१. विभङ्गवारो

नहेतुपच्चयो

६०. सप्पटिघं धम्मं पटिच्च सप्पटिघो धम्मो उप्पज्जति नहेतुपच्चया… तीणि.

अप्पटिघं धम्मं पटिच्च अप्पटिघो धम्मो उप्पज्जति नहेतुपच्चया – अहेतुकं अप्पटिघं एकं खन्धं पटिच्च तयो खन्धा अप्पटिघं चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, आपोधातुं पटिच्च अप्पटिघं चित्तसमुट्ठानं रूपं, कटत्तारूपं, उपादारूपं, आपोधातुं पटिच्च इत्थिन्द्रियं…पे… कबळीकारो आहारो… बाहिरं… आहारसमुट्ठानं… उतुसमुट्ठानं… असञ्ञसत्तानं… आपोधातुं पटिच्च अप्पटिघं कटत्तारूपं उपादारूपं; विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

(अप्पटिघमूलकं इतरेपि द्वे पञ्हा कातब्बा. घटनेपि तीणि पञ्हा कातब्बा. अज्झत्तिका बाहिरा महाभूता सब्बे जानित्वा कातब्बा.)

नआरम्मणपच्चयादि

६१. सप्पटिघं धम्मं पटिच्च सप्पटिघो धम्मो उप्पज्जति नआरम्मणपच्चया (सब्बं संखित्तं)… नोविगतपच्चया.