१. विभङ्गवारो

नहेतुपच्चयो

४३८. उपादिन्नं धम्मं पच्चया उपादिन्नो धम्मो उप्पज्जति नहेतुपच्चया – अहेतुकं उपादिन्नं एकं खन्धं पच्चया तयो खन्धा…पे… द्वे खन्धे…पे… अहेतुकपटिसन्धिक्खणे…पे… खन्धे पच्चया वत्थु, वत्थुं पच्चया खन्धा, एकं महाभूतं…पे… महाभूते पच्चया कटत्तारूपं उपादारूपं, असञ्ञसत्तानं एकं महाभूतं…पे… चक्खायतनं पच्चया चक्खुविञ्ञाणं…पे… कायायतनं…पे… वत्थुं पच्चया अहेतुका उपादिन्ना खन्धा. (१)

उपादिन्नं धम्मं पच्चया अनुपादिन्नो धम्मो उप्पज्जति नहेतुपच्चया – अहेतुके उपादिन्ने खन्धे पच्चया चित्तसमुट्ठानं रूपं, वत्थुं पच्चया अहेतुका अनुपादिन्ना खन्धा, वत्थुं पच्चया विचिकिच्छासहगतो उद्धच्चसहगतो मोहो. (२)

उपादिन्नं धम्मं पच्चया उपादिन्नो च अनुपादिन्नो च धम्मा उप्पज्जन्ति नहेतुपच्चया – अहेतुकं उपादिन्नं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

४३९. अनुपादिन्नं धम्मं पच्चया अनुपादिन्नो धम्मो उप्पज्जति नहेतुपच्चया – अहेतुकं अनुपादिन्नं एकं खन्धं पच्चया तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं…पे… बाहिरं… आहारसमुट्ठानं… उतुसमुट्ठानं…पे… विचिकिच्छासहगते उद्धच्चसहगते खन्धे पच्चया विचिकिच्छासहगतो उद्धच्चसहगतो मोहो. (१)

उपादिन्नञ्च अनुपादिन्नञ्च धम्मं पच्चया अनुपादिन्नो धम्मो उप्पज्जति नहेतुपच्चया – अहेतुके उपादिन्ने खन्धे च महाभूते च पच्चया चित्तसमुट्ठानं रूपं, अहेतुकं अनुपादिन्नं एकं खन्धञ्च वत्थुञ्च पच्चया तयो खन्धा…पे… द्वे खन्धे च…पे… विचिकिच्छासहगते उद्धच्चसहगते खन्धे च वत्थुञ्च पच्चया विचिकिच्छासहगतो उद्धच्चसहगतो मोहो. (१) (संखित्तं.)