. (३)

असेक्खं नहेतुं धम्मं पटिच्च असेक्खो नहेतु धम्मो उप्पज्जति हेतुपच्चया… तीणि.

नेवसेक्खनासेक्खं नहेतुं धम्मं पटिच्च नेवसेक्खनासेक्खो नहेतु धम्मो उप्पज्जति हेतुपच्चया. (१)

सेक्खं नहेतुञ्च नेवसेक्खनासेक्खं नहेतुञ्च धम्मं पटिच्च नेवसेक्खनासेक्खो नहेतु धम्मो उप्पज्जति हेतुपच्चया. (१)

असेक्खं नहेतुञ्च नेवसेक्खनासेक्खं नहेतुञ्च धम्मं पटिच्च नेवसेक्खनासेक्खो नहेतु धम्मो उप्पज्जति हेतुपच्चया. (१)

१५४. सेक्खं नहेतुं धम्मं पटिच्च सेक्खो नहेतु धम्मो उप्पज्जति आरम्मणपच्चया. (१)

असेक्खं नहेतुं धम्मं पटिच्च असेक्खो नहेतु धम्मो उप्पज्जति आरम्मणपच्चया. (१)

नेवसेक्खनासेक्खं नहेतुं धम्मं पटिच्च नेवसेक्खनासेक्खो नहेतु धम्मो उप्पज्जति आरम्मणपच्चया. (१) (संखित्तं.)

हेतुया नव, आरम्मणे तीणि, अधिपतिया नव…पे… आसेवने द्वे…पे… अविगते नव (संखित्तं).

पच्चनीयं

नहेतुपच्चयो

१५५. नेवसेक्खनासेक्खं नहेतुं धम्मं पटिच्च नेवसेक्खनासेक्खो नहेतु धम्मो उप्पज्जति नहेतुपच्चया (संखित्तं).

नहेतुया एकं, नआरम्मणे पञ्च, नअधिपतिया तीणि…पे… नोविगते पञ्च (संखित्तं).

हेतुपच्चया नआरम्मणे पञ्च (संखित्तं).

नहेतुपच्चया आरम्मणे एकं (संखित्तं).

(सहजातवारम्पि…पे… सम्पयुत्तवारम्पि पटिच्चवारसदिसं वित्थारेतब्बं.)