१. विभङ्गवारो

हेतुपच्चयो

९२. चेतसिकं धम्मं पटिच्च चेतसिको धम्मो उप्पज्जति हेतुपच्चया – चेतसिकं एकं खन्धं पटिच्च द्वे खन्धा, द्वे खन्धे पटिच्च एको खन्धो; पटिसन्धिक्खणे…पे…. (१)

चेतसिकं धम्मं पटिच्च अचेतसिको धम्मो उप्पज्जति हेतुपच्चया – चेतसिके खन्धे पटिच्च चित्तञ्च चित्तसमुट्ठानञ्च रूपं; पटिसन्धिक्खणे चेतसिके खन्धे पटिच्च चित्तञ्च कटत्ता च रूपं. (२)

चेतसिकं धम्मं पटिच्च चेतसिको च अचेतसिको च धम्मा उप्पज्जन्ति हेतुपच्चया – चेतसिकं एकं खन्धं पटिच्च द्वे खन्धा चित्तञ्च चित्तसमुट्ठानञ्च रूपं, द्वे खन्धे…पे… पटिसन्धिक्खणे…पे…. (३)

९३. अचेतसिकं धम्मं पटिच्च अचेतसिको धम्मो उप्पज्जति हेतुपच्चया – चित्तं पटिच्च चित्तसमुट्ठानं रूपं; पटिसन्धिक्खणे चित्तं पटिच्च कटत्तारूपं, चित्तं पटिच्च वत्थु, वत्थुं पटिच्च चित्तं, एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)

अचेतसिकं धम्मं पटिच्च चेतसिको धम्मो उप्पज्जति हेतुपच्चया – चित्तं पटिच्च सम्पयुत्तका खन्धा; पटिसन्धिक्खणे चित्तं…पे… पटिसन्धिक्खणे वत्थुं पटिच्च चेतसिका खन्धा. (२)

अचेतसिकं धम्मं पटिच्च चेतसिको च अचेतसिको च धम्मा उप्पज्जन्ति हेतुपच्चया – चित्तं पटिच्च सम्पयुत्तका खन्धा चित्तसमुट्ठानञ्च रूपं; पटिसन्धिक्खणे चित्तं…पे… पटिसन्धिक्खणे वत्थुं पटिच्च चित्तञ्च सम्पयुत्तका च खन्धा. (३)

९४. चेतसिकञ्च अचेतसिकञ्च धम्मं पटिच्च चेतसिको धम्मो उप्पज्जति हेतुपच्चया – चेतसिकं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे चेतसिकं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे चेतसिकं एकं खन्धञ्च वत्थुञ्च पटिच्च द्वे खन्धा, द्वे खन्धे च…पे…. (१)

चेतसिकञ्च अचेतसिकञ्च धम्मं पटिच्च अचेतसिको धम्मो उप्पज्जति हेतुपच्चया – चेतसिके खन्धे च चित्तञ्च पटिच्च चित्तसमुट्ठानं रूपं, चेतसिके खन्धे च महाभूते च पटिच्च चित्तसमुट्ठानं रूपं; पटिसन्धिक्खणे चेतसिके खन्धे च चित्तञ्च पटिच्च कटत्तारूपं, पटिसन्धिक्खणे चेतसिके खन्धे च महाभूते च पटिच्च कटत्तारूपं, पटिसन्धिक्खणे चेतसिके खन्धे च वत्थुञ्च पटिच्च चित्तं. (२)

चेतसिकञ्च अचेतसिकञ्च धम्मं पटिच्च चेतसिको च अचेतसिको च धम्मा उप्पज्जन्ति हेतुपच्चया – चेतसिकं एकं खन्धञ्च चित्तञ्च पटिच्च द्वे खन्धा चित्तसमुट्ठानञ्च रूपं, द्वे खन्धे च…पे… पटिसन्धिक्खणे चेतसिकं एकं खन्धञ्च चित्तञ्च पटिच्च द्वे खन्धा कटत्ता च रूपं, द्वे खन्धे च…पे… पटिसन्धिक्खणे चेतसिकं एकं खन्धञ्च वत्थुञ्च पटिच्च द्वे खन्धा चित्तञ्च, द्वे खन्धे च वत्थुञ्च पटिच्च एको खन्धो चित्तञ्च. (३)

आरम्मणपच्चयो

९५. चेतसिकं धम्मं पटिच्च चेतसिको धम्मो उप्पज्जति आरम्मणपच्चया – चेतसिकं एकं खन्धं पटिच्च द्वे खन्धा, द्वे खन्धे…पे… पटिसन्धिक्खणे…पे…. (१)

चेतसिकं धम्मं पटिच्च अचेतसिको धम्मो उप्पज्जति आरम्मणपच्चया – चेतसिके खन्धे पटिच्च चित्तं; पटिसन्धिक्खणे…पे…. (२)

चेतसिकं धम्मं पटिच्च चेतसिको च अचेतसिको च धम्मा उप्पज्जन्ति आरम्मणपच्चया – चेतसिकं एकं खन्धं पटिच्च द्वे खन्धा चित्तञ्च, द्वे खन्धे…पे… पटिसन्धिक्खणे…पे…. (३)

९६. अचेतसिकं धम्मं पटिच्च अचेतसिको धम्मो उप्पज्जति आरम्मणपच्चया – पटिसन्धिक्खणे वत्थुं पटिच्च चित्तं. (१)

अचेतसिकं धम्मं पटिच्च चेतसिको धम्मो उप्पज्जति आरम्मणपच्चया – चित्तं पटिच्च सम्पयुत्तका खन्धा; पटिसन्धिक्खणे चित्तं पटिच्च सम्पयुत्तका खन्धा, पटिसन्धिक्खणे वत्थुं पटिच्च चेतसिका खन्धा. (२)

अचेतसिकं धम्मं पटिच्च चेतसिको च अचेतसिको च धम्मा उप्पज्जन्ति आरम्मणपच्चया – पटिसन्धिक्खणे वत्थुं पटिच्च चित्तञ्च सम्पयुत्तका च खन्धा. (३)

चेतसिकञ्च अचेतसिकञ्च धम्मं पटिच्च चेतसिको धम्मो उप्पज्जति आरम्मणपच्चया – चेतसिकं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे चेतसिकं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… पटिसन्धिक्खणे चेतसिकं एकं खन्धञ्च वत्थुञ्च पटिच्च द्वे खन्धा, द्वे खन्धे च…पे…. (१)

चेतसिकञ्च अचेतसिकञ्च धम्मं पटिच्च अचेतसिको धम्मो उप्पज्जति आरम्मणपच्चया – पटिसन्धिक्खणे चेतसिके खन्धे च वत्थुञ्च पटिच्च चित्तं. (२)

चेतसिकञ्च अचेतसिकञ्च धम्मं पटिच्च चेतसिको च अचेतसिको च धम्मा उप्पज्जन्ति आरम्मणपच्चया – पटिसन्धिक्खणे चेतसिकं एकं खन्धञ्च वत्थुञ्च पटिच्च द्वे खन्धा चित्तञ्च, द्वे खन्धे च…पे…. (३)

अधिपतिपच्चयो

९७. चेतसिकं धम्मं पटिच्च चेतसिको धम्मो उप्पज्जति अधिपतिपच्चया (संखित्तं).