१. पटिच्चवारो

१-४. पच्चयानुलोमादि

१. सप्पच्चयं धम्मं पटिच्च सप्पच्चयो धम्मो उप्पज्जति हेतुपच्चया – सप्पच्चयं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं.

सप्पच्चयं धम्मं पटिच्च सप्पच्चयो धम्मो उप्पज्जति आरम्मणपच्चया…पे… अविगतपच्चया.

२. हेतुया एकं, आरम्मणे एकं…पे… अविगते एकं.

अनुलोमं.

३. सप्पच्चयं धम्मं पटिच्च सप्पच्चयो धम्मो उप्पज्जति नहेतुपच्चया – अहेतुकं सप्पच्चयं एकं खन्धं पटिच्च तयो खन्धा चित्तसमुट्ठानञ्च रूपं, द्वे खन्धे…पे… अहेतुकपटिसन्धिक्खणे …पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो (संखित्तं).

४. नहेतुया एकं, नआरम्मणे एकं, नअधिपतिया एकं…पे… नोविगते एकं.

पच्चनीयं.

५. हेतुपच्चया नआरम्मणे एकं, नअधिपतिया एकं…पे… नोविगते एकं.

अनुलोमपच्चनीयं.

६. नहेतुपच्चया आरम्मणे एकं अनन्तरे एकं…पे… अविगते एकं.

पच्चनीयानुलोमं.