१०. महन्तरदुकं
५५. सारम्मणदुकं
१. पटिच्चवारो
१. पच्चयानुलोमं
१. विभङ्गवारो
हेतुपच्चयो
१. सारम्मणं धम्मं पटिच्च सारम्मणो धम्मो उप्पज्जति हेतुपच्चया – सारम्मणं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे…. (१)
सारम्मणं धम्मं पटिच्च अनारम्मणो धम्मो उप्पज्जति हेतुपच्चया – सारम्मणे खन्धे पटिच्च चित्तसमुट्ठानं रूपं; पटिसन्धिक्खणे…पे…. (२)
सारम्मणं धम्मं पटिच्च सारम्मणो च अनारम्मणो च धम्मा उप्पज्जन्ति हेतुपच्चया – सारम्मणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… पटिसन्धिक्खणे…पे…. (३)
२. अनारम्मणं धम्मं पटिच्च अनारम्मणो धम्मो उप्पज्जति हेतुपच्चया – एकं महाभूतं…पे… महाभूते पटिच्च चित्तसमुट्ठानं रूपं कटत्तारूपं उपादारूपं. (१)
अनारम्मणं धम्मं पटिच्च सारम्मणो धम्मो उप्पज्जति हेतुपच्चया – पटिसन्धिक्खणे वत्थुं पटिच्च सारम्मणा खन्धा. (२)
अनारम्मणं धम्मं पटिच्च सारम्मणो च अनारम्मणो च धम्मो उप्पज्जन्ति हेतुपच्चया – पटिसन्धिक्खणे वत्थुं पटिच्च सारम्मणा खन्धा, महाभूते पटिच्च कटत्तारूपं. (३)
३. सारम्मणञ्च अनारम्मणञ्च धम्मं पटिच्च सारम्मणो धम्मो उप्पज्जति हेतुपच्चया – पटिसन्धिक्खणे सारम्मणं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे…. (१)
सारम्मणञ्च अनारम्मणञ्च धम्मं पटिच्च अनारम्मणो धम्मो उप्पज्जति हेतुपच्चया – सारम्मणे खन्धे च महाभूते च पटिच्च चित्तसमुट्ठानं रूपं; पटिसन्धिक्खणे…पे…. (२)
सारम्मणञ्च अनारम्मणञ्च धम्मं पटिच्च सारम्मणो च अनारम्मणो च धम्मा उप्पज्जन्ति हेतुपच्चया – पटिसन्धिक्खणे सारम्मणं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे… सारम्मणे खन्धे च महाभूते च पटिच्च कटत्तारूपं. (३)
आरम्मणपच्चयो
४. सारम्मणं धम्मं पटिच्च सारम्मणो धम्मो उप्पज्जति आरम्मणपच्चया – सारम्मणं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे….
अनारम्मणं धम्मं पटिच्च सारम्मणो धम्मो उप्पज्जति आरम्मणपच्चया – पटिसन्धिक्खणे वत्थुं पटिच्च सारम्मणा खन्धा.
सारम्मणञ्च अनारम्मणञ्च धम्मं पटिच्च सारम्मणो धम्मो उप्पज्जति आरम्मणपच्चया – पटिसन्धिक्खणे सारम्मणं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे… (संखित्तं).
१. पच्चयानुलोमं
२. सङ्ख्यावारो
सुद्धं
५. हेतुया नव, आरम्मणे तीणि, अधिपतिया पञ्च, अनन्तरे तीणि, समनन्तरे तीणि, सहजाते नव, अञ्ञमञ्ञे छ, निस्सये नव, उपनिस्सये तीणि, पुरेजाते एकं, आसेवने एकं, कम्मे नव, विपाके नव, आहारे नव, इन्द्रिये नव, झाने नव, मग्गे नव, सम्पयुत्ते तीणि, विप्पयुत्ते नव, अत्थिया नव, नत्थिया तीणि, विगते तीणि, अविगते नव.
२. पच्चयपच्चनीयं
१. विभङ्गवारो
नहेतुपच्चयो
६. सारम्मणं धम्मं पटिच्च सारम्मणो धम्मो उप्पज्जति नहेतुपच्चया – अहेतुकं सारम्मणं एकं खन्धं पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)
सारम्मणं धम्मं पटिच्च अनारम्मणो धम्मो उप्पज्जति नहेतुपच्चया – अहेतुके सारम्मणे खन्धे पटिच्च चित्तसमुट्ठानं रूपं; अहेतुकपटिसन्धिक्खणे…पे…. (२)
सारम्मणं धम्मं पटिच्च सारम्मणो च अनारम्मणो च धम्मा उप्पज्जन्ति नहेतुपच्चया – अहेतुकं सारम्मणं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… अहेतुकपटिसन्धिक्खणे…पे…. (३)
७. अनारम्मणं धम्मं पटिच्च अनारम्मणो धम्मो उप्पज्जति नहेतुपच्चया – एकं महाभूतं…पे… असञ्ञसत्तानं एकं महाभूतं…पे…. (१)
अनारम्मणं धम्मं पटिच्च सारम्मणो धम्मो उप्पज्जति नहेतुपच्चया – अहेतुकपटिसन्धिक्खणे वत्थुं पटिच्च सारम्मणा खन्धा. (२)
अनारम्मणं धम्मं पटिच्च सारम्मणो च अनारम्मणो च धम्मा उप्पज्जन्ति नहेतुपच्चया – अहेतुकपटिसन्धिक्खणे वत्थुं पटिच्च सारम्मणा खन्धा, महाभूते पटिच्च कटत्तारूपं. (३)
८. सारम्मणञ्च अनारम्मणञ्च धम्मं पटिच्च सारम्मणो धम्मो उप्पज्जति नहेतुपच्चया – अहेतुकपटिसन्धिक्खणे सारम्मणं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे…. (१)
सारम्मणञ्च अनारम्मणञ्च धम्मं पटिच्च अनारम्मणो धम्मो उप्पज्जति नहेतुपच्चया – अहेतुके सारम्मणे खन्धे च महाभूते च पटिच्च चित्तसमुट्ठानं रूपं; अहेतुकपटिसन्धिक्खणे…पे…. (२)
सारम्मणञ्च अनारम्मणञ्च धम्मं पटिच्च सारम्मणो च अनारम्मणो च धम्मा उप्पज्जन्ति नहेतुपच्चया – अहेतुकपटिसन्धिक्खणे सारम्मणं एकं खन्धञ्च वत्थुञ्च पटिच्च तयो खन्धा…पे… द्वे खन्धे च…पे… सारम्मणे खन्धे च महाभूते च पटिच्च कटत्तारूपं. (३)
नआरम्मणपच्चयो
९. सारम्मणं धम्मं पटिच्च अनारम्मणो धम्मो उप्पज्जति नआरम्मणपच्चया – सारम्मणे खन्धे पटिच्च चित्तसमुट्ठानं रूपं; पटिसन्धिक्खणे…पे…. (१)
अनारम्मणं धम्मं पटिच्च अनारम्मणो धम्मो उप्पज्जति नआरम्मणपच्चया (याव असञ्ञसत्ता). (१)
सारम्मणञ्च अनारम्मणञ्च धम्मं पटिच्च अनारम्मणो धम्मो उप्पज्जति नआरम्मणपच्चया – सारम्मणे खन्धे च महाभूते च पटिच्च चित्तसमुट्ठानं रूपं; पटिसन्धिक्खणे…पे… (संखित्तं). (१)
२. पच्चयपच्चनीयं
२. सङ्ख्यावारो
सुद्धं
१०. नहेतुया नव, नआरम्मणे तीणि, नअधिपतिया नव, नअनन्तरे तीणि, नसमनन्तरे तीणि, नअञ्ञमञ्ञे तीणि, नउपनिस्सये तीणि, नपुरेजाते नव, नपच्छाजाते नव, नआसेवने नव, नकम्मे द्वे, नविपाके पञ्च, नआहारे एकं, नइन्द्रिये एकं, नझाने द्वे, नमग्गे नव, नसम्पयुत्ते तीणि, नविप्पयुत्ते द्वे, नोनत्थिया तीणि, नोविगते तीणि.
३. पच्चयानुलोमपच्चनीयं
११. हेतुपच्चया नआरम्मणे तीणि, नअधिपतिया नव…पे… नकम्मे एकं…पे… नविप्पयुत्ते एकं (संखित्तं).
४. पच्चयपच्चनीयानुलोमं
१२. नहेतुपच्चया आरम्मणे तीणि…पे… सहजाते नव…पे… मग्गे एकं…पे… अविगते नव.
२. सहजातवारो
(सहजातवारोपि पटिच्चवारसदिसो.)
३. पच्चयवारो
१. पच्चयानुलोमं
१. विभङ्गवारो
हेतुपच्चयो
१३. सारम्मणं धम्मं पच्चया सारम्मणो धम्मो उप्पज्जति हेतुपच्चया… तीणि (पटिच्चसदिसा).
१४. अनारम्मणं धम्मं पच्चया अनारम्मणो धम्मो उप्पज्जति हेतुपच्चया – एकं महाभूतं…पे… महाभूते पच्चया चित्तसमुट्ठानं रूपं कटत्तारूपं उपादारूपं. (१)
अनारम्मणं धम्मं पच्चया सारम्मणो धम्मो उप्पज्जति हेतुपच्चया – वत्थुं पच्चया सारम्मणा खन्धा; पटिसन्धिक्खणे वत्थुं पच्चया सारम्मणा खन्धा. (२)
अनारम्मणं धम्मं पच्चया सारम्मणो च अनारम्मणो च धम्मा उप्पज्जन्ति हेतुपच्चया – वत्थुं पच्चया सारम्मणा खन्धा, महाभूते पच्चया चित्तसमुट्ठानं रूपं; पटिसन्धिक्खणे …पे…. (३)
१५. सारम्मणञ्च अनारम्मणञ्च धम्मं पच्चया सारम्मणो धम्मो उप्पज्जति हेतुपच्चया – सारम्मणं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे…. (१)
सारम्मणञ्च अनारम्मणञ्च धम्मं पच्चया अनारम्मणो धम्मो उप्पज्जति हेतुपच्चया – सारम्मणे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (२)
सारम्मणञ्च अनारम्मणञ्च धम्मं पच्चया सारम्मणो च अनारम्मणो च धम्मा उप्पज्जन्ति हेतुपच्चया – सारम्मणं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… सारम्मणे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (३)
आरम्मणपच्चयो
१६. सारम्मणं धम्मं पच्चया सारम्मणो धम्मो उप्पज्जति आरम्मणपच्चया – सारम्मणं एकं खन्धं पच्चया तयो खन्धा…पे… द्वे खन्धे…पे… पटिसन्धिक्खणे…पे…. (१)
अनारम्मणं धम्मं पच्चया सारम्मणो धम्मो उप्पज्जति आरम्मणपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया सारम्मणा खन्धा; पटिसन्धिक्खणे…पे…. (१)
सारम्मणञ्च अनारम्मणञ्च धम्मं पच्चया सारम्मणो धम्मो उप्पज्जति आरम्मणपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… द्वे खन्धे च…पे… कायविञ्ञाणसहगतं…पे… सारम्मणं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… पटिसन्धिक्खणे…पे… (संखित्तं). (१)
१. पच्चयानुलोमं
२. सङ्ख्यावारो
सुद्धं
१७. हेतुया नव, आरम्मणे तीणि, अधिपतिया नव, अनन्तरे तीणि, समनन्तरे तीणि, सहजाते नव, अञ्ञमञ्ञे छ, निस्सये नव, उपनिस्सये तीणि, पुरेजाते तीणि, आसेवने तीणि, कम्मे नव, विपाके नव, आहारे नव, इन्द्रिये नव, झाने नव, मग्गे नव, सम्पयुत्ते तीणि, विप्पयुत्ते नव, अत्थिया नव, नत्थिया तीणि, विगते तीणि, अविगते नव.
२. पच्चयपच्चनीयं
१. विभङ्गवारो
नहेतुपच्चयो
१८. सारम्मणं धम्मं पच्चया सारम्मणो धम्मो उप्पज्जति नहेतुपच्चया… तीणि (पटिच्चवारसदिसं).
अनारम्मणं धम्मं पच्चया अनारम्मणो धम्मो उप्पज्जति नहेतुपच्चया – एकं महाभूतं…पे… असञ्ञसत्तानं एकं महाभूतं…पे…. (१)
अनारम्मणं धम्मं पच्चया सारम्मणो धम्मो उप्पज्जति नहेतुपच्चया – चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं, वत्थुं पच्चया अहेतुका सारम्मणा खन्धा; पटिसन्धिक्खणे…पे… वत्थुं पच्चया विचिकिच्छासहगतो उद्धच्चसहगतो मोहो. (२)
अनारम्मणं धम्मं पच्चया सारम्मणो च अनारम्मणो च धम्मा उप्पज्जन्ति नहेतुपच्चया – वत्थुं पच्चया अहेतुका सारम्मणा खन्धा, महाभूते पच्चया चित्तसमुट्ठानं रूपं; पटिसन्धिक्खणे…पे…. (३)
१९. सारम्मणञ्च अनारम्मणञ्च धम्मं पच्चया सारम्मणो धम्मो उप्पज्जति नहेतुपच्चया – चक्खुविञ्ञाणसहगतं एकं खन्धञ्च चक्खायतनञ्च पच्चया तयो खन्धा…पे… द्वे खन्धे च…पे… कायविञ्ञाणसहगतं…पे… अहेतुकं सारम्मणं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… अहेतुकपटिसन्धिक्खणे…पे… विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१)
सारम्मणञ्च अनारम्मणञ्च धम्मं पच्चया अनारम्मणो धम्मो उप्पज्जति नहेतुपच्चया – अहेतुके सारम्मणे खन्धे च महाभूते च पच्चया चित्तसमुट्ठानं रूपं; पटिसन्धिक्खणे…पे…. (२)
सारम्मणञ्च अनारम्मणञ्च धम्मं पच्चया सारम्मणो च अनारम्मणो च धम्मा उप्पज्जन्ति नहेतुपच्चया – अहेतुकं सारम्मणं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… अहेतुके सारम्मणे खन्धे च महाभूते च पच्चया चित्तसमुट्ठानं रूपं; अहेतुकपटिसन्धिक्खणे अहेतुकं सारम्मणं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… अहेतुके सारम्मणे खन्धे च महाभूते च पच्चया कटत्तारूपं…पे… (संखित्तं). (३)
२. पच्चयपच्चनीयं
२. सङ्ख्यावारो
सुद्धं
२०. नहेतुया नव, नआरम्मणे तीणि, नअधिपतिया नव, नअनन्तरे तीणि, नसमनन्तरे तीणि, नअञ्ञमञ्ञे तीणि, नउपनिस्सये तीणि, नपुरेजाते नव, नपच्छाजाते नव, नआसेवने नव, नकम्मे चत्तारि, नविपाके नव, नआहारे एकं, नइन्द्रिये एकं, नझाने चत्तारि, नमग्गे नव, नसम्पयुत्ते तीणि, नविप्पयुत्ते द्वे, नोनत्थिया तीणि, नोविगते तीणि.
३. पच्चयानुलोमपच्चनीयं
२१. हेतुपच्चया नआरम्मणे तीणि, नअधिपतिया नव…पे… नकम्मे एकं…पे… नविप्पयुत्ते एकं (संखित्तं).
४. पच्चयपच्चनीयानुलोमं
२२. नहेतुपच्चया आरम्मणे तीणि, अनन्तरे तीणि, समनन्तरे तीणि, सहजाते नव…पे… मग्गे तीणि…पे… अविगते नव.
४. निस्सयवारो
(निस्सयवारो पच्चयवारसदिसो.)
५. संसट्ठवारो
१-४. पच्चयानुलोमादि
२३. सारम्मणं धम्मं संसट्ठो सारम्मणो धम्मो उप्पज्जति हेतुपच्चया – सारम्मणं एकं खन्धं संसट्ठा तयो खन्धा…पे… द्वे खन्धे संसट्ठा द्वे खन्धा; पटिसन्धिक्खणे…पे….
२४. हेतुया एकं, आरम्मणे एकं, अधिपतिया एकं (सब्बत्थ एकं), अविगते एकं.
अनुलोमं.
२५. सारम्मणं धम्मं संसट्ठो सारम्मणो धम्मो उप्पज्जति नहेतुपच्चया – अहेतुकं सारम्मणं एकं खन्धं संसट्ठा तयो खन्धा…पे… द्वे खन्धे…पे… विचिकिच्छासहगते उद्धच्चसहगते खन्धे संसट्ठो विचिकिच्छासहगतो उद्धच्चसहगतो मोहो (संखित्तं).
२६. नहेतुया एकं, नअधिपतिया एकं, नपुरेजाते एकं, नपच्छाजाते एकं, नआसेवने एकं, नकम्मे एकं, नविपाके एकं, नझाने एकं, नमग्गे एकं, नविप्पयुत्ते एकं.
पच्चनीयं.
६. सम्पयुत्तवारो
(एवं इतरे द्वे गणनापि सम्पयुत्तवारापि कातब्बा.)
७. पञ्हावारो
१. पच्चयानुलोमं
१. विभङ्गवारो
हेतुपच्चयो
२७. सारम्मणो धम्मो सारम्मणस्स धम्मस्स हेतुपच्चयेन पच्चयो – सारम्मणा हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे…पे…. (१)
सारम्मणो धम्मो अनारम्मणस्स धम्मस्स हेतुपच्चयेन पच्चयो – सारम्मणा हेतू चित्तसमुट्ठानानं रूपानं हेतुपच्चयेन पच्चयो; पटिसन्धिक्खणे…पे…. (२)
सारम्मणो धम्मो सारम्मणस्स च अनारम्मणस्स च धम्मस्स हेतुपच्चयेन पच्चयो – सारम्मणा हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)
आरम्मणपच्चयो
२८. सारम्मणो धम्मो सारम्मणस्स धम्मस्स आरम्मणपच्चयेन पच्चयो – दानं…पे… सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति; पुब्बे सुचिण्णानि…पे… झाना…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, पहीने किलेसे…पे… विक्खम्भिते किलेसे…पे… पुब्बे समुदाचिण्णे किलेसे जानन्ति, सारम्मणे खन्धे अनिच्चतो…पे… दोमनस्सं उप्पज्जति; चेतोपरियञाणेन सारम्मणचित्तसमङ्गिस्स चित्तं जानाति, आकासानञ्चायतनं विञ्ञाणञ्चायतनस्स…पे… आकिञ्चञ्ञायतनं नेवसञ्ञानासञ्ञायतनस्स…पे… सारम्मणा खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)
२९. अनारम्मणो धम्मो सारम्मणस्स धम्मस्स आरम्मणपच्चयेन पच्चयो – अरिया निब्बानं पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… अनारम्मणा खन्धा इद्धिविधञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)
अधिपतिपच्चयो
३०. सारम्मणो धम्मो सारम्मणस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति, पुब्बे सुचिण्णानि…पे… झाना वुट्ठहित्वा झानं…पे… अरिया मग्गा वुट्ठहित्वा मग्गं गरुं…पे… फलं गरुं…पे… सारम्मणे खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – सारम्मणाधिपति सम्पयुत्तकानं खन्धानं अधिपतिपच्चयेन पच्चयो. (१)
सारम्मणो धम्मो अनारम्मणस्स धम्मस्स अधिपतिपच्चयेन पच्चयो. सहजाताधिपति – सारम्मणाधिपति चित्तसमुट्ठानानं रूपानं अधिपतिपच्चयेन पच्चयो. (२)
सारम्मणो धम्मो सारम्मणस्स च अनारम्मणस्स च धम्मस्स अधिपतिपच्चयेन पच्चयो. सहजाताधिपति – सारम्मणाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (३)
३१. अनारम्मणो धम्मो सारम्मणस्स धम्मस्स अधिपतिपच्चयेन पच्चयो. आरम्मणाधिपति – अरिया निब्बानं गरुं कत्वा पच्चवेक्खन्ति; निब्बानं गोत्रभुस्स, वोदानस्स, मग्गस्स, फलस्स, अधिपतिपच्चयेन पच्चयो; चक्खुं…पे… वत्थुं गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)
अनन्तरपच्चयादि
३२. सारम्मणो धम्मो सारम्मणस्स धम्मस्स अनन्तरपच्चयेन पच्चयो – पुरिमा पुरिमा सारम्मणा…पे… फलसमापत्तिया अनन्तरपच्चयेन पच्चयो… समनन्तरपच्चयेन पच्चयो… एकं… सहजातपच्चयेन पच्चयो… सत्त (पटिच्चवारे सहजातसदिसा)… अञ्ञमञ्ञपच्चयेन पच्चयो… छ (पटिच्चवारे अञ्ञमञ्ञसदिसं)… निस्सयपच्चयेन पच्चयो… सत्त (पच्चयवारे निस्सयसदिसो).
उपनिस्सयपच्चयो
३३. सारम्मणो धम्मो सारम्मणस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… मानं जप्पेति, दिट्ठिं गण्हाति. सीलं…पे… पञ्ञं, रागं…पे… पत्थनं, कायिकं सुखं… कायिकं दुक्खं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति. सद्धा…पे… पञ्ञा, रागो…पे… पत्थना, कायिकं सुखं… कायिकं दुक्खं सद्धाय…पे… पञ्ञाय, रागस्स…पे… पत्थनाय, कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)
अनारम्मणो धम्मो सारम्मणस्स धम्मस्स उपनिस्सयपच्चयेन पच्चयो – आरम्मणूपनिस्सयो, पकतूपनिस्सयो…पे…. पकतूपनिस्सयो – उतुं, भोजनं, सेनासनं उपनिस्साय दानं देति…पे… समापत्तिं उप्पादेति, पाणं हनति…पे… सङ्घं भिन्दति. उतु… भोजनं… सेनासनं सद्धाय…पे… पत्थनाय, कायिकस्स सुखस्स, कायिकस्स दुक्खस्स, मग्गस्स, फलसमापत्तिया उपनिस्सयपच्चयेन पच्चयो. (१)
पुरेजातपच्चयो
३४. अनारम्मणो धम्मो सारम्मणस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु सारम्मणानं खन्धानं पुरेजातपच्चयेन पच्चयो. (१)
पच्छाजातासेवनपच्चया
३५. सारम्मणो धम्मो अनारम्मणस्स धम्मस्स पच्छाजातपच्चयेन पच्चयो… एकं.
सारम्मणो धम्मो सारम्मणस्स धम्मस्स आसेवनपच्चयेन पच्चयो… एकं.
कम्मपच्चयो
३६. सारम्मणो धम्मो सारम्मणस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – सारम्मणा चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे…पे…. नानाक्खणिका – सारम्मणा चेतना विपाकानं खन्धानं कम्मपच्चयेन पच्चयो. (१)
सारम्मणो धम्मो अनारम्मणस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – सारम्मणा चेतना चित्तसमुट्ठानानं रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – सारम्मणा चेतना कटत्तारूपानं कम्मपच्चयेन पच्चयो. (२)
सारम्मणो धम्मो सारम्मणस्स च अनारम्मणस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – सारम्मणा चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – सारम्मणा चेतना विपाकानं खन्धानं कटत्ता च रूपानं कम्मपच्चयेन पच्चयो. (३)
विपाक-आहारपच्चया
३७. सारम्मणो धम्मो सारम्मणस्स धम्मस्स विपाकपच्चयेन पच्चयो… तीणि.
सारम्मणो धम्मो सारम्मणस्स धम्मस्स आहारपच्चयेन पच्चयो… तीणि.
अनारम्मणो धम्मो अनारम्मणस्स धम्मस्स आहारपच्चयेन पच्चयो – कबळीकारो आहारो इमस्स कायस्स आहारपच्चयेन पच्चयो. (१)
इन्द्रियपच्चयो
३८. सारम्मणो धम्मो सारम्मणस्स धम्मस्स इन्द्रियपच्चयेन पच्चयो… तीणि.
अनारम्मणो धम्मो अनारम्मणस्स धम्मस्स इन्द्रियपच्चयेन पच्चयो – रूपजीवितिन्द्रियं कटत्तारूपानं इन्द्रियपच्चयेन पच्चयो. (१)
अनारम्मणो धम्मो सारम्मणस्स धम्मस्स इन्द्रियपच्चयेन पच्चयो – चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स इन्द्रियपच्चयेन पच्चयो. (१)
सारम्मणो च अनारम्मणो च धम्मा सारम्मणस्स धम्मस्स इन्द्रियपच्चयेन पच्चयो – चक्खुन्द्रियञ्च चक्खुविञ्ञाणञ्च चक्खुविञ्ञाणसहगतानं खन्धानं इन्द्रियपच्चयेन पच्चयो…पे… कायिन्द्रियञ्च कायविञ्ञाणञ्च कायविञ्ञाणसहगतानं खन्धानं इन्द्रियपच्चयेन पच्चयो. (१)
झानपच्चयादि
३९. सारम्मणो धम्मो सारम्मणस्स धम्मस्स झानपच्चयेन पच्चयो… तीणि, मग्गपच्चयेन पच्चयो… तीणि, सम्पयुत्तपच्चयेन पच्चयो… एकं.
विप्पयुत्तपच्चयो
४०. सारम्मणो धम्मो अनारम्मणस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)
अनारम्मणो धम्मो सारम्मणस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु सारम्मणानं खन्धानं विप्पयुत्तपच्चयेन पच्चयो. पुरेजातं चक्खायतनं चक्खुविञ्ञाणस्स…पे… कायायतनं कायविञ्ञाणस्स विप्पयुत्तपच्चयेन पच्चयो; वत्थु सारम्मणानं खन्धानं विप्पयुत्तपच्चयेन पच्चयो. (१)
अत्थिपच्चयो
४१. सारम्मणो धम्मो सारम्मणस्स धम्मस्स अत्थिपच्चयेन पच्चयो – सारम्मणो एको खन्धो तिण्णन्नं खन्धानं अत्थिपच्चयेन पच्चयो…पे… द्वे खन्धा…पे… पटिसन्धिक्खणे…पे…. (१)
सारम्मणो धम्मो अनारम्मणस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). (२)
सारम्मणो धम्मो सारम्मणस्स च अनारम्मणस्स च धम्मस्स अत्थिपच्चयेन पच्चयो (पटिच्चसदिसं). (३)
४२. अनारम्मणो धम्मो अनारम्मणस्स धम्मस्स अत्थिपच्चयेन पच्चयो – सहजातं, आहारं, इन्द्रियं. सहजातं – एकं महाभूतं…पे… (याव असञ्ञसत्ता). (१)
अनारम्मणो धम्मो सारम्मणस्स धम्मस्स अत्थिपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु सारम्मणानं खन्धानं अत्थिपच्चयेन पच्चयो. पुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु सारम्मणानं खन्धानं अत्थिपच्चयेन पच्चयो. (२)
४३. सारम्मणो च अनारम्मणो च धम्मा सारम्मणस्स धम्मस्स अत्थिपच्चयेन पच्चयो – सहजातं, पुरेजातं. सहजातो – चक्खुविञ्ञाणसहगतो एको खन्धो च चक्खायतनञ्च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… कायविञ्ञाणसहगतो एको खन्धो च कायायतनञ्च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… सारम्मणो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे… पटिसन्धिक्खणे…पे…. (१)
सारम्मणो च अनारम्मणो च धम्मा अनारम्मणस्स धम्मस्स अत्थिपच्चयेन पच्चयो – सहजातं, पच्छाजातं, आहारं, इन्द्रियं. सहजाता – सारम्मणा खन्धा च महाभूता च चित्तसमुट्ठानानं रूपानं अत्थिपच्चयेन पच्चयो; पटिसन्धिक्खणे…पे…. पच्छाजाता – सारम्मणा खन्धा च कबळीकारो आहारो च इमस्स कायस्स अत्थिपच्चयेन पच्चयो. पच्छाजाता – सारम्मणा खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (२)