१. विभङ्गवारो

नहेतुपच्चयो

१०४. रूपिं धम्मं पच्चया रूपी धम्मो उप्पज्जति नहेतुपच्चया – एकं महाभूतं…पे… असञ्ञसत्तानं एकं महाभूतं…पे…. (१)

रूपिं धम्मं पच्चया अरूपी धम्मो उप्पज्जति नहेतुपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका अरूपिनो खन्धा; अहेतुकपटिसन्धिक्खणे…पे… वत्थुं पच्चया विचिकिच्छासहगतो उद्धच्चसहगतो मोहो. (२)

रूपिं धम्मं पच्चया रूपी च अरूपी च धम्मा उप्पज्जन्ति नहेतुपच्चया (पवत्तिपटिसन्धि कातब्बा). (३)

१०५. अरूपिं धम्मं पच्चया अरूपी धम्मो उप्पज्जति नहेतुपच्चया – अहेतुकं अरूपिं एकं खन्धं…पे… पटिसन्धिक्खणे…पे… विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

अरूपिं धम्मं पच्चया रूपी धम्मो उप्पज्जति नहेतुपच्चया – अहेतुके अरूपिनो खन्धे पच्चया चित्तसमुट्ठानं रूपं; पटिसन्धिक्खणे…पे…. (२)

अरूपिं धम्मं पच्चया रूपी च अरूपी च धम्मा उप्पज्जन्ति नहेतुपच्चया – अहेतुकं अरूपिं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

१०६. रूपिञ्च अरूपिञ्च धम्मं पच्चया रूपी धम्मो उप्पज्जति नहेतुपच्चया – अहेतुके अरूपिनो खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (१)

रूपिञ्च अरूपिञ्च धम्मं पच्चया अरूपी धम्मो उप्पज्जति नहेतुपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… द्वे खन्धे…पे… कायविञ्ञाणसहगतं…पे… अरूपिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… पटिसन्धिक्खणे…पे… विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (२)

रूपिञ्च अरूपिञ्च धम्मं पच्चया रूपी च अरूपी च धम्मा उप्पज्जन्ति नहेतुपच्चया – अहेतुकं अरूपिं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… अरूपिनो खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (३)