१. विभङ्गवारो

हेतुपच्चयो

७०. नोचित्तो धम्मो नोचित्तस्स धम्मस्स हेतुपच्चयेन पच्चयो – नोचित्ता हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (१)

नोचित्तो धम्मो चित्तस्स धम्मस्स हेतुपच्चयेन पच्चयो – नोचित्ता हेतू चित्तस्स हेतुपच्चयेन पच्चयो; पटिसन्धिक्खणे…पे…. (२)

नोचित्तो धम्मो चित्तस्स च नोचित्तस्स च धम्मस्स हेतुपच्चयेन पच्चयो – नोचित्ता हेतू सम्पयुत्तकानं खन्धानं चित्तस्स च चित्तसमुट्ठानानञ्च रूपानं हेतुपच्चयेन पच्चयो; पटिसन्धिक्खणे…पे…. (३)

आरम्मणपच्चयो

७१. चित्तो धम्मो चित्तस्स धम्मस्स आरम्मणपच्चयेन पच्चयो – चित्तं आरब्भ चित्तं उप्पज्जति. (मूलं कातब्बं) चित्तं आरब्भ नोचित्ता खन्धा उप्पज्जन्ति. (मूलं कातब्बं) चित्तं आरब्भ चित्तञ्च सम्पयुत्तका च खन्धा उप्पज्जन्ति. (३)

७२. नोचित्तो धम्मो नोचित्तस्स धम्मस्स आरम्मणपच्चयेन पच्चयो – दानं दत्वा सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ रागो उप्पज्जति…पे… दोमनस्सं उप्पज्जति, पुब्बे सुचिण्णानि…पे… झाना वुट्ठहित्वा झानं…पे… अरिया मग्गा वुट्ठहित्वा मग्गं पच्चवेक्खन्ति, फलं पच्चवेक्खन्ति, निब्बानं पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो; अरिया नोचित्ते पहीने किलेसे पच्चवेक्खन्ति, विक्खम्भिते किलेसे पच्चवेक्खन्ति, पुब्बे समुदाचिण्णे किलेसे जानन्ति, चक्खुं…पे… वत्थुं नोचित्ते खन्धे अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. चेतोपरियञाणेन नोचित्तसमङ्गिस्स चित्तं जानाति, आकासानञ्चायतनं…पे… आकिञ्चञ्ञायतनं…पे… रूपायतनं चक्खुविञ्ञाणसहगतानं खन्धानं…पे… फोट्ठब्बायतनं कायविञ्ञाणसहगतानं खन्धानं…पे… नोचित्ता खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

नोचित्तो धम्मो चित्तस्स धम्मस्स आरम्मणपच्चयेन पच्चयो – दानं दत्वा…पे… (पठमगमनसदिसं निन्नानाकरणं, इमं नानं) रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे… नोचित्ता खन्धा इद्धिविधञाणस्स…पे… आवज्जनाय आरम्मणपच्चयेन पच्चयो. (२)

नोचित्तो धम्मो चित्तस्स च नोचित्तस्स च धम्मस्स आरम्मणपच्चयेन पच्चयो – दानं दत्वा…पे… (पठमगमनसदिसं निन्नानाकरणं, इमं नानं), रूपायतनं चक्खुविञ्ञाणस्स सम्पयुत्तकानञ्च खन्धानं…पे… फोट्ठब्बायतनं कायविञ्ञाणस्स सम्पयुत्तकानञ्च खन्धानं…पे… नोचित्ता खन्धा इद्धिविधञाणस्स…पे… आवज्जनाय आरम्मणपच्चयेन पच्चयो. (३)

चित्तो च नोचित्तो च धम्मा चित्तस्स धम्मस्स आरम्मणपच्चयेन पच्चयो – चित्तञ्च सम्पयुत्तके च खन्धे आरब्भ चित्तं उप्पज्जति… तीणि.

अधिपतिपच्चयो

७३. चित्तो धम्मो चित्तस्स धम्मस्स अधिपतिपच्चयेन पच्चयो. आरम्मणाधिपति – चित्तं गरुं कत्वा चित्तं उप्पज्जति. (१)

चित्तो धम्मो नोचित्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – चित्तं गरुं कत्वा नोचित्ता खन्धा उप्पज्जन्ति. सहजाताधिपति – चित्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (२)

चित्तो धम्मो चित्तस्स च नोचित्तस्स च धम्मस्स अधिपतिपच्चयेन पच्चयो. आरम्मणाधिपति – चित्तं गरुं कत्वा चित्तञ्च सम्पयुत्तका च खन्धा उप्पज्जन्ति. (३)

७४. नोचित्तो धम्मो नोचित्तस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति, पुब्बे…पे… झाना…पे… अरिया मग्गा वुट्ठहित्वा मग्गं गरुं कत्वा पच्चवेक्खन्ति. फलं गरुं कत्वा पच्चवेक्खन्ति, निब्बानं गरुं कत्वा पच्चवेक्खन्ति, निब्बानं गोत्रभुस्स, वोदानस्स, मग्गस्स, फलस्स, अधिपतिपच्चयेन पच्चयो; चक्खुं…पे… वत्थुं नोचित्ते खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – नोचित्ताधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

नोचित्तो धम्मो चित्तस्स धम्मस्स अधिपतिपच्चयेन पच्चयो (द्वेपि गमना पठमगमनसदिसं निन्नानाकरणं. आरम्मणाधिपति सहजाताधिपति कातब्बा). (२)

चित्तो च नोचित्तो च धम्मा चित्तस्स धम्मस्स अधिपतिपच्चयेन पच्चयो… आरम्मणाधिपति (तीणिपि गरुकारम्मणा कातब्बा, आरम्मणाधिपतियेव).

अनन्तरपच्चयादि

७५. चित्तो धम्मो चित्तस्स धम्मस्स अनन्तरपच्चयेन पच्चयो – पुरिमं पुरिमं चित्तं पच्छिमस्स पच्छिमस्स चित्तस्स अनन्तरपच्चयेन पच्चयो. (१)

चित्तो धम्मो नोचित्तस्स धम्मस्स अनन्तरपच्चयेन पच्चयो – पुरिमं पुरिमं चित्तं पच्छिमानं पच्छिमानं नोचित्तानं खन्धानं अनन्तरपच्चयेन पच्चयो; चित्तं वुट्ठानस्स अनन्तरपच्चयेन पच्चयो. (२)

चित्तो धम्मो चित्तस्स च नोचित्तस्स च धम्मस्स अनन्तरपच्चयेन पच्चयो – पुरिमं पुरिमं चित्तं पच्छिमस्स पच्छिमस्स चित्तस्स सम्पयुत्तकानञ्च खन्धानं अनन्तरपच्चयेन पच्चयो. (३)

७६. नोचित्तो धम्मो नोचित्तस्स धम्मस्स अनन्तरपच्चयेन पच्चयो – पुरिमा पुरिमा नोचित्ता खन्धा…पे… फलसमापत्तिया अनन्तरपच्चयेन पच्चयो (इमे द्वे पूरेतुकामेन कातब्बा, पुरिमगमनसदिसं).

चित्तो च नोचित्तो च धम्मा चित्तस्स धम्मस्स अनन्तरपच्चयेन पच्चयो – पुरिमं पुरिमं चित्तञ्च सम्पयुत्तका च खन्धा पच्छिमस्स पच्छिमस्स चित्तस्स अनन्तरपच्चयेन पच्चयो. (मूलं पुच्छितब्बं) पुरिमं पुरिमं चित्तञ्च सम्पयुत्तका च खन्धा पच्छिमानं पच्छिमानं नोचित्तानं खन्धानं अनन्तरपच्चयेन पच्चयो – चित्तञ्च सम्पयुत्तका च खन्धा वुट्ठानस्स अनन्तरपच्चयेन पच्चयो. (मूलं पुच्छितब्बं) पुरिमं पुरिमं चित्तञ्च सम्पयुत्तका च खन्धा पच्छिमस्स पच्छिमस्स चित्तस्स सम्पयुत्तकानञ्च खन्धानं अनन्तरपच्चयेन पच्चयो. (३)

समनन्तरपच्चयेन पच्चयो… सहजातपच्चयेन पच्चयो… अञ्ञमञ्ञपच्चयेन पच्चयो (पटिच्चवारसदिसा)… निस्सयपच्चयेन पच्चयो… पञ्च (पच्चयवारसदिसा).

उपनिस्सयपच्चयो

७७. चित्तो धम्मो चित्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – चित्तं चित्तस्स उपनिस्सयपच्चयेन पच्चयो… तीणि.

नोचित्तो धम्मो नोचित्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति…पे… मानं जप्पेति, दिट्ठिं गण्हाति; सीलं…पे… सेनासनं उपनिस्साय दानं देति …पे… सङ्घं भिन्दति; सद्धा…पे… सेनासनं सद्धाय…पे… मग्गस्स, फलसमापत्तिया उपनिस्सयपच्चयेन पच्चयो. (१)

नोचित्तो धम्मो चित्तस्स धम्मस्स उपनिस्सयपच्चयेन पच्चयो (इमे द्वेपि पूरेतुकामेन सब्बत्थ कातब्बा, पठमगमनसदिसं निन्नानाकरणं).

चित्तो च नोचित्तो च धम्मा चित्तस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – चित्तञ्च सम्पयुत्तका च खन्धा चित्तस्स उपनिस्सयपच्चयेन पच्चयो… तीणि.

पुरेजातपच्चयो

७८. नोचित्तो धम्मो नोचित्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणसहगतानं खन्धानं…पे… फोट्ठब्बायतनं कायविञ्ञाणसहगतानं खन्धानं पुरेजातपच्चयेन पच्चयो. वत्थुपुरेजातं – चक्खायतनं चक्खुविञ्ञाणसहगतानं खन्धानं…पे… कायायतनं…पे… वत्थु नोचित्तानं खन्धानं पुरेजातपच्चयेन पच्चयो. (१)

नोचित्तो धम्मो चित्तस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स …पे… कायायतनं कायविञ्ञाणस्स…पे… वत्थु चित्तस्स पुरेजातपच्चयेन पच्चयो. (२)

नोचित्तो धम्मो चित्तस्स च नोचित्तस्स च धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… वत्थुं अनिच्चतो…पे… दोमनस्सं उप्पज्जति; दिब्बेन चक्खुना रूपं पस्सति, दिब्बाय सोतधातुया सद्दं सुणाति. रूपायतनं चक्खुविञ्ञाणस्स च सम्पयुत्तकानञ्च खन्धानं…पे… फोट्ठब्बायतनं…पे…. वत्थुपुरेजातं – चक्खायतनं चक्खुविञ्ञाणस्स सम्पयुत्तकानञ्च खन्धानं पुरेजातपच्चयेन पच्चयो…पे… कायायतनं कायविञ्ञाणस्स सम्पयुत्तकानञ्च खन्धानं…पे… वत्थु चित्तस्स च सम्पयुत्तकानञ्च खन्धानं पुरेजातपच्चयेन पच्चयो. (३)

पच्छाजातासेवनपच्चया

७९. चित्तो धम्मो नोचित्तस्स धम्मस्स पच्छाजातपच्चयेन पच्चयो (संखित्तं). (१)

नोचित्तो धम्मो नोचित्तस्स धम्मस्स पच्छाजातपच्चयेन पच्चयो (संखित्तं). (१)

चित्तो च नोचित्तो च धम्मा नोचित्तस्स धम्मस्स पच्छाजातपच्चयेन पच्चयो (संखित्तं). (१)

चित्तो धम्मो चित्तस्स धम्मस्स आसेवनपच्चयेन पच्चयो… नव.

कम्मपच्चयो

८०. नोचित्तो धम्मो नोचित्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नोचित्ता चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोचित्ता चेतना विपाकानं खन्धानं कटत्ता च रूपानं कम्मपच्चयेन पच्चयो. (१)

नोचित्तो धम्मो चित्तस्स धम्मस्स कम्मपच्चयेन पच्चयो – सहजाता, नानाक्खणिका. सहजाता – नोचित्ता चेतना चित्तस्स कम्मपच्चयेन पच्चयो; पटिसन्धिक्खणे…पे…. नानाक्खणिका – नोचित्ता चेतना विपाकस्स चित्तस्स कम्मपच्चयेन पच्चयो. (२)

नोचित्तो धम्मो चित्तस्स च नोचित्तस्स च धम्मस्स कम्मपच्चयेन पच्चयो – सहजाता, नानाक्खणिका. सहजाता – नोचित्ता चेतना सम्पयुत्तकानं खन्धानं चित्तस्स च चित्तसमुट्ठानानञ्च रूपानं कम्मपच्चयेन पच्चयो; पटिसन्धिक्खणे…पे…. नानाक्खणिका – नोचित्ता चेतना विपाकानं खन्धानं चित्तस्स च कटत्ता च रूपानं कम्मपच्चयेन पच्चयो. (३)

विपाकपच्चयादि

८१. चित्तो धम्मो नोचित्तस्स धम्मस्स विपाकपच्चयेन पच्चयो… पञ्च… आहारपच्चयेन पच्चयो… पञ्च… इन्द्रियपच्चयेन पच्चयो… पञ्च. नोचित्तो धम्मो नोचित्तस्स धम्मस्स झानपच्चयेन पच्चयो… तीणि… मग्गपच्चयेन पच्चयो… तीणि… सम्पयुत्तपच्चयेन पच्चयो… पञ्च.

विप्पयुत्तपच्चयो

८२. चित्तो धम्मो नोचित्तस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

नोचित्तो धम्मो नोचित्तस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – नोचित्ता खन्धा चित्तसमुट्ठानानं रूपानं विप्पयुत्तपच्चयेन पच्चयो; पटिसन्धिक्खणे नोचित्ता खन्धा कटत्तारूपानं…पे… नोचित्ता खन्धा वत्थुस्स विप्पयुत्तपच्चयेन पच्चयो; वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणसहगतानं खन्धानं…पे… कायायतनं कायविञ्ञाणसहगतानं खन्धानं…पे… वत्थु नोचित्तानं खन्धानं विप्पयुत्तपच्चयेन पच्चयो. पच्छाजाता – नोचित्ता खन्धा पुरेजातस्स इमस्स कायस्स विप्पयुत्तपच्चयेन पच्चयो. (१)

नोचित्तो धम्मो चित्तस्स धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु चित्तस्स विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु चित्तस्स विप्पयुत्तपच्चयेन पच्चयो. (२)

नोचित्तो धम्मो चित्तस्स च नोचित्तस्स च धम्मस्स विप्पयुत्तपच्चयेन पच्चयो – सहजातं, पुरेजातं. सहजातं – पटिसन्धिक्खणे वत्थु चित्तस्स सम्पयुत्तकानञ्च खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स सम्पयुत्तकानञ्च खन्धानं विप्पयुत्तपच्चयेन पच्चयो…पे… कायायतनं कायविञ्ञाणस्स सम्पयुत्तकानञ्च खन्धानं…पे… वत्थु चित्तस्स च सम्पयुत्तकानञ्च खन्धानं विप्पयुत्तपच्चयेन पच्चयो. (३)

चित्तो च नोचित्तो च धम्मा नोचित्तस्स धम्मस्स विप्पयुत्तपच्चयेन पच्चयो – सहजातं, पच्छाजातं (संखित्तं). (१)

अत्थिपच्चयो

८३. चित्तो धम्मो नोचित्तस्स धम्मस्स अत्थिपच्चयेन पच्चयो – सहजातं, पच्छाजातं (संखित्तं). (१)

नोचित्तो धम्मो नोचित्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं). (१)

नोचित्तो धम्मो चित्तस्स धम्मस्स अत्थिपच्चयेन पच्चयो – सहजातं, पुरेजातं. सहजाता – नोचित्ता खन्धा चित्तस्स अत्थिपच्चयेन पच्चयो; पटिसन्धिक्खणे…पे… पटिसन्धिक्खणे वत्थु चित्तस्स अत्थिपच्चयेन पच्चयो. पुरेजातं – चक्खुं…पे… वत्थुं अनिच्चतो…पे… (पुरेजातसदिसं, संखित्तं). (२)

नोचित्तो धम्मो चित्तस्स च नोचित्तस्स च धम्मस्स अत्थिपच्चयेन पच्चयो – सहजातं, पुरेजातं. सहजातो – नोचित्तो एको खन्धो द्विन्नं खन्धानं चित्तस्स च चित्तसमुट्ठानानञ्च रूपानं अत्थिपच्चयेन पच्चयो; पटिसन्धिक्खणे नोचित्तो एको खन्धो…पे… पटिसन्धिक्खणे वत्थु चित्तस्स सम्पयुत्तकानञ्च खन्धानं अत्थिपच्चयेन पच्चयो. पुरेजातं – चक्खुं…पे… वत्थुं…पे… (पुरेजातसदिसं, संखित्तं). (३)

८४. चित्तो च नोचित्तो च धम्मा नोचित्तस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं. सहजातो – नोचित्तो एको खन्धो च चित्तञ्च द्विन्नं खन्धानं चित्तसमुट्ठानानञ्च रूपानं अत्थिपच्चयेन पच्चयो; द्वे खन्धा च…पे…. सहजातं – चित्तञ्च वत्थुञ्च नोचित्तानं खन्धानं अत्थिपच्चयेन पच्चयो (पटिसन्धिक्खणेपि द्वे). सहजातं – चित्तञ्च सम्पयुत्तका च खन्धा चित्तसमुट्ठानानं रूपानं अत्थिपच्चयेन पच्चयो. सहजातं – चित्तञ्च महाभूता च चित्तसमुट्ठानानं रूपानं अत्थिपच्चयेन पच्चयो (पटिसन्धिक्खणेपि द्वे). पच्छाजातं – चित्तञ्च सम्पयुत्तका च खन्धा पुरेजातस्स इमस्स कायस्स अत्थिपच्चयेन पच्चयो. पच्छाजातं – चित्तञ्च सम्पयुत्तका च खन्धा कबळीकारो आहारो च इमस्स कायस्स अत्थिपच्चयेन पच्चयो. पच्छाजातं – चित्तञ्च सम्पयुत्तका च खन्धा रूपजीवितिन्द्रियञ्च कटत्तारूपानं अत्थिपच्चयेन पच्चयो. (१)