१. विभङ्गवारो

हेतुपच्चयो

१४८. लोकियो धम्मो लोकियस्स धम्मस्स हेतुपच्चयेन पच्चयो – लोकिया हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

लोकुत्तरो धम्मो लोकुत्तरस्स धम्मस्स हेतुपच्चयेन पच्चयो… तीणि.

आरम्मणपच्चयो

१४९. लोकियो धम्मो लोकियस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना…पे… अरिया गोत्रभुं पच्चवेक्खन्ति, वोदानं पच्चवेक्खन्ति, पहीने किलेसे पच्चवेक्खन्ति, विक्खम्भिते किलेसे…पे… पुब्बे समुदाचिण्णे किलेसे जानन्ति; चक्खुं…पे… वत्थुं लोकिये खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन लोकियचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स, लोकिया खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

१५०. लोकुत्तरो धम्मो लोकुत्तरस्स धम्मस्स आरम्मणपच्चयेन पच्चयो – निब्बानं मग्गस्स, फलस्स आरम्मणपच्चयेन पच्चयो. (१)

लोकुत्तरो धम्मो लोकियस्स धम्मस्स आरम्मणपच्चयेन पच्चयो – अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति; निब्बानं गोत्रभुस्स, वोदानस्स, आवज्जनाय आरम्मणपच्चयेन पच्चयो; अरिया चेतोपरियञाणेन लोकुत्तरचित्तसमङ्गिस्स चित्तं जानन्ति, लोकुत्तरा खन्धा चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

अधिपतिपच्चयो

१५१. लोकियो धम्मो लोकियस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं दत्वा सीलं…पे… उपोसथकम्मं …पे… पुब्बे…पे… झाना…पे… सेक्खा गोत्रभुं गरुं कत्वा पच्चवेक्खन्ति, वोदानं गरुं कत्वा पच्चवेक्खन्ति; चक्खुं…पे… वत्थुं लोकिये खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – लोकियाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

१५२. लोकुत्तरो धम्मो लोकुत्तरस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – निब्बानं मग्गस्स, फलस्स अधिपतिपच्चयेन पच्चयो. सहजाताधिपति – लोकुत्तराधिपति सम्पयुत्तकानं खन्धानं अधिपतिपच्चयेन पच्चयो. (१)

लोकुत्तरो धम्मो लोकियस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति; निब्बानं गोत्रभुस्स, वोदानस्स अधिपतिपच्चयेन पच्चयो. सहजाताधिपति – लोकुत्तराधिपति चित्तसमुट्ठानानं रूपानं अधिपतिपच्चयेन पच्चयो. (२)

लोकुत्तरो धम्मो लोकियस्स च लोकुत्तरस्स च धम्मस्स अधिपतिपच्चयेन पच्चयो. सहजाताधिपति – लोकुत्तराधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

अनन्तरपच्चयो

१५३. लोकियो धम्मो लोकियस्स धम्मस्स अनन्तरपच्चयेन पच्चयो – पुरिमा पुरिमा लोकिया खन्धा पच्छिमानं पच्छिमानं लोकियानं खन्धानं…पे… अनुलोमं गोत्रभुस्स… अनुलोमं वोदानस्स अनन्तरपच्चयेन पच्चयो. (१)

लोकियो धम्मो लोकुत्तरस्स धम्मस्स अनन्तरपच्चयेन पच्चयो – गोत्रभु मग्गस्स… वोदानं मग्गस्स… अनुलोमं फलसमापत्तिया… निरोधा वुट्ठहन्तस्स नेवसञ्ञानासञ्ञायतनं फलसमापत्तिया अनन्तरपच्चयेन पच्चयो. (२)

१५४. लोकुत्तरो धम्मो लोकुत्तरस्स धम्मस्स अनन्तरपच्चयेन पच्चयो – पुरिमा पुरिमा लोकुत्तरा खन्धा पच्छिमानं पच्छिमानं लोकुत्तरानं खन्धानं अनन्तरपच्चयेन पच्चयो; मग्गो फलस्स, फलं फलस्स अनन्तरपच्चयेन पच्चयो. (१)

लोकुत्तरो धम्मो लोकियस्स धम्मस्स अनन्तरपच्चयेन पच्चयो – फलं वुट्ठानस्स अनन्तरपच्चयेन पच्चयो. (२)

समनन्तरपच्चयादि

१५५. लोकियो धम्मो लोकियस्स धम्मस्स समनन्तरपच्चयेन पच्चयो… सहजातपच्चयेन पच्चयो (पञ्च पञ्हा, घटना नत्थि) अञ्ञमञ्ञपच्चयेन पच्चयो… द्वे… निस्सयपच्चयेन पच्चयो.

उपनिस्सयपच्चयो

१५६. लोकियो धम्मो लोकियस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – लोकियं सद्धं उपनिस्साय दानं देति…पे… विपस्सनं उप्पादेति, अभिञ्ञं उप्पादेति, समापत्तिं उप्पादेति, मानं जप्पेति, दिट्ठिं गण्हाति; लोकियं सीलं…पे… सेनासनं उपनिस्साय दानं देति…पे… सङ्घं भिन्दति; लोकिया सद्धा…पे… सेनासनं लोकियाय सद्धाय…पे… कायिकस्स दुक्खस्स उपनिस्सयपच्चयेन पच्चयो; कुसलाकुसलं कम्मं विपाकस्स उपनिस्सयपच्चयेन पच्चयो. (१)

लोकियो धम्मो लोकुत्तरस धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – पठमस्स मग्गस्स परिकम्मं पठमस्स मग्गस्स उपनिस्सयपच्चयेन पच्चयो…पे… चतुत्थस्स मग्गस्स परिकम्मं चतुत्थस्स मग्गस्स उपनिस्सयपच्चयेन पच्चयो. (२)

१५७. लोकुत्तरो धम्मो लोकुत्तरस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – पठमो मग्गो दुतियस्स मग्गस्स उपनिस्सयपच्चयेन पच्चयो…पे… ततियो मग्गो चतुत्थस्स मग्गस्स उपनिस्सयपच्चयेन पच्चयो. (१)

लोकुत्तरो धम्मो लोकियस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – अरिया मग्गं उपनिस्साय अनुप्पन्नं समापत्तिं उप्पादेन्ति, उप्पन्नं समापज्जन्ति, सङ्खारे अनिच्चतो दुक्खतो अनत्ततो विपस्सन्ति, अरियानं मग्गो…पे… ठानाठानकोसल्लस्स उपनिस्सयपच्चयेन पच्चयो; फलसमापत्ति कायिकस्स सुखस्स उपनिस्सयपच्चयेन पच्चयो. (२)

पुरेजातपच्चयो

१५८. लोकियो धम्मो लोकियस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो दुक्खतो अनत्ततो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु लोकियानं खन्धानं पुरेजातपच्चयेन पच्चयो. (१)

लोकियो धम्मो लोकुत्तरस्स धम्मस्स पुरेजातपच्चयेन पच्चयो. वत्थुपुरेजातं – वत्थु लोकुत्तरानं खन्धानं पुरेजातपच्चयेन पच्चयो. (२)

पच्छाजातपच्चयो

१५९. लोकियो धम्मो लोकियस्स धम्मस्स पच्छाजातपच्चयेन पच्चयो – पच्छाजाता लोकिया खन्धा पुरेजातस्स इमस्स कायस्स पच्छाजातपच्चयेन पच्चयो. (१)

लोकुत्तरो धम्मो लोकियस्स धम्मस्स पच्छाजातपच्चयेन पच्चयो – पच्छाजाता लोकुत्तरा खन्धा पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

१६०. लोकियो धम्मो लोकियस्स धम्मस्स आसेवनपच्चयेन पच्चयो – पुरिमा पुरिमा लोकिया खन्धा पच्छिमानं पच्छिमानं लोकियानं खन्धानं आसेवनपच्चयेन पच्चयो; अनुलोमं गोत्रभुस्स… अनुलोमं वोदानस्स आसेवनपच्चयेन पच्चयो. (१)

लोकियो धम्मो लोकुत्तरस्स धम्मस्स आसेवनपच्चयेन पच्चयो – गोत्रभु मग्गस्स… वोदानं मग्गस्स आसेवनपच्चयेन पच्चयो. (२)

कम्मपच्चयो

१६१. लोकियो धम्मो लोकियस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – लोकिया चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – लोकिया चेतना विपाकानं खन्धानं कटत्ता च रूपानं कम्मपच्चयेन पच्चयो. (१)

लोकुत्तरो धम्मो लोकुत्तरस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – लोकुत्तरा चेतना सम्पयुत्तकानं खन्धानं कम्मपच्चयेन पच्चयो. नानाक्खणिका – लोकुत्तरा चेतना विपाकानं खन्धानं कम्मपच्चयेन पच्चयो. (१)

लोकुत्तरो धम्मो लोकियस्स धम्मस्स कम्मपच्चयेन पच्चयो – लोकुत्तरा चेतना चित्तसमुट्ठानानं रूपानं कम्मपच्चयेन पच्चयो. (२)

लोकुत्तरो धम्मो लोकियस्स च लोकुत्तरस्स च धम्मस्स कम्मपच्चयेन पच्चयो – लोकुत्तरा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

विपाकपच्चयो

१६२. लोकियो धम्मो लोकियस्स धम्मस्स विपाकपच्चयेन पच्चयो – विपाको लोकियो एको खन्धो तिण्णन्नं खन्धानं चित्तसमुट्ठानानञ्च रूपानं विपाकपच्चयेन पच्चयो…पे… द्वे खन्धा…पे… पटिसन्धिक्खणे…पे…. (१)

लोकुत्तरो धम्मो लोकुत्तरस्स धम्मस्स विपाकपच्चयेन पच्चयो… तीणि.

आहारपच्चयो

१६३. लोकियो धम्मो लोकियस्स धम्मस्स आहारपच्चयेन पच्चयो – लोकिया आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; पटिसन्धिक्खणे…पे… कबळीकारो आहारो इमस्स कायस्स आहारपच्चयेन पच्चयो. (१)

लोकुत्तरो धम्मो लोकुत्तरस्स धम्मस्स आहारपच्चयेन पच्चयो… तीणि.

इन्द्रियपच्चयो

१६४. लोकियो धम्मो लोकियस्स धम्मस्स इन्द्रियपच्चयेन पच्चयो (पटिसन्धि कातब्बा); चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स इन्द्रियपच्चयेन पच्चयो; रूपजीवितिन्द्रियं कटत्तारूपानं इन्द्रियपच्चयेन पच्चयो. (१)

लोकुत्तरो धम्मो लोकुत्तरस्स धम्मस्स इन्द्रियपच्चयेन पच्चयो… तीणि.

झानपच्चयादि

१६५. लोकियो धम्मो लोकियस्स धम्मस्स झानपच्चयेन पच्चयो… एकं, लोकुत्तरो धम्मो…पे… तीणि… मग्गपच्चयेन पच्चयो, लोकिये एकं, लोकुत्तरे तीणि.

लोकियो धम्मो लोकियस्स धम्मस्स सम्पयुत्तपच्चयेन पच्चयो… एकं, लोकुत्तरो धम्मो…पे… एकं.

विप्पयुत्तपच्चयो

१६६. लोकियो धम्मो लोकियस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – लोकिया खन्धा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे…पे… खन्धा वत्थुस्स विप्पयुत्तपच्चयेन पच्चयो; वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु लोकियानं खन्धानं विप्पयुत्तपच्चयेन पच्चयो. पच्छाजाता – लोकिया खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

लोकियो धम्मो लोकुत्तरस्स धम्मस्स विप्पयुत्तपच्चयेन पच्चयो. पुरेजातं – वत्थु लोकुत्तरानं खन्धानं विप्पयुत्तपच्चयेन पच्चयो. (२)

लोकुत्तरो धम्मो लोकियस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – लोकुत्तरा खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – लोकुत्तरा खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

अत्थिपच्चयादि

१६७. लोकियो धम्मो लोकियस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – लोकियो एको खन्धो तिण्णन्नं खन्धानं चित्तसमुट्ठानानञ्च रूपानं…पे… (याव असञ्ञसत्ता). पुरेजातं – चक्खुं…पे… वत्थुं …पे… (पुरेजातसदिसं). वत्थु लोकियानं खन्धानं अत्थिपच्चयेन पच्चयो. पच्छाजाता – लोकिया खन्धा पुरेजातस्स इमस्स कायस्स अत्थिपच्चयेन पच्चयो; कबळीकारो आहारो इमस्स कायस्स अत्थिपच्चयेन पच्चयो; रूपजीवितिन्द्रियं कटत्तारूपानं अत्थिपच्चयेन पच्चयो. (१)

लोकियो धम्मो लोकुत्तरस्स धम्मस्स अत्थिपच्चयेन पच्चयो. पुरेजातं – वत्थु लोकुत्तरानं खन्धानं अत्थिपच्चयेन पच्चयो. (२)

१६८. लोकुत्तरो धम्मो लोकुत्तरस्स धम्मस्स अत्थिपच्चयेन पच्चयो – लोकुत्तरो एको खन्धो तिण्णन्नं खन्धानं अत्थिपच्चयेन पच्चयो…पे… द्वे खन्धा…पे…. (१)

लोकुत्तरो धम्मो लोकियस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – लोकुत्तरा खन्धा चित्तसमुट्ठानानं रूपानं अत्थिपच्चयेन पच्चयो. पच्छाजाता – लोकुत्तरा खन्धा पुरेजातस्स इमस्स कायस्स अत्थिपच्चयेन पच्चयो. (२)

लोकुत्तरो धम्मो लोकियस्स च लोकुत्तरस्स च धम्मस्स अत्थिपच्चयेन पच्चयो – लोकुत्तरो एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे…. (३)

१६९. लोकियो च लोकुत्तरो च धम्मा लोकियस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – लोकुत्तरा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. पच्छाजाता – लोकुत्तरा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – लोकुत्तरा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (१)

लोकियो च लोकुत्तरो च धम्मा लोकुत्तरस्स धम्मस्स अत्थिपच्चयेन पच्चयो – सहजातं, पुरेजातं. सहजातो – लोकुत्तरो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. (२)

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो. (२)