१. विभङ्गवारो

हेतुपच्चयो

९३. रूपिं धम्मं पटिच्च रूपी धम्मो उप्पज्जति हेतुपच्चया – एकं महाभूतं पटिच्च तयो महाभूता…पे… द्वे महाभूते…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

रूपिं धम्मं पटिच्च अरूपी धम्मो उप्पज्जति हेतुपच्चया – पटिसन्धिक्खणे वत्थुं पटिच्च अरूपिनो खन्धा. (२)

रूपिं धम्मं पटिच्च रूपी च अरूपी च धम्मा उप्पज्जन्ति हेतुपच्चया – पटिसन्धिक्खणे वत्थुं पटिच्च अरूपिनो खन्धा, महाभूते पटिच्च कटत्तारूपं. (३)

९४. अरूपिं धम्मं पटिच्च अरूपी धम्मो उप्पज्जति हेतुपच्चया – अरूपिं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. (१)

अरूपिं धम्मं पटिच्च रूपी धम्मो उप्पज्जति हेतुपच्चया – अरूपिनो खन्धे पटिच्च चित्तसमुट्ठानं रूपं; पटिसन्धिक्खणे…पे…. (२)

अरूपिं धम्मं पटिच्च रूपी च अरूपी च धम्मा उप्पज्जन्ति हेतुपच्चया – अरूपिं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)

९५. रूपिञ्च अरूपिञ्च धम्मं पटिच्च रूपी धम्मो उप्पज्जति हेतुपच्चया – अरूपिनो खन्धे च महाभूते च पटिच्च चित्तसमुट्ठानं रूपं; पटिसन्धिक्खणे…पे…. (१)

रूपिञ्च अरूपिञ्च धम्मं पटिच्च अरूपी धम्मो उप्पज्जति हेतुपच्चया – पटिसन्धिक्खणे अरूपिं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे…. (२)

रूपिञ्च अरूपिञ्च धम्मं पटिच्च रूपी च अरूपी च धम्मा उप्पज्जन्ति हेतुपच्चया – पटिसन्धिक्खणे अरूपिं एकं खन्धञ्च वत्थुञ्च पटिच्च तयो खन्धा…पे… द्वे खन्धे…पे… अरूपिनो खन्धे च महाभूते च पटिच्च कटत्तारूपं (संखित्तं). (३)