१. विभङ्गवारो

नहेतुपच्चयो

४२०. उपादिन्नं धम्मं पटिच्च उपादिन्नो धम्मो उप्पज्जति नहेतुपच्चया – अहेतुकं उपादिन्नं एकं खन्धं पटिच्च तयो खन्धा…पे… द्वे खन्धे…पे… अहेतुकपटिसन्धिक्खणे उपादिन्नं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं पटिच्च…पे… महाभूते पटिच्च कटत्तारूपं उपादारूपं, असञ्ञसत्तानं एकं महाभूतं पटिच्च…पे… महाभूते पटिच्च कटत्तारूपं उपादारूपं. (१)

उपादिन्नं धम्मं पटिच्च अनुपादिन्नो धम्मो उप्पज्जति नहेतुपच्चया – अहेतुके उपादिन्ने खन्धे पटिच्च चित्तसमुट्ठानं रूपं. (२)

उपादिन्नं धम्मं पटिच्च उपादिन्नो च अनुपादिन्नो च धम्मा उप्पज्जन्ति नहेतुपच्चया – अहेतुकं उपादिन्नं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

४२१. अनुपादिन्नं धम्मं पटिच्च अनुपादिन्नो धम्मो उप्पज्जति नहेतुपच्चया – अहेतुकं अनुपादिन्नं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं…पे… महाभूते पटिच्च चित्तसमुट्ठानं रूपं उपादारूपं. बाहिरं… आहारसमुट्ठानं… उतुसमुट्ठानं एकं महाभूतं…पे… महाभूते पटिच्च उपादारूपं. विचिकिच्छासहगते उद्धच्चसहगते खन्धे पटिच्च विचिकिच्छासहगतो उद्धच्चसहगतो मोहो. (१)

उपादिन्नञ्च अनुपादिन्नञ्च धम्मं पटिच्च अनुपादिन्नो धम्मो उप्पज्जति नहेतुपच्चया – अहेतुके उपादिन्ने खन्धे च महाभूते च पटिच्च चित्तसमुट्ठानं रूपं. (१)

नआरम्मणपच्चयो

४२२. उपादिन्नं धम्मं पटिच्च उपादिन्नो धम्मो उप्पज्जति नआरम्मणपच्चया – पटिसन्धिक्खणे उपादिन्ने खन्धे पटिच्च कटत्तारूपं, खन्धे पटिच्च वत्थु, एकं महाभूतं…पे… महाभूते पटिच्च कटत्तारूपं उपादारूपं. असञ्ञसत्तानं एकं महाभूतं…पे… महाभूते पटिच्च कटत्तारूपं उपादारूपं. (१)

उपादिन्नं धम्मं पटिच्च अनुपादिन्नो धम्मो उप्पज्जति नआरम्मणपच्चया – उपादिन्ने खन्धे पटिच्च चित्तसमुट्ठानं रूपं. (२)

अनुपादिन्नं धम्मं पटिच्च अनुपादिन्नो धम्मो उप्पज्जति नआरम्मणपच्चया – अनुपादिन्ने खन्धे पटिच्च चित्तसमुट्ठानं रूपं, एकं महाभूतं…पे… बाहिरं… आहारसमुट्ठानं… उतुसमुट्ठानं एकं महाभूतं…पे… महाभूते पटिच्च उपादारूपं. (१)

उपादिन्नञ्च अनुपादिन्नञ्च धम्मं पटिच्च अनुपादिन्नो धम्मो उप्पज्जति नआरम्मणपच्चया – उपादिन्ने खन्धे च महाभूते च पटिच्च चित्तसमुट्ठानं रूपं. (१)

नअधिपतिपच्चयादि

४२३. उपादिन्नं धम्मं पटिच्च उपादिन्नो धम्मो उप्पज्जति नअधिपतिपच्चया… नअनन्तरपच्चया… नसमनन्तरपच्चया… नअञ्ञमञ्ञपच्चया… नउपनिस्सयपच्चया.

नपुरेजातपच्चयादि

४२४. उपादिन्नं धम्मं पटिच्च उपादिन्नो धम्मो उप्पज्जति नपुरेजातपच्चया – अरूपे उपादिन्नं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे उपादिन्नं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… (याव असञ्ञसत्ता). (१)

उपादिन्नं धम्मं पटिच्च अनुपादिन्नो धम्मो उप्पज्जति नपुरेजातपच्चया – उपादिन्ने खन्धे पटिच्च चित्तसमुट्ठानं रूपं. (२)

अनुपादिन्नं धम्मं पटिच्च अनुपादिन्नो धम्मो उप्पज्जति नपुरेजातपच्चया – अरूपे अनुपादिन्नं एकं खन्धं पटिच्च तयो खन्धा…पे… द्वे खन्धे…पे… अनुपादिन्ने खन्धे पटिच्च चित्तसमुट्ठानं रूपं, एकं महाभूतं…पे… (याव असञ्ञसत्ता). (१)

उपादिन्नञ्च अनुपादिन्नञ्च धम्मं पटिच्च अनुपादिन्नो धम्मो उप्पज्जति नपुरेजातपच्चया – उपादिन्ने खन्धे च महाभूते च पटिच्च चित्तसमुट्ठानं रूपं… नपच्छाजातपच्चया… नआसेवनपच्चया. (१)

नकम्मपच्चयो

४२५. अनुपादिन्नं धम्मं पटिच्च अनुपादिन्नो धम्मो उप्पज्जति नकम्मपच्चया – अनुपादिन्ने खन्धे पटिच्च अनुपादिन्ना चेतना… बाहिरं… आहारसमुट्ठानं… उतुसमुट्ठानं…पे… महाभूते पटिच्च उपादारूपं. (१)

नविपाकपच्चयो

४२६. उपादिन्नं धम्मं पटिच्च उपादिन्नो धम्मो उप्पज्जति नविपाकपच्चया – असञ्ञसत्तानं एकं महाभूतं…पे… महाभूते पटिच्च कटत्तारूपं उपादारूपं. (१)

अनुपादिन्नं धम्मं पटिच्च अनुपादिन्नो धम्मो उप्पज्जति नविपाकपच्चया – अनुपादिन्नं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं…पे… (याव उतुसमुट्ठानं).

नआहारपच्चयो

४२७. उपादिन्नं धम्मं पटिच्च उपादिन्नो धम्मो उप्पज्जति नआहारपच्चया – असञ्ञसत्तानं एकं महाभूतं…पे…. (१)

अनुपादिन्नं धम्मं पटिच्च अनुपादिन्नो धम्मो उप्पज्जति नआहारपच्चया – बाहिरं… उतुसमुट्ठानं…पे…. (१)

नइन्द्रियपच्चयो

४२८. उपादिन्नं धम्मं पटिच्च उपादिन्नो धम्मो उप्पज्जति नइन्द्रियपच्चया – असञ्ञसत्तानं महाभूते पटिच्च रूपजीवितिन्द्रियं. (१)

अनुपादिन्नं धम्मं पटिच्च अनुपादिन्नो धम्मो उप्पज्जति नइन्द्रियपच्चया – बाहिरं… आहारसमुट्ठानं… उतुसमुट्ठानं…पे…. (१)

नझानपच्चयादि

४२९. उपादिन्नं धम्मं पटिच्च उपादिन्नो धम्मो उप्पज्जति नझानपच्चया – पञ्चविञ्ञाणसहगतं एकं खन्धं पटिच्च तयो खन्धा…पे… द्वे खन्धे…पे… असञ्ञसत्तानं…पे….

अनुपादिन्नं धम्मं पटिच्च अनुपादिन्नो धम्मो उप्पज्जति नझानपच्चया – बाहिरं… आहारसमुट्ठानं… उतुसमुट्ठानं…पे….

उपादिन्नं धम्मं पटिच्च उपादिन्नो धम्मो उप्पज्जति नमग्गपच्चया (नहेतुसदिसं, मोहो नत्थि)… नसम्पयुत्तपच्चया.

नविप्पयुत्तपच्चयादि

४३०. उपादिन्नं धम्मं पटिच्च उपादिन्नो धम्मो उप्पज्जति नविप्पयुत्तपच्चया – अरूपे उपादिन्नं एकं खन्धं पटिच्च तयो खन्धा…पे… द्वे खन्धे…पे… असञ्ञसत्तानं एकं महाभूतं पटिच्च…पे….

अनुपादिन्नं धम्मं पटिच्च अनुपादिन्नो धम्मो उप्पज्जति नविप्पयुत्तपच्चया – अरूपे अनुपादिन्नं एकं खन्धं पटिच्च तयो खन्धा…पे… द्वे खन्धे…पे… बाहिरं … आहारसमुट्ठानं… उतुसमुट्ठानं…पे… नोनत्थिपच्चया… नोविगतपच्चया.