१-६. पटिच्चवारादि

पच्चयचतुक्कं

हेतु-आरम्मणपच्चया

११८. दस्सनेन पहातब्बं नहेतुं धम्मं पटिच्च दस्सनेन पहातब्बो नहेतु धम्मो उप्पज्जति हेतुपच्चया. दस्सनेन पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति हेतुपच्चया. दस्सनेन पहातब्बं नहेतुं धम्मं पटिच्च दस्सनेन पहातब्बो नहेतु च नेवदस्सनेन नभावनाय पहातब्बो नहेतु च धम्मा उप्पज्जन्ति हेतुपच्चया… तीणि.

भावनाय पहातब्बं नहेतुं धम्मं पटिच्च भावनाय पहातब्बो नहेतु धम्मो उप्पज्जति हेतुपच्चया. भावनाय पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति हेतुपच्चया. भावनाय पहातब्बं नहेतुं धम्मं पटिच्च भावनाय पहातब्बो नहेतु च नेवदस्सनेन नभावनाय पहातब्बो नहेतु च धम्मा उप्पज्जन्ति हेतुपच्चया… तीणि.

नेवदस्सनेन नभावनाय पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति हेतुपच्चया. (१)

दस्सनेन पहातब्बं नहेतुञ्च नेवदस्सनेन नभावनाय पहातब्बं नहेतुञ्च धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति हेतुपच्चया. (१)

भावनाय पहातब्बं नहेतुञ्च नेवदस्सनेन नभावनाय पहातब्बं नहेतुञ्च धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति हेतुपच्चया. (१)

दस्सनेन पहातब्बं नहेतुं धम्मं पटिच्च दस्सनेन पहातब्बो नहेतु धम्मो उप्पज्जति आरम्मणपच्चया. (१)

भावनाय पहातब्बं नहेतुं धम्मं पटिच्च भावनाय पहातब्बो नहेतु धम्मो उप्पज्जति आरम्मणपच्चया. (१)

नेवदस्सनेन नभावनाय पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति आरम्मणपच्चया (संखित्तं).

११९. हेतुया नव, आरम्मणे तीणि, अधिपतिया नव…पे… अविगते नव (संखित्तं).

नहेतु-नआरम्मणपच्चया

१२०. नेवदस्सनेन नभावनाय पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति नहेतुपच्चया.

दस्सनेन पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति नआरम्मणपच्चया. (१)

भावनाय पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति नआरम्मणपच्चया. (१)

नेवदस्सनेन नभावनाय पहातब्बं नहेतुं धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति नआरम्मणपच्चया. (१)

दस्सनेन पहातब्बं नहेतुञ्च नेवदस्सनेन नभावनाय पहातब्बं नहेतुञ्च धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति नआरम्मणपच्चया. (१)

भावनाय पहातब्बं नहेतुञ्च नेवदस्सनेन नभावनाय पहातब्बं नहेतुञ्च धम्मं पटिच्च नेवदस्सनेन नभावनाय पहातब्बो नहेतु धम्मो उप्पज्जति नआरम्मणपच्चया. (१) (संखित्तं.)

१२१. नहेतुया एकं, नआरम्मणे पञ्च, नअधिपतिया नव…पे… नोविगते पञ्च (संखित्तं).

हेतुपच्चया नआरम्मणे पञ्च (संखित्तं).

नहेतुपच्चया आरम्मणे एकं (संखित्तं).

(सहजातवारम्पि पच्चयवारम्पि निस्सयवारम्पि संसट्ठवारम्पि सम्पयुत्तवारम्पि पटिच्चवारसदिसं वित्थारेतब्बं.)