१. विभङ्गवारो

नहेतुपच्चयो

५३. चित्तं धम्मं पटिच्च नोचित्तो धम्मो उप्पज्जति नहेतुपच्चया – अहेतुकं चित्तं पटिच्च सम्पयुत्तका खन्धा चित्तसमुट्ठानञ्च रूपं; अहेतुकपटिसन्धिक्खणे चित्तं…पे… विचिकिच्छासहगतं उद्धच्चसहगतं चित्तं पटिच्च विचिकिच्छासहगतो उद्धच्चसहगतो मोहो. (१)

नोचित्तं धम्मं पटिच्च नोचित्तो धम्मो उप्पज्जति नहेतुपच्चया – अहेतुकं नोचित्तं एकं खन्धं पटिच्च द्वे खन्धा चित्तसमुट्ठानञ्च रूपं, द्वे खन्धे…पे… अहेतुकपटिसन्धिक्खणे …पे… (याव असञ्ञसत्ता) विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

नोचित्तं धम्मं पटिच्च चित्तो धम्मो उप्पज्जति नहेतुपच्चया – अहेतुके नोचित्ते खन्धे पटिच्च चित्तं; अहेतुकपटिसन्धिक्खणे नोचित्ते खन्धे पटिच्च चित्तं; अहेतुकपटिसन्धिक्खणे वत्थुं पटिच्च चित्तं. (२)

नोचित्तं धम्मं पटिच्च चित्तो च नोचित्तो च धम्मा उप्पज्जन्ति नहेतुपच्चया – अहेतुकं नोचित्तं एकं खन्धं पटिच्च द्वे खन्धा चित्तञ्च चित्तसमुट्ठानञ्च रूपं, द्वे खन्धे…पे… अहेतुकपटिसन्धिक्खणे…पे… अहेतुकपटिसन्धिक्खणे वत्थुं पटिच्च चित्तञ्च सम्पयुत्तका च खन्धा. (३)

चित्तञ्च नोचित्तञ्च धम्मं पटिच्च नोचित्तो धम्मो उप्पज्जति नहेतुपच्चया – अहेतुकं नोचित्तं एकं खन्धञ्च चित्तञ्च पटिच्च द्वे खन्धा चित्तसमुट्ठानञ्च रूपं, द्वे खन्धे च…पे… अहेतुकपटिसन्धिक्खणे नोचित्तं एकं खन्धञ्च चित्तञ्च पटिच्च द्वे खन्धा कटत्ता च रूपं, द्वे खन्धे च…पे… अहेतुकपटिसन्धिक्खणे चित्तञ्च वत्थुञ्च पटिच्च नोचित्ता खन्धा, विचिकिच्छासहगतं उद्धच्चसहगतं चित्तञ्च सम्पयुत्तके च खन्धे पटिच्च विचिकिच्छासहगतो उद्धच्चसहगतो मोहो. (१)

नआरम्मणपच्चयो

५४. चित्तं धम्मं पटिच्च नोचित्तो धम्मो उप्पज्जति नआरम्मणपच्चया – चित्तं पटिच्च चित्तसमुट्ठानं रूपं; पटिसन्धिक्खणे…पे…. (१)

नोचित्तं धम्मं पटिच्च नोचित्तो धम्मो उप्पज्जति नआरम्मणपच्चया – नोचित्ते खन्धे पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (२)

चित्तञ्च नोचित्तञ्च धम्मं पटिच्च नोचित्तो धम्मो उप्पज्जति नआरम्मणपच्चया – चित्तञ्च सम्पयुत्तके च खन्धे पटिच्च चित्तसमुट्ठानं रूपं, चित्तञ्च महाभूते च पटिच्च चित्तसमुट्ठानं रूपं; पटिसन्धिक्खणे चित्तञ्च सम्पयुत्तके च खन्धे पटिच्च कटत्तारूपं, चित्तञ्च महाभूते च पटिच्च कटत्तारूपं. (१)

नअधिपतिपच्चयादि

५५. चित्तं धम्मं पटिच्च नोचित्तो धम्मो उप्पज्जति नअधिपतिपच्चया … पञ्च… नअनन्तरपच्चया…पे… नउपनिस्सयपच्चया… तीणि.

नपुरेजातपच्चयादि

५६. चित्तं धम्मं पटिच्च नोचित्तो धम्मो उप्पज्जति नपुरेजातपच्चया – अरूपे चित्तं पटिच्च सम्पयुत्तका खन्धा, चित्तं पटिच्च चित्तसमुट्ठानं रूपं; पटिसन्धिक्खणे चित्तं पटिच्च सम्पयुत्तका खन्धा कटत्ता च रूपं. (१)

नोचित्तं धम्मं पटिच्च नोचित्तो धम्मो उप्पज्जति नपुरेजातपच्चया – अरूपे नोचित्तं एकं खन्धं पटिच्च द्वे खन्धा, द्वे खन्धे…पे… नोचित्ते खन्धे पटिच्च चित्तसमुट्ठानं रूपं; पटिसन्धिक्खणे…पे… (याव असञ्ञसत्ता). (१)

नोचित्तं धम्मं पटिच्च चित्तो धम्मो उप्पज्जति नपुरेजातपच्चया – अरूपे नोचित्ते खन्धे पटिच्च चित्तं; पटिसन्धिक्खणे… वत्थुं पटिच्च चित्तं. (२)

नोचित्तं धम्मं पटिच्च चित्तो च नोचित्तो च धम्मा उप्पज्जन्ति नपुरेजातपच्चया – अरूपे नोचित्तं एकं खन्धं पटिच्च द्वे खन्धा चित्तञ्च, द्वे खन्धे…पे… पटिसन्धिक्खणे वत्थुं पटिच्च चित्तञ्च सम्पयुत्तका च खन्धा. (३)

चित्तञ्च नोचित्तञ्च धम्मं पटिच्च नोचित्तो धम्मो उप्पज्जति नपुरेजातपच्चया – अरूपे नोचित्तं एकं खन्धञ्च चित्तञ्च पटिच्च द्वे खन्धा, द्वे खन्धे च…पे… नोचित्ते खन्धे च चित्तञ्च पटिच्च चित्तसमुट्ठानं रूपं, चित्तञ्च महाभूते च पटिच्च चित्तसमुट्ठानं रूपं; पटिसन्धिक्खणे चित्तञ्च वत्थुञ्च पटिच्च नोचित्ता खन्धा; पटिसन्धिक्खणे चित्तञ्च सम्पयुत्तके च खन्धे पटिच्च कटत्तारूपं, चित्तञ्च महाभूते च पटिच्च कटत्तारूपं. (१)

नपच्छाजातपच्चया… नआसेवनपच्चया….

नकम्मपच्चयो

५७. चित्तं धम्मं पटिच्च नोचित्तो धम्मो उप्पज्जति नकम्मपच्चया – चित्तं पटिच्च सम्पयुत्तका चेतना. (१)

नोचित्तं धम्मं पटिच्च नोचित्तो धम्मो उप्पज्जति नकम्मपच्चया – नोचित्ते खन्धे पटिच्च सम्पयुत्तका चेतना; बाहिरं… आहारसमुट्ठानं… उतुसमुट्ठानं…पे…. (१)

चित्तञ्च नोचित्तञ्च धम्मं पटिच्च नोचित्तो धम्मो उप्पज्जति नकम्मपच्चया – नोचित्ते खन्धे च चित्तञ्च पटिच्च सम्पयुत्तका चेतना (संखित्तं). (१)