२. सङ्ख्यावारो

सुद्धं

४१०. हेतुया तीणि, आरम्मणे द्वे, अधिपतिया चत्तारि, अनन्तरे एकं, समनन्तरे एकं, सहजाते पञ्च, अञ्ञमञ्ञे पञ्च, निस्सये पञ्च, उपनिस्सये द्वे, पुरेजाते तीणि, पच्छाजाते तीणि, आसेवने एकं, कम्मे तीणि, विपाके तीणि, आहारे छ, इन्द्रिये सत्त, झाने तीणि, मग्गे तीणि, सम्पयुत्ते एकं, विप्पयुत्ते चत्तारि, अत्थिया नव, नत्थिया एकं, विगते एकं, अविगते नव.

अनुलोमं.

पच्चनीयुद्धारो

४११. उपादा धम्मो उपादा धम्मस्स आहारपच्चयेन पच्चयो… इन्द्रियपच्चयेन पच्चयो. (१)

उपादा धम्मो नोउपादा धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो… आहारपच्चयेन पच्चयो… इन्द्रियपच्चयेन पच्चयो. (२)

उपादा धम्मो उपादा धम्मस्स च नोउपादा धम्मस्स च आहारपच्चयेन पच्चयो… इन्द्रियपच्चयेन पच्चयो. (३)

४१२. नोउपादा धम्मो नोउपादा धम्मस्स आरम्मणपच्चयेन पच्चयो… सहजातपच्चयेन पच्चयो… उपनिस्सयपच्चयेन पच्चयो… पुरेजातपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो. (१)

नोउपादा धम्मो उपादा धम्मस्स सहजातपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो. (२)

नोउपादा धम्मो उपादा धम्मस्स च नोउपादा धम्मस्स च सहजातपच्चयेन पच्चयो… पच्छाजातपच्चयेन पच्चयो… कम्मपच्चयेन पच्चयो. (३)

उपादा च नोउपादा च धम्मा उपादा धम्मस्स पच्छाजातं, आहारं, इन्द्रियं. (१)

उपादा च नोउपादा च धम्मा नोउपादा धम्मस्स सहजातं, पुरेजातं, पच्छाजातं, आहारं, इन्द्रियं. (२)

उपादा च नोउपादा च धम्मा उपादा धम्मस्स च नोउपादा धम्मस्स च पच्छाजातं, आहारं, इन्द्रियं. (३)