१. पच्चयानुलोमं

हेतुपच्चयो

२६. अनिदस्सनं धम्मं पच्चया अनिदस्सनो धम्मो उप्पज्जति हेतुपच्चया – अनिदस्सनं एकं खन्धं पच्चया तयो खन्धा अनिदस्सनं चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पच्चया वत्थु, वत्थुं पच्चया खन्धा; एकं महाभूतं पच्चया…पे… महाभूते पच्चया अनिदस्सनं चित्तसमुट्ठानं रूपं कटत्तारूपं उपादारूपं, वत्थुं पच्चया अनिदस्सना खन्धा (इतरेपि द्वे पञ्हा कातब्बा).

आरम्मणपच्चयो

२७. अनिदस्सनं धम्मं पच्चया अनिदस्सनो धम्मो उप्पज्जति आरम्मणपच्चया – अनिदस्सनं एकं खन्धं…पे… द्वे खन्धे…पे… पटिसन्धिक्खणे…पे… वत्थुं पच्चया खन्धा, चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अनिदस्सना खन्धा (संखित्तं).

२८. हेतुया तीणि, आरम्मणे एकं, अधिपतिया तीणि…पे… अविगते तीणि.

अनुलोमं.