१. विभङ्गवारो

हेतुपच्चयो

१३३. लोकियं धम्मं पटिच्च लोकियो धम्मो उप्पज्जति हेतुपच्चया – लोकियं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च चित्तसमुट्ठानं रूपं, कटत्तारूपं, उपादारूपं. (१)

१३४. लोकुत्तरं धम्मं पटिच्च लोकुत्तरो धम्मो उप्पज्जति हेतुपच्चया – लोकुत्तरं एकं खन्धं पटिच्च तयो खन्धा…पे… द्वे खन्धे…पे…. (१)

लोकुत्तरं धम्मं पटिच्च लोकियो धम्मो उप्पज्जति हेतुपच्चया – लोकुत्तरे खन्धे पटिच्च चित्तसमुट्ठानं रूपं. (२)

लोकुत्तरं धम्मं पटिच्च लोकियो च लोकुत्तरो च धम्मा उप्पज्जन्ति हेतुपच्चया – लोकुत्तरं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

लोकियञ्च लोकुत्तरञ्च धम्मं पटिच्च लोकियो धम्मो उप्पज्जति हेतुपच्चया – लोकुत्तरे खन्धे च महाभूते च पटिच्च चित्तसमुट्ठानं रूपं (संखित्तं). (१)