१. विभङ्गवारो

हेतुपच्चयो

३४. अनिदस्सनो धम्मो अनिदस्सनस्स धम्मस्स हेतुपच्चयेन पच्चयो – अनिदस्सना हेतू सम्पयुत्तकानं खन्धानं अनिदस्सनानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

अनिदस्सनो धम्मो सनिदस्सनस्स धम्मस्स हेतुपच्चयेन पच्चयो – अनिदस्सना हेतू सनिदस्सनानं चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (२)

अनिदस्सनो धम्मो सनिदस्सनस्स च अनिदस्सनस्स च धम्मस्स हेतुपच्चयेन पच्चयो – अनिदस्सना हेतू सम्पयुत्तकानं खन्धानं सनिदस्सनानञ्च अनिदस्सनानञ्च चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

३५. सनिदस्सनो धम्मो अनिदस्सनस्स धम्मस्स आरम्मणपच्चयेन पच्चयो – सनिदस्सनं रूपं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, रूपायतनं चक्खुविञ्ञाणस्स आरम्मणपच्चयेन पच्चयो; सनिदस्सना खन्धा इद्धिविधञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अनिदस्सनो धम्मो अनिदस्सनस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना वुट्ठहित्वा…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया पहीने किलेसे पच्चवेक्खन्ति, विक्खम्भिते किलेसे…पे… पुब्बे…पे… चक्खुं…पे… कायं… सद्दे…पे… वत्थुं अनिदस्सने खन्धे अनिच्चतो…पे… दोमनस्सं उप्पज्जति; दिब्बाय सोतधातुया सद्दं सुणाति, चेतोपरियञाणेन अनिदस्सनचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… सद्दायतनं सोतविञ्ञाणस्स…पे… फोट्ठब्बायतनं कायविञ्ञाणस्स…पे… अनिदस्सना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अधिपतिपच्चयो

३६. सनिदस्सनो धम्मो अनिदस्सनस्स धम्मस्स अधिपतिपच्चयेन पच्चयो. आरम्मणाधिपति – सनिदस्सनं रूपं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

अनिदस्सनो धम्मो अनिदस्सनस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं…पे… उपोसथकम्मं कत्वा तं गरुं कत्वा पच्चवेक्खति, पुब्बे सुचिण्णानि…पे… झाना वुट्ठहित्वा…पे… अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स अधिपतिपच्चयेन पच्चयो; चक्खुं…पे… वत्थुं अनिदस्सने खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अनिदस्सनाधिपति सम्पयुत्तकानं खन्धानं अनिदस्सनानं चित्तसमुट्ठानानञ्च रूपानं अधिपतिपच्चयेन पच्चयो. (१)

अनिदस्सनो धम्मो सनिदस्सनस्स धम्मस्स अधिपतिपच्चयेन पच्चयो. सहजाताधिपति – अनिदस्सनाधिपति सनिदस्सनानं चित्तसमुट्ठानानं रूपानं अधिपतिपच्चयेन पच्चयो. (२)

अनिदस्सनो धम्मो सनिदस्सनस्स च अनिदस्सनस्स च धम्मस्स अधिपतिपच्चयेन पच्चयो. सहजाताधिपति – अनिदस्सनाधिपति सम्पयुत्तकानं खन्धानं सनिदस्सनानञ्च अनिदस्सनानञ्च चित्तसमुट्ठानानञ्च रूपानं अधिपतिपच्चयेन पच्चयो. (३)

अनन्तरपच्चयो

३७. अनिदस्सनो धम्मो अनिदस्सनस्स धम्मस्स अनन्तरपच्चयेन पच्चयो – पुरिमा पुरिमा अनिदस्सना खन्धा पच्छिमानं पच्छिमानं अनिदस्सनानं खन्धानं अनन्तरपच्चयेन पच्चयो; अनुलोमं गोत्रभुस्स…पे… गोत्रभु मग्गस्स…पे… नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (१)

समनन्तरपच्चयादि

३८. अनिदस्सनो धम्मो अनिदस्सनस्स धम्मस्स समनन्तरपच्चयेन पच्चयो… सहजातपच्चयेन पच्चयो… तीणि… अञ्ञमञ्ञपच्चयेन पच्चयो… एकं… निस्सयपच्चयेन पच्चयो… तीणि.

उपनिस्सयपच्चयो

३९. सनिदस्सनो धम्मो अनिदस्सनस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – वण्णसम्पदं पत्थयमानो दानं…पे… सीलं…पे… उपोसथकम्मं करोति, वण्णसम्पदा सद्धाय…पे… पत्थनाय… कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)

अनिदस्सनो धम्मो अनिदस्सनस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… समापत्तिं उप्पादेति, मानं जप्पेति, दिट्ठिं गण्हाति; सीलं…पे… सेनासनं उपनिस्साय दानं देति…पे… सङ्घं भिन्दति; सद्धा…पे… सेनासनं सद्धाय…पे… फलसमापत्तिया उपनिस्सयपच्चयेन पच्चयो. (१)

पुरेजातपच्चयो

४०. सनिदस्सनो धम्मो अनिदस्सनस्स धम्मस्स पुरेजातपच्चयेन पच्चयो – सनिदस्सनं रूपं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, रूपायतनं चक्खुविञ्ञाणस्स पुरेजातपच्चयेन पच्चयो. (१)

अनिदस्सनो धम्मो अनिदस्सनस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति, दिब्बाय सोतधातुया सद्दं सुणाति, सद्दायतनं सोतविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु अनिदस्सनानं खन्धानं पुरेजातपच्चयेन पच्चयो. (१)

सनिदस्सनो च अनिदस्सनो च धम्मा अनिदस्सनस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. रूपायतनञ्च वत्थु च अनिदस्सनानं खन्धानं पुरेजातपच्चयेन पच्चयो; रूपायतनञ्च चक्खायतनञ्च चक्खुविञ्ञाणस्स पुरेजातपच्चयेन पच्चयो. (१)

पच्छाजातपच्चयो

४१. अनिदस्सनो धम्मो अनिदस्सनस्स धम्मस्स पच्छाजातपच्चयेन पच्चयो – पच्छाजाता अनिदस्सना खन्धा पुरेजातस्स इमस्स अनिदस्सनस्स कायस्स पच्छाजातपच्चयेन पच्चयो. (१)

अनिदस्सनो धम्मो सनिदस्सनस्स धम्मस्स पच्छाजातपच्चयेन पच्चयो – पच्छाजाता अनिदस्सना खन्धा पुरेजातस्स इमस्स सनिदस्सनस्स कायस्स पच्छाजातपच्चयेन पच्चयो. (२)

अनिदस्सनो धम्मो सनिदस्सनस्स च अनिदस्सनस्स च धम्मस्स पच्छाजातपच्चयेन पच्चयो – पच्छाजाता अनिदस्सना खन्धा पुरेजातस्स इमस्स सनिदस्सनस्स च अनिदस्सनस्स च कायस्स पच्छाजातपच्चयेन पच्चयो. (३)

आसेवनपच्चयो

४२. अनिदस्सनो धम्मो अनिदस्सनस्स धम्मस्स आसेवनपच्चयेन पच्चयो – पुरिमा पुरिमा अनिदस्सना खन्धा पच्छिमानं पच्छिमानं अनिदस्सनानं खन्धानं…पे… अनुलोमं गोत्रभुस्स… अनुलोमं वोदानस्स… गोत्रभु मग्गस्स… वोदानं मग्गस्स आसेवनपच्चयेन पच्चयो. (१)

कम्मपच्चयो

४३. अनिदस्सनो धम्मो अनिदस्सनस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अनिदस्सना चेतना सम्पयुत्तकानं खन्धानं अनिदस्सनानञ्च चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – अनिदस्सना चेतना विपाकानं खन्धानं अनिदस्सनानञ्च कटत्तारूपानं कम्मपच्चयेन पच्चयो. (१)

अनिदस्सनो धम्मो सनिदस्सनस्स धम्मस्स कम्मपच्चयेन पच्चयो – सहजाता, नानाक्खणिका (वित्थारेतब्बं). (२)

अनिदस्सनो धम्मो सनिदस्सनस्स च अनिदस्सनस्स च धम्मस्स कम्मपच्चयेन पच्चयो – सहजाता, नानाक्खणिका (वित्थारेतब्बं). (३)

विपाकपच्चयादि

४४. अनिदस्सनो धम्मो अनिदस्सनस्स धम्मस्स विपाकपच्चयेन पच्चयो… तीणि… आहारपच्चयेन पच्चयो… तीणि (तीसुपि कबळीकारो आहारो कातब्बो)… इन्द्रियपच्चयेन पच्चयो… तीणि (तीसुपि रूपजीवितिन्द्रियं)… झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… एकं.

विप्पयुत्तपच्चयो

४५. अनिदस्सनो धम्मो अनिदस्सनस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – अनिदस्सना खन्धा अनिदस्सनानं चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे अनिदस्सना खन्धा अनिदस्सनानं कटत्तारूपानं विप्पयुत्तपच्चयेन पच्चयो; खन्धा वत्थुस्स विप्पयुत्तपच्चयेन पच्चयो, वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु अनिदस्सनानं खन्धानं विप्पयुत्तपच्चयेन पच्चयो. पच्छाजाता – अनिदस्सना खन्धा पुरेजातस्स इमस्स अनिदस्सनस्स कायस्स विप्पयुत्तपच्चयेन पच्चयो. (१)

अनिदस्सनो धम्मो सनिदस्सनस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अनिदस्सना खन्धा सनिदस्सनानं चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – अनिदस्सना खन्धा पुरेजातस्स इमस्स सनिदस्सनस्स कायस्स विप्पयुत्तपच्चयेन पच्चयो. (२)

अनिदस्सनो धम्मो सनिदस्सनस्स च अनिदस्सनस्स च धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अनिदस्सना खन्धा सनिदस्सनानञ्च अनिदस्सनानञ्च चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे…. पच्छाजाता – अनिदस्सना खन्धा पुरेजातस्स इमस्स सनिदस्सनस्स च अनिदस्सनस्स च कायस्स विप्पयुत्तपच्चयेन पच्चयो. (३)

अत्थिपच्चयादि

४६. सनिदस्सनो धम्मो अनिदस्सनस्स धम्मस्स अत्थिपच्चयेन पच्चयो – सनिदस्सनं रूपं अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, रूपायतनं चक्खुविञ्ञाणस्स अत्थिपच्चयेन पच्चयो. (१)

अनिदस्सनो धम्मो अनिदस्सनस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – अनिदस्सनो एको खन्धो तिण्णन्नं खन्धानं अनिदस्सनानञ्च चित्तसमुट्ठानानं रूपानं अत्थिपच्चयेन पच्चयो…पे… द्वे खन्धे…पे… (संखित्तं. याव असञ्ञसत्ता). पुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति, दिब्बाय सोतधातुया सद्दं सुणाति, सद्दायतनं सोतविञ्ञाणस्स…पे… फोट्ठब्बायतनं कायविञ्ञाणस्स…पे… चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु अनिदस्सनानं खन्धानं अत्थिपच्चयेन पच्चयो. पच्छाजाता – अनिदस्सना खन्धा पुरेजातस्स इमस्स अनिदस्सनस्स कायस्स अत्थिपच्चयेन पच्चयो; कबळीकारो आहारो इमस्स अनिदस्सनस्स कायस्स अत्थिपच्चयेन पच्चयो; रूपजीवितिन्द्रियं अनिदस्सनानं कटत्तारूपानं अत्थिपच्चयेन पच्चयो. (१)

अनिदस्सनो धम्मो सनिदस्सनस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – अनिदस्सना खन्धा सनिदस्सनानं चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे… महाभूता सनिदस्सनानं चित्तसमुट्ठानानं रूपानं कटत्तारूपानं उपादारूपानं अत्थिपच्चयेन पच्चयो…पे… बाहिरा… आहारसमुट्ठाना… उतुसमुट्ठाना… असञ्ञसत्तानं महाभूता सनिदस्सनानं कटत्तारूपानं, उपादारूपानं अत्थिपच्चयेन पच्चयो. पच्छाजाता – अनिदस्सना खन्धा पुरेजातस्स इमस्स सनिदस्सनस्स कायस्स अत्थिपच्चयेन पच्चयो; कबळीकारो आहारो इमस्स सनिदस्सनस्स कायस्स अत्थिपच्चयेन पच्चयो; रूपजीवितिन्द्रियं सनिदस्सनानं कटत्तारूपानं अत्थिपच्चयेन पच्चयो. (२)

अनिदस्सनो धम्मो सनिदस्सनस्स च अनिदस्सनस्स च धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजातो – अनिदस्सनो एको खन्धो तिण्णन्नं खन्धानं सनिदस्सनानञ्च अनिदस्सनानञ्च चित्तसमुट्ठानानं रूपानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे… महाभूता सनिदस्सनानञ्च अनिदस्सनानञ्च चित्तसमुट्ठानानं रूपानं, कटत्तारूपानं, उपादारूपानं अत्थिपच्चयेन पच्चयो; बाहिरा… आहारसमुट्ठाना… उतुसमुट्ठाना… असञ्ञसत्तानं महाभूता सनिदस्सनानञ्च अनिदस्सनानञ्च कटत्तारूपानं उपादारूपानं अत्थिपच्चयेन पच्चयो. (३)

४७. सनिदस्सनो च अनिदस्सनो च धम्मा अनिदस्सनस्स धम्मस्स अत्थिपच्चयेन पच्चयो. पुरेजातं – रूपायतनञ्च वत्थु च अनिदस्सनानं खन्धानं अत्थिपच्चयेन पच्चयो; रूपायतनञ्च चक्खायतनञ्च चक्खुविञ्ञाणस्स अत्थिपच्चयेन पच्चयो.

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.