१. विभङ्गवारो

हेतुपच्चयो

१४०. लोकियं धम्मं पच्चया लोकियो धम्मो उप्पज्जति हेतुपच्चया – लोकियं एकं खन्धं पच्चया…पे… एकं महाभूतं…पे… महाभूते पच्चया चित्तसमुट्ठानं रूपं, कटत्तारूपं, उपादारूपं, वत्थुं पच्चया लोकिया खन्धा. (१)

लोकियं धम्मं पच्चया लोकुत्तरो धम्मो उप्पज्जति हेतुपच्चया – वत्थुं पच्चया लोकुत्तरा खन्धा. (२)

लोकियं धम्मं पच्चया लोकियो च लोकुत्तरो च धम्मा उप्पज्जन्ति हेतुपच्चया – वत्थुं पच्चया लोकुत्तरा खन्धा, महाभूते पच्चया चित्तसमुट्ठानं रूपं. (३)

१४१. लोकुत्तरं धम्मं पच्चया लोकुत्तरो धम्मो उप्पज्जति हेतुपच्चया… तीणि.

लोकियञ्च लोकुत्तरञ्च धम्मं पच्चया लोकियो धम्मो उप्पज्जति हेतुपच्चया – लोकुत्तरे खन्धे च महाभूते च पच्चया चित्तसमुट्ठानं रूपं. (१)

लोकियञ्च लोकुत्तरञ्च धम्मं पच्चया लोकुत्तरो धम्मो उप्पज्जति हेतुपच्चया – लोकुत्तरं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे…. (२)

लोकियञ्च लोकुत्तरञ्च धम्मं पच्चया लोकियो च लोकुत्तरो च धम्मा उप्पज्जन्ति हेतुपच्चया – लोकुत्तरं एकं खन्धञ्च वत्थुञ्च पच्चया तयो खन्धा…पे… द्वे खन्धे…पे… लोकुत्तरे खन्धे च महाभूते च पच्चया चित्तसमुट्ठानं रूपं (संखित्तं). (३)