१. विभङ्गवारो

हेतुपच्चयो

४४५. उपादिन्नो धम्मो उपादिन्नस्स धम्मस्स हेतुपच्चयेन पच्चयो – उपादिन्ना हेतू सम्पयुत्तकानं खन्धानं हेतुपच्चयेन पच्चयो; पटिसन्धिक्खणे उपादिन्ना हेतू सम्पयुत्तकानं खन्धानं कटत्ता च रूपानं हेतुपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स हेतुपच्चयेन पच्चयो – उपादिन्ना हेतू चित्तसमुट्ठानानं रूपानं हेतुपच्चयेन पच्चयो. (२)

उपादिन्नो धम्मो उपादिन्नस्स च अनुपादिन्नस्स च धम्मस्स हेतुपच्चयेन पच्चयो – उपादिन्ना हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (३)

अनुपादिन्नो धम्मो अनुपादिन्नस्स धम्मस्स हेतुपच्चयेन पच्चयो – अनुपादिन्ना हेतू सम्पयुत्तकानं खन्धानं चित्तसमुट्ठानानञ्च रूपानं हेतुपच्चयेन पच्चयो. (१)

आरम्मणपच्चयो

४४६. उपादिन्नो धम्मो उपादिन्नस्स धम्मस्स आरम्मणपच्चयेन पच्चयो – चक्खुं…पे… कायं उपादिन्ने रूपे… गन्धे… रसे… फोट्ठब्बे… वत्थुं उपादिन्ने खन्धे अनिच्चतो…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति, उपादिन्नं रूपायतनं चक्खुविञ्ञाणस्स…पे… उपादिन्नं गन्धायतनं घानविञ्ञाणस्स…पे… फोट्ठब्बायतनं कायविञ्ञाणस्स आरम्मणपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स आरम्मणपच्चयेन पच्चयो – चक्खुं…पे… कायं उपादिन्ने रूपे… गन्धे… रसे… फोट्ठब्बे… वत्थुं उपादिन्ने खन्धे अनिच्चतो…पे… दोमनस्सं उप्पज्जति; दिब्बेन चक्खुना उपादिन्नं रूपं पस्सति. चेतोपरियञाणेन उपादिन्नचित्तसमङ्गिस्स चित्तं जानाति, उपादिन्ना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, अनागतंसञाणस्स, आवज्जनाय आरम्मणपच्चयेन पच्चयो. (२)

४४७. अनुपादिन्नो धम्मो अनुपादिन्नस्स धम्मस्स आरम्मणपच्चयेन पच्चयो – दानं …पे… सीलं…पे… उपोसथकम्मं कत्वा तं पच्चवेक्खति अस्सादेति अभिनन्दति, तं आरब्भ रागो…पे… दोमनस्सं उप्पज्जति; पुब्बे सुचिण्णानि…पे… झाना…पे… अरिया मग्गा वुट्ठहित्वा मग्गं पच्चवेक्खन्ति, फलं…पे… निब्बानं…पे… निब्बानं गोत्रभुस्स, वोदानस्स, मग्गस्स, फलस्स, आवज्जनाय आरम्मणपच्चयेन पच्चयो. अरिया पहीने किलेसे…पे… विक्खम्भिते किलेसे…पे… पुब्बे…पे… अनुपादिन्ने रूपे… सद्दे… गन्धे… रसे… फोट्ठब्बे अनुपादिन्ने खन्धे अनिच्चतो…पे… दोमनस्सं उप्पज्जति; दिब्बेन चक्खुना अनुपादिन्नं रूपं पस्सति, दिब्बाय सोतधातुया सद्दं सुणाति. चेतोपरियञाणेन अनुपादिन्नचित्तसमङ्गिस्स चित्तं जानाति, आकासानञ्चायतनं…पे… आकिञ्चञ्ञायतनं…पे… अनुपादिन्ना खन्धा इद्धिविधञाणस्स, चेतोपरियञाणस्स, पुब्बेनिवासानुस्सतिञाणस्स, यथाकम्मूपगञाणस्स, अनागतंसञाणस्स, आवज्जनाय आरम्मणपच्चयेन पच्चयो. (१)

अनुपादिन्नो धम्मो उपादिन्नस्स धम्मस्स आरम्मणपच्चयेन पच्चयो – अनुपादिन्ने रूपे… सद्दे… गन्धे… रसे… फोट्ठब्बे अनुपादिन्ने खन्धे अनिच्चतो…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति, आकासानञ्चायतनकुसलं विञ्ञाणञ्चायतनविपाकस्स…पे… आकिञ्चञ्ञायतनकुसलं…पे… अनुपादिन्नं रूपायतनं चक्खुविञ्ञाणस्स…पे… सद्दायतनं…पे… फोट्ठब्बायतनं कायविञ्ञाणस्स आरम्मणपच्चयेन पच्चयो. (२)

अधिपतिपच्चयो

४४८. उपादिन्नो धम्मो अनुपादिन्नस्स धम्मस्स अधिपतिपच्चयेन पच्चयो. आरम्मणाधिपति – चक्खुं…पे… कायं उपादिन्ने रूपे… गन्धे… रसे… फोट्ठब्बे… वत्थुं उपादिन्ने खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. (१)

अनुपादिन्नो धम्मो अनुपादिन्नस्स धम्मस्स अधिपतिपच्चयेन पच्चयो – आरम्मणाधिपति, सहजाताधिपति. आरम्मणाधिपति – दानं…पे… सीलं…पे… उपोसथकम्मं कत्वा तं गरुं कत्वा पच्चवेक्खति अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति, पुब्बे…पे… झाना…पे… अरिया मग्गा वुट्ठहित्वा मग्गं गरुं कत्वा पच्चवेक्खन्ति, फलं…पे… निब्बानं गरुं कत्वा पच्चवेक्खन्ति. निब्बानं गोत्रभुस्स, वोदानस्स, मग्गस्स, फलस्स, अधिपतिपच्चयेन पच्चयो; अनुपादिन्ने रूपे… सद्दे… गन्धे… रसे… फोट्ठब्बे अनुपादिन्ने खन्धे गरुं कत्वा अस्सादेति अभिनन्दति, तं गरुं कत्वा रागो उप्पज्जति, दिट्ठि उप्पज्जति. सहजाताधिपति – अनुपादिन्नाधिपति सम्पयुत्तकानं खन्धानं चित्तसमुट्ठानानञ्च रूपानं अधिपतिपच्चयेन पच्चयो. (१)

अनन्तरपच्चयो

४४९. उपादिन्नो धम्मो उपादिन्नस्स धम्मस्स अनन्तरपच्चयेन पच्चयो – पुरिमा पुरिमा उपादिन्ना खन्धा पच्छिमानं पच्छिमानं उपादिन्नानं खन्धानं अनन्तरपच्चयेन पच्चयो. पञ्चविञ्ञाणं विपाकमनोधातुया अनन्तरपच्चयेन पच्चयो. विपाकमनोधातु विपाकमनोविञ्ञाणधातुया अनन्तरपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स अनन्तरपच्चयेन पच्चयो – भवङ्गं आवज्जनाय, विपाकमनोविञ्ञाणधातु किरियमनोविञ्ञाणधातुया अनन्तरपच्चयेन पच्चयो. (२)

४५०. अनुपादिन्नो धम्मो अनुपादिन्नस्स धम्मस्स अनन्तरपच्चयेन पच्चयो – पुरिमा पुरिमा अनुपादिन्ना खन्धा पच्छिमानं पच्छिमानं अनुपादिन्नानं खन्धानं अनन्तरपच्चयेन पच्चयो, अनुलोमं गोत्रभुस्स…पे… फलसमापत्तिया अनन्तरपच्चयेन पच्चयो. (१)

अनुपादिन्नो धम्मो उपादिन्नस्स धम्मस्स अनन्तरपच्चयेन पच्चयो – आवज्जना पञ्चन्नं विञ्ञाणानं…पे… अनुपादिन्ना खन्धा वुट्ठानस्स अनन्तरपच्चयेन पच्चयो… समनन्तरपच्चयेन पच्चयो… सहजातपच्चयेन पच्चयो… पञ्च (पटिच्चसदिसा)… अञ्ञमञ्ञपच्चयेन पच्चयो… द्वे (पटिच्चसदिसा)… निस्सयपच्चयेन पच्चयो (पच्चयवारे निस्सयसदिसा) पञ्च.

उपनिस्सयपच्चयो

४५१. उपादिन्नो धम्मो उपादिन्नस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं कायिकस्स सुखस्स… कायिकस्स दुक्खस्स उपनिस्सयपच्चयेन पच्चयो; कायिकं दुक्खं… उपादिन्नं उतु… भोजनं कायिकस्स सुखस्स… कायिकस्स दुक्खस्स उपनिस्सयपच्चयेन पच्चयो; कायिकं सुखं… कायिकं दुक्खं… उतु… भोजनं… कायिकस्स सुखस्स… कायिकस्स दुक्खस्स उपनिस्सयपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – कायिकं सुखं उपनिस्साय दानं देति…पे… सङ्घं भिन्दति; कायिकं दुक्खं… उपादिन्नं उतुं… भोजनं उपनिस्साय दानं देति…पे… समापत्तिं उप्पादेति; पाणं हनति…पे… सङ्घं भिन्दति; कायिकं सुखं… कायिकं दुक्खं… उतु… भोजनं सद्धाय…पे… पत्थनाय मग्गस्स, फलसमापत्तिया उपनिस्सयपच्चयेन पच्चयो. (२)

४५२. अनुपादिन्नो धम्मो अनुपादिन्नस्स धम्मस्स उपनिस्सयपच्चयेन पच्चयो – आरम्मणूपनिस्सयो, अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय दानं देति, मानं जप्पेति, दिट्ठिं गण्हाति; सीलं…पे… पत्थनं… उतुं… भोजनं… सेनासनं उपनिस्साय दानं देति…पे… सङ्घं भिन्दति; सद्धा…पे… पत्थना… उतु… भोजनं… सेनासनं सद्धाय…पे… पत्थनाय मग्गस्स, फलसमापत्तिया उपनिस्सयपच्चयेन पच्चयो. (१)

अनुपादिन्नो धम्मो उपादिन्नस्स धम्मस्स उपनिस्सयपच्चयेन पच्चयो – अनन्तरूपनिस्सयो, पकतूपनिस्सयो…पे…. पकतूपनिस्सयो – सद्धं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति; सीलं…पे… पत्थनं… उतुं… भोजनं… सेनासनं उपनिस्साय अत्तानं आतापेति परितापेति, परियिट्ठिमूलकं दुक्खं पच्चनुभोति; सद्धा…पे… सेनासनं कायिकस्स सुखस्स… कायिकस्स दुक्खस्स उपनिस्सयपच्चयेन पच्चयो. कुसलाकुसलं कम्मं विपाकस्स उपनिस्सयपच्चयेन पच्चयो. (२)

पुरेजातपच्चयो

४५३. उपादिन्नो धम्मो उपादिन्नस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… कायं उपादिन्ने रूपे… गन्धे… रसे… फोट्ठब्बे… वत्थुं अनिच्चतो…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति, उपादिन्नं रूपायतनं चक्खुविञ्ञाणस्स…पे… गन्धायतनं…पे… फोट्ठब्बायतनं कायविञ्ञाणस्स…पे…. वत्थुपुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु उपादिन्नानं खन्धानं पुरेजातपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. आरम्मणपुरेजातं – चक्खुं…पे… कायं, उपादिन्ने रूपे… गन्धे… रसे… फोट्ठब्बे वत्थुं अनिच्चतो…पे… दोमनस्सं उप्पज्जति; दिब्बेन चक्खुना उपादिन्नं रूपं पस्सति. वत्थुपुरेजातं – वत्थु अनुपादिन्नानं खन्धानं पुरेजातपच्चयेन पच्चयो. (२)

४५४. अनुपादिन्नो धम्मो अनुपादिन्नस्स धम्मस्स पुरेजातपच्चयेन पच्चयो. आरम्मणपुरेजातं – अनुपादिन्ने रूपे… सद्दे… गन्धे… रसे… फोट्ठब्बे अनिच्चतो…पे… दोमनस्सं उप्पज्जति; दिब्बेन चक्खुना अनुपादिन्नं रूपं पस्सति, दिब्बाय सोतधातुया सद्दं सुणाति. (१)

अनुपादिन्नो धम्मो उपादिन्नस्स धम्मस्स पुरेजातपच्चयेन पच्चयो. आरम्मणपुरेजातं – अनुपादिन्ने रूपे… सद्दे… गन्धे… रसे… फोट्ठब्बे अनिच्चतो…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति, अनुपादिन्नं रूपायतनं चक्खुविञ्ञाणस्स…पे… सद्दायतनं…पे… फोट्ठब्बायतनं कायविञ्ञाणस्स पुरेजातपच्चयेन पच्चयो. (२)

उपादिन्नो च अनुपादिन्नो च धम्मा उपादिन्नस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. अनुपादिन्नं रूपायतनञ्च चक्खायतनञ्च चक्खुविञ्ञाणस्स…पे… सद्दायतनञ्च सोतायतनञ्च…पे… फोट्ठब्बायतनञ्च कायायतनञ्च कायविञ्ञाणस्स पुरेजातपच्चयेन पच्चयो; अनुपादिन्नं रूपायतनञ्च वत्थु च…पे… फोट्ठब्बायतनञ्च वत्थु च उपादिन्नानं खन्धानं पुरेजातपच्चयेन पच्चयो. (१)

उपादिन्नो च अनुपादिन्नो च धम्मा अनुपादिन्नस्स धम्मस्स पुरेजातपच्चयेन पच्चयो – आरम्मणपुरेजातं, वत्थुपुरेजातं. अनुपादिन्नं रूपायतनञ्च वत्थु च…पे… फोट्ठब्बायतनञ्च वत्थु च अनुपादिन्नानं खन्धानं पुरेजातपच्चयेन पच्चयो. (२)

पच्छाजातासेवनपच्चया

४५५. उपादिन्नो धम्मो उपादिन्नस्स धम्मस्स पच्छाजातपच्चयेन पच्चयो – पच्छाजाता उपादिन्ना खन्धा पुरेजातस्स इमस्स उपादिन्नस्स कायस्स पच्छाजातपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स पच्छाजातपच्चयेन पच्चयो – पच्छाजाता उपादिन्ना खन्धा पुरेजातस्स इमस्स अनुपादिन्नस्स कायस्स पच्छाजातपच्चयेन पच्चयो. (२)

उपादिन्नो धम्मो उपादिन्नस्स च अनुपादिन्नस्स च धम्मस्स पच्छाजातपच्चयेन पच्चयो (संखित्तं). (३)

अनुपादिन्नो धम्मो अनुपादिन्नस्स धम्मस्स पच्छाजातपच्चयेन पच्चयो (संखित्तं). (१)

अनुपादिन्नो धम्मो उपादिन्नस्स धम्मस्स पच्छाजातपच्चयेन पच्चयो (संखित्तं). (२)

अनुपादिन्नो धम्मो उपादिन्नस्स च अनुपादिन्नस्स च धम्मस्स पच्छाजातपच्चयेन पच्चयो (संखित्तं). (३)

४५६. अनुपादिन्नो धम्मो अनुपादिन्नस्स धम्मस्स आसेवनपच्चयेन पच्चयो… एकं (संखित्तं).

कम्मपच्चयो

४५७. उपादिन्नो धम्मो उपादिन्नस्स धम्मस्स कम्मपच्चयेन पच्चयो – उपादिन्ना चेतना सम्पयुत्तकानं खन्धानं कम्मपच्चयेन पच्चयो; पटिसन्धिक्खणे उपादिन्ना चेतना सम्पयुत्तकानं खन्धानं कटत्ता च रूपानं कम्मपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स कम्मपच्चयेन पच्चयो – उपादिन्ना चेतना चित्तसमुट्ठानानं रूपानं कम्मपच्चयेन पच्चयो. (२)

उपादिन्नो धम्मो उपादिन्नस्स च अनुपादिन्नस्स च धम्मस्स कम्मपच्चयेन पच्चयो – उपादिन्ना चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (३)

अनुपादिन्नो धम्मो अनुपादिन्नस्स धम्मस्स कम्मपच्चयेन पच्चयो – अनुपादिन्ना चेतना सम्पयुत्तकानं खन्धानं चित्तसमुट्ठानानञ्च रूपानं कम्मपच्चयेन पच्चयो. (१)

अनुपादिन्नो धम्मो उपादिन्नस्स धम्मस्स कम्मपच्चयेन पच्चयो. नानाक्खणिका – अनुपादिन्ना चेतना विपाकानं खन्धानं कटत्ता च रूपानं कम्मपच्चयेन पच्चयो. (२)

विपाकपच्चयो

४५८. उपादिन्नो धम्मो उपादिन्नस्स धम्मस्स विपाकपच्चयेन पच्चयो – उपादिन्नो एको खन्धो (संखित्तं. उपादिन्नमूलके तीणि. ).

अनुपादिन्नो धम्मो अनुपादिन्नस्स धम्मस्स विपाकपच्चयेन पच्चयो – विपाको अनुपादिन्नो एको खन्धो तिण्णन्नं खन्धानं चित्तसमुट्ठानानञ्च रूपानं विपाकपच्चयेन पच्चयो…पे… द्वे खन्धा…पे…. (१)

आहारपच्चयो

४५९. उपादिन्नो धम्मो उपादिन्नस्स धम्मस्स आहारपच्चयेन पच्चयो – उपादिन्ना आहारा सम्पयुत्तकानं खन्धानं आहारपच्चयेन पच्चयो; पटिसन्धिक्खणे…पे… उपादिन्नो कबळीकारो आहारो इमस्स उपादिन्नस्स कायस्स आहारपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स आहारपच्चयेन पच्चयो – उपादिन्ना आहारा चित्तसमुट्ठानानं रूपानं आहारपच्चयेन पच्चयो; उपादिन्नो कबळीकारो आहारो इमस्स अनुपादिन्नस्स कायस्स आहारपच्चयेन पच्चयो. (२)

उपादिन्नो धम्मो उपादिन्नस्स च अनुपादिन्नस्स च धम्मस्स आहारपच्चयेन पच्चयो – उपादिन्ना आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; उपादिन्नो कबळीकारो आहारो इमस्स उपादिन्नस्स च अनुपादिन्नस्स च कायस्स आहारपच्चयेन पच्चयो. (३)

४६०. अनुपादिन्नो धम्मो अनुपादिन्नस्स धम्मस्स आहारपच्चयेन पच्चयो – अनुपादिन्ना आहारा सम्पयुत्तकानं खन्धानं चित्तसमुट्ठानानञ्च रूपानं आहारपच्चयेन पच्चयो; अनुपादिन्नो कबळीकारो आहारो इमस्स अनुपादिन्नस्स कायस्स आहारपच्चयेन पच्चयो. (१)

अनुपादिन्नो धम्मो उपादिन्नस्स धम्मस्स आहारपच्चयेन पच्चयो – अनुपादिन्नो कबळीकारो आहारो इमस्स उपादिन्नस्स कायस्स आहारपच्चयेन पच्चयो. (२)

अनुपादिन्नो धम्मो उपादिन्नस्स च अनुपादिन्नस्स च धम्मस्स आहारपच्चयेन पच्चयो – अनुपादिन्नो कबळीकारो आहारो इमस्स उपादिन्नस्स च अनुपादिन्नस्स च कायस्स आहारपच्चयेन पच्चयो. (३)

उपादिन्नो च अनुपादिन्नो च धम्मा उपादिन्नस्स धम्मस्स आहारपच्चयेन पच्चयो – उपादिन्नो च अनुपादिन्नो च कबळीकारो आहारो इमस्स उपादिन्नस्स कायस्स आहारपच्चयेन पच्चयो. (१)

उपादिन्नो च अनुपादिन्नो च धम्मा अनुपादिन्नस्स धम्मस्स आहारपच्चयेन पच्चयो – उपादिन्नो च अनुपादिन्नो च कबळीकारो आहारो इमस्स अनुपादिन्नस्स कायस्स आहारपच्चयेन पच्चयो. (२)

उपादिन्नो च अनुपादिन्नो च धम्मा उपादिन्नस्स च अनुपादिन्नस्स च धम्मस्स आहारपच्चयेन पच्चयो – उपादिन्नो च अनुपादिन्नो च कबळीकारो आहारो इमस्स उपादिन्नस्स च अनुपादिन्नस्स च कायस्स आहारपच्चयेन पच्चयो. (३)

इन्द्रियपच्चयादि

४६१. उपादिन्नो धम्मो उपादिन्नस्स धम्मस्स इन्द्रियपच्चयेन पच्चयो – उपादिन्ना इन्द्रिया सम्पयुत्तकानं खन्धानं इन्द्रियपच्चयेन पच्चयो. (१)

पटिसन्धिक्खणे उपादिन्ना इन्द्रिया सम्पयुत्तकानं खन्धानं कटत्ता च रूपानं इन्द्रियपच्चयेन पच्चयो; चक्खुन्द्रियं चक्खुविञ्ञाणस्स…पे… कायिन्द्रियं कायविञ्ञाणस्स…पे… रूपजीवितिन्द्रियं कटत्तारूपानं इन्द्रियपच्चयेन पच्चयो. (२)

उपादिन्नो धम्मो अनुपादिन्नस्स धम्मस्स…पे… (उपादिन्नमूलके तीणि, पठमस्सेव रूपजीवितिन्द्रियं, इतरेसु नत्थि). (३)

अनुपादिन्नो धम्मो अनुपादिन्नस्स धम्मस्स इन्द्रियपच्चयेन पच्चयो – अनुपादिन्ना इन्द्रिया सम्पयुत्तकानं खन्धानं चित्तसमुट्ठानानञ्च रूपानं इन्द्रियपच्चयेन पच्चयो. (१)

उपादिन्नो धम्मो उपादिन्नस्स धम्मस्स झानपच्चयेन पच्चयो… चत्तारि, मग्गपच्चयेन पच्चयो… चत्तारि, सम्पयुत्तपच्चयेन पच्चयो… द्वे.

विप्पयुत्तपच्चयो

४६२. उपादिन्नो धम्मो उपादिन्नस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजातं – पटिसन्धिक्खणे उपादिन्ना खन्धा कटत्तारूपानं विप्पयुत्तपच्चयेन पच्चयो, खन्धा वत्थुस्स विप्पयुत्तपच्चयेन पच्चयो, वत्थु खन्धानं विप्पयुत्तपच्चयेन पच्चयो. पुरेजातं – चक्खायतनं चक्खुविञ्ञाणस्स…पे… कायायतनं कायविञ्ञाणस्स…पे… वत्थु उपादिन्नानं खन्धानं विप्पयुत्तपच्चयेन पच्चयो. पच्छाजाता – उपादिन्ना खन्धा पुरेजातस्स इमस्स उपादिन्नस्स कायस्स विप्पयुत्तपच्चयेन पच्चयो. (१)

उपादिन्नो धम्मो अनुपादिन्नस्स धम्मस्स विप्पयुत्तपच्चयेन पच्चयो – सहजातं, पुरेजातं, पच्छाजातं. सहजाता – उपादिन्ना खन्धा चित्तसमुट्ठानानं रूपानं विप्पयुत्तपच्चयेन पच्चयो. पुरेजातं – वत्थु अनुपादिन्नानं खन्धानं विप्पयुत्तपच्चयेन पच्चयो. पच्छाजाता – उपादिन्ना खन्धा पुरेजातस्स इमस्स अनुपादिन्नस्स कायस्स विप्पयुत्तपच्चयेन पच्चयो. (२)

उपादिन्नो धम्मो उपादिन्नस्स च अनुपादिन्नस्स च धम्मस्स विप्पयुत्तपच्चयेन पच्चयो. पच्छाजाता – उपादिन्ना खन्धा पुरेजातस्स इमस्स उपादिन्नस्स च अनुपादिन्नस्स च कायस्स विप्पयुत्तपच्चयेन पच्चयो. (३)

४६३. अनुपादिन्नो धम्मो अनुपादिन्नस्स धम्मस्स विप्पयुत्तपच्चयेन पच्चयो – सहजातं, पच्छाजातं. सहजाता – अनुपादिन्ना खन्धा चित्तसमुट्ठानानं रूपानं विप्पयुत्तपच्चयेन पच्चयो. पच्छाजाता – अनुपादिन्ना खन्धा पुरेजातस्स इमस्स अनुपादिन्नस्स कायस्स विप्पयुत्तपच्चयेन पच्चयो. (१)

अनुपादिन्नो धम्मो उपादिन्नस्स धम्मस्स विप्पयुत्तपच्चयेन पच्चयो. पच्छाजाता – अनुपादिन्ना खन्धा पुरेजातस्स इमस्स उपादिन्नस्स कायस्स विप्पयुत्तपच्चयेन पच्चयो. (२)

अनुपादिन्नो धम्मो उपादिन्नस्स च अनुपादिन्नस्स च धम्मस्स विप्पयुत्तपच्चयेन पच्चयो. पच्छाजाता – अनुपादिन्ना खन्धा पुरेजातस्स इमस्स उपादिन्नस्स च अनुपादिन्नस्स च कायस्स विप्पयुत्तपच्चयेन पच्चयो. (३)

अत्थिपच्चयादि

४६४. उपादिन्नो धम्मो उपादिन्नस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं, इन्द्रियं (संखित्तं. यथा निक्खित्तपदानि विभजितब्बानि परिपुण्णानि). (१)

उपादिन्नो धम्मो अनुपादिन्नस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं (संखित्तं, यथा निक्खित्तपदानि वित्थारेतब्बानि. (२)

उपादिन्नो धम्मो उपादिन्नस्स च अनुपादिन्नस्स च धम्मस्स अत्थिपच्चयेन पच्चयो – सहजातं, पच्छाजातं, आहारं (संखित्तं, यथा निक्खित्तपदानि वित्थारेतब्बानि). (३)

अनुपादिन्नो धम्मो अनुपादिन्नस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं (संखित्तं, यथा निक्खित्तपदानि विभजितब्बानि). (१)

अनुपादिन्नो धम्मो उपादिन्नस्स धम्मस्स अत्थिपच्चयेन पच्चयो – पुरेजातं, पच्छाजातं, आहारं. पुरेजातं – अनुपादिन्ने रूपे… सद्दे… गन्धे… रसे… फोट्ठब्बे अनिच्चतो…पे… दोमनस्सं उप्पज्जति; कुसलाकुसले निरुद्धे विपाको तदारम्मणता उप्पज्जति, अनुपादिन्नं रूपायतनं चक्खुविञ्ञाणस्स…पे… फोट्ठब्बायतनं कायविञ्ञाणस्स…पे…. पच्छाजाता – अनुपादिन्ना खन्धा पुरेजातस्स इमस्स उपादिन्नस्स कायस्स अत्थिपच्चयेन पच्चयो; अनुपादिन्नो कबळीकारो आहारो इमस्स उपादिन्नस्स कायस्स अत्थिपच्चयेन पच्चयो. (२)

अनुपादिन्नो धम्मो उपादिन्नस्स च अनुपादिन्नस्स च धम्मस्स अत्थिपच्चयेन पच्चयो – पच्छाजातं, आहारं. पच्छाजाता – अनुपादिन्ना खन्धा पुरेजातस्स इमस्स उपादिन्नस्स च अनुपादिन्नस्स च कायस्स अत्थिपच्चयेन पच्चयो; अनुपादिन्नो कबळीकारो आहारो इमस्स उपादिन्नस्स च अनुपादिन्नस्स च कायस्स अत्थिपच्चयेन पच्चयो. (३)

४६५. उपादिन्नो च अनुपादिन्नो च धम्मा उपादिन्नस्स धम्मस्स अत्थिपच्चयेन पच्चयो – पुरेजातं, पच्छाजातं, आहारं, इन्द्रियं. पुरेजातं – अनुपादिन्नं रूपायतनञ्च चक्खायतनञ्च चक्खुविञ्ञाणस्स…पे… अनुपादिन्नं फोट्ठब्बायतनञ्च कायायतनञ्च कायविञ्ञाणस्स अत्थिपच्चयेन पच्चयो; अनुपादिन्नं रूपायतनञ्च वत्थु च…पे… फोट्ठब्बायतनञ्च वत्थु च उपादिन्नानं खन्धानं अत्थिपच्चयेन पच्चयो. पच्छाजाता – उपादिन्ना खन्धा च अनुपादिन्नो कबळीकारो आहारो च इमस्स उपादिन्नस्स कायस्स अत्थिपच्चयेन पच्चयो. पच्छाजाता – अनुपादिन्ना खन्धा च रूपजीवितिन्द्रियञ्च कटत्तारूपानं अत्थिपच्चयेन पच्चयो. (१)

उपादिन्नो च अनुपादिन्नो च धम्मा अनुपादिन्नस्स धम्मस्स अत्थिपच्चयेन पच्चयो – सहजातं, पुरेजातं, पच्छाजातं, आहारं. सहजाता – उपादिन्ना खन्धा च महाभूता च चित्तसमुट्ठानानं रूपानं अत्थिपच्चयेन पच्चयो. सहजातो – अनुपादिन्नो एको खन्धो च वत्थु च तिण्णन्नं खन्धानं अत्थिपच्चयेन पच्चयो…पे… द्वे खन्धा च…पे…. पुरेजातं – अनुपादिन्नं रूपायतनञ्च वत्थु च अनुपादिन्नानं खन्धानं अत्थिपच्चयेन पच्चयो…पे… फोट्ठब्बायतनञ्च वत्थु च अनुपादिन्नानं खन्धानं अत्थिपच्चयेन पच्चयो. पच्छाजाता – उपादिन्ना खन्धा च अनुपादिन्नो कबळीकारो आहारो च इमस्स अनुपादिन्नस्स कायस्स अत्थिपच्चयेन पच्चयो. (२)

उपादिन्नो च अनुपादिन्नो च धम्मा उपादिन्नस्स च अनुपादिन्नस्स च धम्मस्स अत्थिपच्चयेन पच्चयो. आहारं – उपादिन्नो च अनुपादिन्नो च कबळीकारो आहारो इमस्स उपादिन्नस्स च अनुपादिन्नस्स च कायस्स अत्थिपच्चयेन पच्चयो. (३)

नत्थिपच्चयेन पच्चयो… विगतपच्चयेन पच्चयो… अविगतपच्चयेन पच्चयो.