१. विभङ्गवारो

हेतुपच्चयो

४१६. उपादिन्नं धम्मं पटिच्च उपादिन्नो धम्मो उप्पज्जति हेतुपच्चया – उपादिन्नं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे उपादिन्नं एकं खन्धं पटिच्च तयो खन्धा कटत्ता च रूपं…पे… द्वे खन्धे…पे… खन्धे पटिच्च वत्थु, वत्थुं पटिच्च खन्धा, एकं महाभूतं…पे… महाभूते पटिच्च कटत्तारूपं उपादारूपं. (१)

उपादिन्नं धम्मं पटिच्च अनुपादिन्नो धम्मो उप्पज्जति हेतुपच्चया – उपादिन्ने खन्धे पटिच्च चित्तसमुट्ठानं रूपं. (२)

उपादिन्नं धम्मं पटिच्च उपादिन्नो च अनुपादिन्नो च धम्मा उप्पज्जन्ति हेतुपच्चया – उपादिन्नं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे…. (३)

अनुपादिन्नं धम्मं पटिच्च अनुपादिन्नो धम्मो उप्पज्जति हेतुपच्चया – अनुपादिन्नं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं पटिच्च…पे… महाभूते पटिच्च चित्तसमुट्ठानं रूपं उपादारूपं. (१)

उपादिन्नञ्च अनुपादिन्नञ्च धम्मं पटिच्च अनुपादिन्नो धम्मो उप्पज्जति हेतुपच्चया – उपादिन्ने खन्धे च महाभूते च पटिच्च चित्तसमुट्ठानं रूपं. (१)

आरम्मणपच्चयो

४१७. उपादिन्नं धम्मं पटिच्च उपादिन्नो धम्मो उप्पज्जति आरम्मणपच्चया – उपादिन्नं एकं खन्धं पटिच्च तयो खन्धा…पे… द्वे खन्धे…पे… पटिसन्धिक्खणे…पे… वत्थुं पटिच्च खन्धा. (१)

अनुपादिन्नं धम्मं पटिच्च अनुपादिन्नो धम्मो उप्पज्जति आरम्मणपच्चया – अनुपादिन्नं एकं खन्धं पटिच्च तयो खन्धा…पे… द्वे खन्धे…पे…. (१)

अधिपतिपच्चयो

४१८. अनुपादिन्नं धम्मं पटिच्च अनुपादिन्नो धम्मो उप्पज्जति अधिपतिपच्चया – अनुपादिन्नं एकं खन्धं पटिच्च तयो खन्धा चित्तसमुट्ठानञ्च रूपं…पे… द्वे खन्धे…पे… एकं महाभूतं पटिच्च…पे… महाभूते पटिच्च चित्तसमुट्ठानं रूपं उपादारूपं (संखित्तं).