१. विभङ्गवारो

हेतुपच्चयो

६५. सप्पटिघं धम्मं पच्चया सप्पटिघो धम्मो उप्पज्जति हेतुपच्चया… तीणि.

अप्पटिघं धम्मं पच्चया अप्पटिघो धम्मो उप्पज्जति हेतुपच्चया – अप्पटिघं एकं खन्धं पच्चया तयो खन्धा अप्पटिघं चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे …पे… आपोधातुं पच्चया अप्पटिघं चित्तसमुट्ठानं रूपं, कटत्तारूपं, उपादारूपं, आपोधातुं पच्चया इत्थिन्द्रियं…पे… कबळीकारो आहारो, वत्थुं पच्चया अप्पटिघा खन्धा. (१)

(अवसेसा पञ्च पञ्हा पटिच्चवारसदिसा.)

आरम्मणपच्चयादि

६६. सप्पटिघं धम्मं पच्चया अप्पटिघो धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. (१)

अप्पटिघं धम्मं पच्चया अप्पटिघो धम्मो उप्पज्जति आरम्मणपच्चया – अप्पटिघं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे… वत्थुं पच्चया अप्पटिघा खन्धा. (१)

सप्पटिघञ्च अप्पटिघञ्च धम्मं पच्चया अप्पटिघो धम्मो उप्पज्जति आरम्मणपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… कायविञ्ञाणसहगतं एकं खन्धञ्च कायायतनञ्च पच्चया तयो खन्धा…पे… अधिपतिपच्चया… (संखित्तं) अविगतपच्चया.