१. विभङ्गवारो

हेतुपच्चयो

६१. चित्तं धम्मं पच्चया नोचित्तो धम्मो उप्पज्जति हेतुपच्चया – चित्तं पच्चया सम्पयुत्तका खन्धा चित्तसमुट्ठानञ्च रूपं; पटिसन्धिक्खणे…पे…. (१)

नोचित्तं धम्मं पच्चया नोचित्तो धम्मो उप्पज्जति हेतुपच्चया – नोचित्तं एकं खन्धं पच्चया द्वे खन्धा चित्तसमुट्ठानञ्च रूपं, द्वे खन्धे…पे… पटिसन्धिक्खणे…पे… (याव महाभूता), वत्थुं पच्चया नोचित्ता खन्धा. (१)

नोचित्तं धम्मं पच्चया चित्तो धम्मो उप्पज्जति हेतुपच्चया – नोचित्ते खन्धे पच्चया चित्तं, वत्थुं पच्चया चित्तं; पटिसन्धिक्खणे नोचित्ते खन्धे पच्चया चित्तं, पटिसन्धिक्खणे वत्थुं पच्चया चित्तं. (२)

नोचित्तं धम्मं पच्चया चित्तो च नोचित्तो च धम्मा उप्पज्जन्ति हेतुपच्चया – नोचित्तं एकं खन्धं पच्चया द्वे खन्धा चित्तञ्च चित्तसमुट्ठानञ्च रूपं, द्वे खन्धे…पे… वत्थुं पच्चया चित्तञ्च सम्पयुत्तका च खन्धा; पटिसन्धिक्खणे नोचित्तं एकं खन्धं पच्चया द्वे खन्धा चित्तञ्च कटत्ता च रूपं, द्वे खन्धे…पे… पटिसन्धिक्खणे वत्थुं पच्चया चित्तञ्च सम्पयुत्तका च खन्धा. (३)

चित्तञ्च नोचित्तञ्च धम्मं पच्चया नोचित्तो धम्मो उप्पज्जति हेतुपच्चया – नोचित्तं एकं खन्धञ्च चित्तञ्च पच्चया द्वे खन्धा चित्तसमुट्ठानञ्च रूपं, द्वे खन्धे च…पे… चित्तञ्च महाभूते च पच्चया चित्तसमुट्ठानं रूपं, चित्तञ्च वत्थुञ्च पच्चया नोचित्ता खन्धा, पटिसन्धिक्खणे नोचित्तं एकं खन्धञ्च चित्तञ्च पच्चया द्वे खन्धा कटत्ता च रूपं, द्वे खन्धे च…पे… पटिसन्धिक्खणे चित्तञ्च महाभूते च पच्चया कटत्तारूपं; पटिसन्धिक्खणे चित्तञ्च वत्थुञ्च पच्चया नोचित्ता खन्धा. (१)

आरम्मणपच्चयो

६२. चित्तं धम्मं पच्चया नोचित्तो धम्मो उप्पज्जति आरम्मणपच्चया… एकं (पटिच्चवारसदिसं).

नोचित्तं धम्मं पच्चया नोचित्तो धम्मो उप्पज्जति आरम्मणपच्चया – नोचित्तं एकं खन्धं पच्चया द्वे खन्धा, द्वे खन्धे…पे… पटिसन्धिक्खणे…पे… पटिसन्धिक्खणे वत्थुं पच्चया खन्धा, चक्खायतनं पच्चया चक्खुविञ्ञाणसहगता खन्धा…पे… कायायतनं पच्चया कायविञ्ञाणसहगता खन्धा, वत्थुं पच्चया नोचित्ता खन्धा. (१)

नोचित्तं धम्मं पच्चया चित्तो धम्मो उप्पज्जति आरम्मणपच्चया – नोचित्ते खन्धे पच्चया चित्तं, वत्थुं पच्चया चित्तं; पटिसन्धिक्खणे नोचित्ते खन्धे पच्चया चित्तं, पटिसन्धिक्खणे वत्थुं पच्चया चित्तं, चक्खायतनं पच्चया चक्खुविञ्ञाणं…पे… कायायतनं पच्चया कायविञ्ञाणं. (२)

नोचित्तं धम्मं पच्चया चित्तो च नोचित्तो च धम्मा उप्पज्जन्ति आरम्मणपच्चया – नोचित्तं एकं खन्धं पच्चया द्वे खन्धा चित्तञ्च, द्वे खन्धे…पे… वत्थुं पच्चया चित्तञ्च सम्पयुत्तका च खन्धा; पटिसन्धिक्खणे…पे… पटिसन्धिक्खणे वत्थुं पच्चया चित्तञ्च सम्पयुत्तका च खन्धा, चक्खायतनं पच्चया चक्खुविञ्ञाणं सम्पयुत्तका च खन्धा…पे… कायायतनं पच्चया कायविञ्ञाणं सम्पयुत्तका च खन्धा. (३)

चित्तञ्च नोचित्तञ्च धम्मं पच्चया नोचित्तो धम्मो उप्पज्जति आरम्मणपच्चया – नोचित्तं एकं खन्धञ्च चित्तञ्च पच्चया द्वे खन्धा, द्वे खन्धे च…पे… चित्तञ्च वत्थुञ्च पच्चया नोचित्ता खन्धा, पटिसन्धिक्खणे…पे… पटिसन्धिक्खणे चित्तञ्च वत्थुञ्च पच्चया नोचित्ता खन्धा, चक्खायतनञ्च चक्खुविञ्ञाणञ्च पच्चया चक्खुविञ्ञाणसहगता खन्धा…पे… कायायतनं च…पे… (संखित्तं). (१)