१. विभङ्गवारो

हेतुपच्चयो

१११. अरूपी धम्मो अरूपिस्स धम्मस्स हेतुपच्चयेन पच्चयो – अरूपी हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (१)

अरूपी धम्मो रूपिस्स धम्मस्स हेतुपच्चयेन पच्चयो – अरूपी हेतू चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (२)

अरूपी धम्मो रूपिस्स च अरूपिस्स च धम्मस्स हेतुपच्चयेन पच्चयो – अरूपी हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

११२. रूपी धम्मो अरूपिस्स धम्मस्स आरम्मणपच्चयेन पच्चयो – चक्खुं…पे… वत्थुं… इत्थिन्द्रियं… पुरिसिन्द्रियं… जीवितिन्द्रियं… आपोधातुं… कबळीकारं आहारं अनिच्चतो…पे… दोमनस्सं उप्पज्जति, दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स आरम्मणपच्चयेन पच्चयो…पे… फोट्ठब्बायतनं कायविञ्ञाणस्स आरम्मणपच्चयेन पच्चयो; रूपिनो खन्धा इद्धिविधञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

११३. अरूपी धम्मो अरूपिस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति, पुब्बे सुचिण्णानि पच्चवेक्खति, झाना…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया पहीने किलेसे…पे… विक्खम्भिते किलेसे…पे… पुब्बे…पे… अरूपिनो खन्धे अनिच्चतो…पे… दोमनस्सं उप्पज्जति, चेतोपरियञाणेन अरूपिचित्तसमङ्गिस्स चित्तं जानाति, आकासानञ्चायतनं…पे… नेवसञ्ञानासञ्ञायतनस्स…पे… अरूपिनो खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अधिपतिपच्चयो

११४. रूपी धम्मो अरूपिस्स धम्मस्स अधिपतिपच्चयेन पच्चयो. आरम्मणाधिपति – चक्खुं…पे… कबळीकारं आहारं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

अरूपी धम्मो अरूपिस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… (संखित्तं) निब्बानं मग्गस्स, फलस्स अधिपतिपच्चयेन पच्चयो; अरूपिनो खन्धे गरुं कत्वा अस्सादेति…पे… रागो उप्पज्जति, दिट्ठि उप्पज्जति. सहजाताधिपति – अरूपी अधिपति सम्पयुत्तकानं खन्धानं अधिपतिपच्चयेन पच्चयो. (१)

अरूपी धम्मो रूपिस्स धम्मस्स अधिपतिपच्चयेन पच्चयो. सहजाताधिपति – अरूपी अधिपति चित्तसमुट्ठानानं रूपानं अधिपतिपच्चयेन पच्चयो. (२)

अरूपी धम्मो रूपिस्स च अरूपिस्स च धम्मस्स अधिपतिपच्चयेन पच्चयो. सहजाताधिपति – अरूपी अधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)

अनन्तरपच्चयादि

११५. अरूपी धम्मो अरूपिस्स धम्मस्स अनन्तरपच्चयेन पच्चयो – पुरिमा पुरिमा अरूपिनो खन्धा पच्छिमानं पच्छिमानं अरूपीनं खन्धानं…पे… फलसमापत्तिया अनन्तरपच्चयेन पच्चयो, समनन्तरपच्चयेन पच्चयो.

(सहजातपच्चये सत्त, इह घटना नत्थि. अञ्ञमञ्ञपच्चये छ, निस्सयपच्चये सत्त पञ्हा, इह घटना नत्थि).

उपनिस्सयपच्चयो

११६. रूपी धम्मो अरूपिस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – उतुं… भोजनं… सेनासनं उपनिस्साय दानं देति…पे… सङ्घं भिन्दति, उतु… भोजनं… सेनासनं सद्धाय…पे… फलसमापत्तिया उपनिस्सयपच्चयेन पच्चयो. (१)

अरूपी धम्मो अरूपिस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति, सीलं…पे… कायिकं दुक्खं उपनिस्साय दानं देति…पे… सङ्घं भिन्दति, सद्धा…पे… कायिकं दुक्खं… सद्धाय…पे… फलसमापत्तिया उपनिस्सयपच्चयेन पच्चयो. (१)

पुरेजातपच्चयो

११७. रूपी धम्मो अरूपिस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं…पे… कबळीकारं आहारं अनिच्चतो …पे… दोमनस्सं उप्पज्जति. दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु अरूपीनं खन्धानं पुरेजातपच्चयेन पच्चयो. (१)

पच्छाजातपच्चयो

११८. अरूपी धम्मो रूपिस्स धम्मस्स पच्छाजातपच्चयेन पच्चयो – पच्छाजाता अरूपिनो खन्धा पुरेजातस्स इमस्स कायस्स पच्छाजातपच्चयेन पच्चयो. (१)

आसेवनपच्चयो

११९. अरूपी धम्मो अरूपिस्स धम्मस्स आसेवनपच्चयेन पच्चयो – पुरिमा पुरिमा अरूपिनो खन्धा पच्छिमानं पच्छिमानं अरूपीनं खन्धानं आसेवनपच्चयेन पच्चयो.

कम्मपच्चयो

१२०. अरूपी धम्मो अरूपिस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अरूपी चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे…पे…. नानाक्खणिका – अरूपी चेतना विपाकानं खन्धानं कम्मपच्चयेन पच्चयो. (१)

अरूपी धम्मो रूपिस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – अरूपी चेतना चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – अरूपी चेतना कटत्तारूपानं कम्मपच्चयेन पच्चयो. (२)

अरूपी धम्मो रूपिस्स च अरूपिस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – अरूपी चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – अरूपी चेतना विपाकानं खन्धानं कटत्ता च रूपानं कम्मपच्चयेन पच्चयो. (३)

विपाकाहारपच्चया

१२१. अरूपी धम्मो अरूपिस्स धम्मस्स विपाकपच्चयेन पच्चयो… तीणि.

रूपी धम्मो रूपिस्स धम्मस्स आहारपच्चयेन पच्चयो – कबळीकारो आहारो इमस्स कायस्स आहारपच्चयेन पच्चयो. (१)

अरूपी धम्मो अरूपिस्स धम्मस्स आहारपच्चयेन पच्चयो… तीणि.

इन्द्रियपच्चयो

१२२. रूपी धम्मो रूपिस्स धम्मस्स इन्द्रियपच्चयेन पच्चयो – रूपजीवितिन्द्रियं कटत्तारूपानं इन्द्रियपच्चयेन पच्चयो. (१)

रूपी धम्मो अरूपिस्स धम्मस्स इन्द्रियपच्चयेन पच्चयो – चक्खुन्द्रियं…पे… कायिन्द्रियं कायविञ्ञाणस्स इन्द्रियपच्चयेन पच्चयो. (२)

अरूपी धम्मो अरूपिस्स धम्मस्स इन्द्रियपच्चयेन पच्चयो… तीणि.

रूपी च अरूपी च धम्मा अरूपिस्स धम्मस्स इन्द्रियपच्चयेन पच्चयो – चक्खुन्द्रियञ्च चक्खुविञ्ञाणञ्च चक्खुविञ्ञाणसहगतानं खन्धानं इन्द्रियपच्चयेन पच्चयो…पे… कायिन्द्रियञ्च…पे….

झानपच्चयादि

१२३. अरूपी धम्मो अरूपिस्स धम्मस्स झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… एकं.

विप्पयुत्तपच्चयो

१२४. रूपी धम्मो अरूपिस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु अरूपीनं खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु अरूपीनं खन्धानं विप्पयुत्तपच्चयेन पच्चयो. (१)

अरूपी धम्मो रूपिस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अरूपिनो खन्धा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे अरूपिनो खन्धा कटत्तारूपानं विप्पयुत्तपच्चयेन पच्चयो; अरूपिनो खन्धा वत्थुस्स विप्पयुत्तपच्चयेन पच्चयो. पच्छाजाता – अरूपिनो खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

अत्थिपच्चयादि

१२५. रूपी धम्मो रूपिस्स धम्मस्स अत्थिपच्चयेन पच्चयो – सहजातं, आहारं, इन्द्रियं. सहजातं – एकं महाभूतं…पे… (याव असञ्ञसत्ता), कबळीकारो आहारो इमस्स कायस्स अत्थिपच्चयेन पच्चयो; रूपजीवितिन्द्रियं कटत्तारूपानं अत्थिपच्चयेन पच्चयो. (१)

रूपी धम्मो अरूपिस्स धम्मस्स अत्थिपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु अरूपीनं खन्धानं अत्थिपच्चयेन पच्चयो. पुरेजातं – चक्खुं…पे… कबळीकारं आहारं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… चक्खायतनं चक्खुविञ्ञाणस्स …पे… कायायतनं कायविञ्ञाणस्स…पे… वत्थु अरूपीनं खन्धानं अत्थिपच्चयेन पच्चयो. (२)

१२६. अरूपी धम्मो अरूपिस्स धम्मस्स अत्थिपच्चयेन पच्चयो – अरूपी एको खन्धो तिण्णन्नं खन्धानं…पे… द्वे खन्धा…पे… पटिसन्धिक्खणे…पे…. (१)

अरूपी धम्मो रूपिस्स धम्मस्स अत्थिपच्चयेन पच्चयो – सहजातं, पच्छाजातं. सहजाता – अरूपिनो खन्धा चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे… पच्छाजाता – अरूपिनो खन्धा पुरेजातस्स इमस्स कायस्स अत्थिपच्चयेन पच्चयो. (२)

अरूपी धम्मो रूपिस्स च अरूपिस्स च धम्मस्स अत्थिपच्चयेन पच्चयो – अरूपी एको खन्धो तिण्णन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे…. (३)

१२७. रूपी च अरूपी च धम्मा रूपिस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – अरूपी खन्धा च महाभूता च चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे…. पच्छाजाता – अरूपिनो खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – अरूपिनो खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (१)

रूपी च अरूपी च धम्मा अरूपिस्स धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनञ्च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… कायविञ्ञाणसहगतो…पे… अरूपी एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… पटिसन्धिक्खणे अरूपी एको खन्धो च वत्थु च तिण्णन्नं खन्धानं…पे… द्वे खन्धा च…पे…. (२)

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.