१. विभङ्गवारो

नहेतुपच्चयो

२२. अनिदस्सनं धम्मं पटिच्च अनिदस्सनो धम्मो उप्पज्जति नहेतुपच्चया – अहेतुकं अनिदस्सनं एकं खन्धं पटिच्च तयो खन्धा अनिदस्सनं चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा; एकं महाभूतं…पे… महाभूते पटिच्च अनिदस्सनं चित्तसमुट्ठानं रूपं कटत्तारूपं उपादारूपं… बाहिरं… आहारसमुट्ठानं… उतुसमुट्ठानं… असञ्ञसत्तानं…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

अनिदस्सनं धम्मं पटिच्च सनिदस्सनो धम्मो उप्पज्जति नहेतुपच्चया – अहेतुके अनिदस्सने खन्धे पटिच्च सनिदस्सनं चित्तसमुट्ठानं रूपं; पटिसन्धिक्खणे…पे… महाभूते पटिच्च सनिदस्सनं चित्तसमुट्ठानं रूपं कटत्तारूपं उपादारूपं… बाहिरे… आहारसमुट्ठाने… उतुसमुट्ठाने… असञ्ञसत्तानं महाभूते पटिच्च सनिदस्सनं कटत्तारूपं उपादारूपं. (२)

अनिदस्सनं धम्मं पटिच्च सनिदस्सनो च अनिदस्सनो च धम्मा उप्पज्जन्ति नहेतुपच्चया – अहेतुकं अनिदस्सनं एकं खन्धं पटिच्च तयो खन्धा सनिदस्सनञ्च अनिदस्सनञ्च चित्तसमुट्ठानं रूपं…पे… द्वे खन्धे…पे… पटिसन्धिक्खणे…पे… महाभूते पटिच्च…पे… बाहिरे… आहारसमुट्ठाने… उतुसमुट्ठाने… असञ्ञसत्तानं महाभूते पटिच्च सनिदस्सनञ्च अनिदस्सनञ्च कटत्तारूपं, उपादारूपं. (३) (एवं सब्बे कातब्बा.)